7
खुसिबाः वःगु
1 अले परमप्रभुं नोआयात धयादिल-- “छ व छिमि परिवार फुक्क जहाजय् च्वंहुँ। जिं थ्व पुस्ताय् छ हे छम्ह जक धर्मीम्ह मनू खना।
2 शुद्धपिं फुक्क पशु भाले-पोथी यानाः न्हय्ज्वः न्हय्ज्वः व अशुद्धपिं पशु छज्वः छज्वः जक यंकि।
3 अथे हे फुक्क जातयापिं झंगः नं भाले-पोथी यानाः न्हय्ज्वः न्हय्ज्वः यंकि। थुकथं फुक्क जातयापिं झंगःयात पृथ्वीइ ल्यंकातयेत थुमित म्वाकातयेमाः।
4 थनिं न्हय्न्हु लिपा जिं पृथ्वीइ वा वय्के। थ्व वा पीन्हु व पीचा तक वइ। जिं दय्कापिं पृथ्वीइ च्वंपिं फुक्कसित न्हंकाछ्वये।”
5 नोआं परमप्रभुं धाःथें फुक्कं यात।
6 पृथ्वीइ खुसिबाः वःबलय् नोआ ६०० दँ दुम्ह खः।
7 नोआ, वया कलाः, काय्पिं व भौपिं लखं बचय् जुइत जहाजय् दुहां वन।
8 शुद्धपिं व अशुद्धपिं पशु, झंगः, बँय् घिस्रय् जुयाजुइपिं फुक्कं
9 परमेश्वरं धाःथें भाले-पोथी यानाः छज्वः छज्वः नोआलिसें जहाजय् वन।
10 न्हय्न्हु दुखुन्हु वा वल।
11 पृथ्वीया तःलय् च्वंगु लःया फुक्क धाः बँ तछ्यानाः पिहां वःबलय् नोआ ६०० दँ क्यनाच्वंगु खः। सर्गः झ्याः थें चालावन,
12 अले पीन्हु व पीचा तक वा वयाच्वन। थ्व फुक्क उगु दँया निगूगु लाया झिंन्हय्न्हुखुन्हुनिसें शुरु जूगु खः।
13 उखुन्हु हे नोआ व वया कलाः स्वम्ह काय्पिं शेम, हाम व येपेत व इमि कलाःपिन्त ज्वनाः जहाजय् दुहां वन।
14 इपिंलिसें फुक्क जातयापिं पशु, लहीपिं व जंगली फुक्क जातयापिं पशु, पृथ्वीइ घिस्रय्जुयाजुइपिं व फुक्क जातयापिं झंगः नं दुहां वन।
15 सासः ल्हाइपिं फुक्क प्राणीत भाले-प्वथि यानाः जहाजय् नोआयाथाय् वल।
16 परमेश्वरं नोआयात धयादीथेंयापिं फुक्क प्राणी भाले-प्वथि यानाः जहाजय् दुहां वल। अले परमप्रभुं जहाजया खापा तिनादिल।
17 पीन्हु तक वा व खुसिबाः वयाच्वन। अले लः तजाः जुयाः जहाजयात च्वय् च्वय् छ्वल।
18 लः तसकं तजाः जुयाः जहाज ल्यहें ल्यहें पुल।
19 पृथ्वी स्वयां च्वय् च्वय् थ्यंक लः तजाः जुल, अले ततःजाःगु गुँत नापं त्वपुल।
20 लः तजाः जुयाः गुँत स्वयाः झिंन्याकु च्वय् थ्यंक थाहां वन।
21 पृथ्वीइ च्वंपिं झंगः, छेँय् लहीपिं, जंगलय् च्वनिपिं, बँय् घिस्रय् जुयाजुइपिं पशु व मनूत, फुक्क प्राणी सित।
22 पृथ्वीइ च्वंपिं सासः ल्हाइपिं फुक्क प्राणी सित।
23 परमप्रभुं पृथ्वीइ च्वंपिं फुक्क मनू, छेँय् लहीपिं, बँय् घिस्रय् जुयाजुइपिं पशु व झंगः न्हंकादिल। नोआ व नोआलिसे जहाजय् दुपिं प्राणीत जक ल्यन।
24 पृथ्वी सच्छि व न्येय्न्हु तक लखं जायाच्वन।