35
याकूबं बेथेलय् वेदी दय्कूगु
1 परमेश्वरं याकूबयात धयादिल-- “दँ, बेथेलय् वनाः अन हे च्वँ। अले छ थः दाजु एसावलिसे ग्यानाः बिस्युं वंबलय् छन्थाय् खनेदय्कःवःम्ह परमेश्वरया लागि छगू वेदी दय्कि।”
2 उकिं याकूबं थः छेँजःपिन्त व थःलिसे दुपिं सकसितं धाल-- “छिपिंलिसे दुगु कर्पिनिगु मूर्तियात वांछ्वयाब्यु, अले थःपिन्त शुद्ध यानाः मेगु लं फ्यु।
3 झी आः थ्व थाय् त्वःताः बेथेलय् वने त्यना। अन जिं जितः आपतय् ग्वाहालि यानादीम्ह व जि न्ह्याथाय् वंसां जिलिसे दीम्ह परमेश्वरया लागि छगू वेदी दय्के।”
4 अले फुक्कसिनं याकूबयात थःपिन्के दुगु फुक्क मूर्ति व न्हाय्पनय् च्वंगु तिसा बिल। वं व फुक्क शकेमया नापसं च्वंगु स्वंसिमा क्वय् थुनाबिल।
5 इपिं अनं वँसेंलि परमेश्वरं इमिगु जवंखवं च्वंगु शहरयात ग्याःचिकुं भुनाबिल। अले सुनानं याकूब व वया मनूतय्त लीमफुत।
6 याकूब थः मनूतलिसे कनान देशया लुज धाःथाय् थ्यंकः वल। थौंकन्हय् थ्व थाय्यात बेथेल धाइ।
7 वं अन छगू वेदी दय्कल। वं व थाय्यागु नां एल-बेथेल धकाः तल। छाय्धाःसा व थः दाजुलिसे ग्यानाः बिस्युं वःबलय् परमेश्वरं वयात अन हे झायाः नापलानादीगु खः।
8 अन रिबेकाया तुतुमां दबोरा सित। वयात बेथेलया क्वसं च्वंगु छमा स्वसिमाया क्वय् थुनाबिल। उकिं व थाय्यागु नां अल्लोन-बकुत तल।
9 याकूब पद्दन-आरामं वयेधुंकाः परमेश्वरं हाकनं वयाथाय् खनेदय्कः झायाः वयात आशिष बियादिल।
10 परमेश्वरं वयात धयादिल-- “छंगु नां याकूब खः। आः थनिंनिसें छंगु नां याकूब मखु, इस्राएल जुइ।” थुकथं वय्कलं वयागु नां इस्राएल तयादिल।
11 वय्कलं वयात हाकनं धयादिल-- “जि दक्वसिबय् बल्लाःम्ह परमेश्वर खः। छं यक्व सन्तान दयेमा। छंगु पाखें यक्व जातजाति दयावइ। छंगु पाखें यक्व जुजुपिं नं दयावइ।
12 जिं अब्राहाम व इसहाकयात बी धयागु देश छन्त बी, अले थ्व सदांया लागि छिमि सन्तानयागु जुइ।”
13 अले परमेश्वर अनं झाल।
14 याकूबं अन ल्वहं छगः धंकाः उकी दाखमद्य व चिकं लुनाबिल।
15 अले वं परमेश्वरं वलिसे नवाःगु व थाय्यागु नां बेथेल तल।
बेन्यामीन बूगु व राहेल सीगु
16 इपिं बेथेलं वन। एप्रात थ्यनी थें च्वंकाः राहेलयात मचा बुइ ब्यथा जुल।
17 वयात तसकं ब्यथा जुयाच्वंबलय् दिरिअजिं वयात धाल-- “ग्याये मते, हाकनं काय् हे बुल।”
18 राहेलं थः सीगु सीकाः सी न्ह्यः वं मचायागु नां बेन–ओनी तल। बौम्हं धाःसा वयागु नां बेन्यामीन तयाबिल।
19 राहेल सित। वयात एप्रात वनेगु लँ सिथय् थुनाबिल। थ्व थाय्यात थौंकन्हय् बेथलेहेम धाइ।
20 याकूबं वयात थुंगु थासय् ल्वहं छगः धंकाबिल। थ्व आःतकं राहेलयात थुंगु थां कथं दनि।
21 व अनं वन। वं मिग्दल-एदेरया मेखे पाखे थःगु पाल ग्वल।
22 याकूब अन हे च्वनाच्वंबलय् रूबेन थः बौया मथ्याःम्ह कलाः बिल्हालिसे द्यन। याकूबं थ्व खँ सिल।
याकूबया काय्पिं
याकूबया झिंनिम्ह काय् दु --
23 लेआया पाखें -- दक्वसिबय् तःधिम्ह रूबेन, अले शिमियोन, लेवी, यहूदा, इस्साखार व जबूलून।
24 राहेलया पाखें-- योसेफ व बेन्यामीन।
25 राहेलया दासी बिल्हापाखें-- दान व नप्ताली।
26 लेआया दासी जिल्पापाखें -- गाद व आशेर।
थुपिं फुक्क याकूब पद्दन-आरामय् च्वनाच्वंबलय् हे बूपिं खः।
27 याकूब मम्रेय् थः बौ इसहाकयाथाय् लिहां वल। थ्वयात किर्यत-अर्बा व हेब्रोन नं धाः। अब्राहाम व इसहाक पिनें वयाः थन हे च्वंगु खः।
28 इसहाक सच्छि व चय्दँ दुबलय् सित।
29 व तसकं बुह्रा जुयाः मन्त अले थः बौ तापाःबाज्यापिं नाप च्वंवन। वयात वया काय्पिं एसाव व याकूबं थुन।