4
झासु लनेगु ई वइतिनि
1 थथे झासु लंके बियादी धकाः परमेश्वरं पाफयादीगु झीगु निंतिं नं खः। उकिं होश या, छिपिं मध्ये सुं नं झासु लने मखंकाः च्वने म्वाःले मा।
2 तापाःबाज्यापिन्सं थें झीसं नं भिंगु खँ न्यना तयागु दु। भिंगु खँ न्यंसां इमित थुकिं छुं नं भिं मजुल, छाय्धाःसा इमिसं न्यंगु खँयात विश्वास मयाः।
3 अय्नं झीसं परमेश्वरयात विश्वास याना च्वनागुलिं झीपिं वय्कः नाप च्वनाः आराम काये खनीतिनि। विश्वास मयाःपिन्त वय्कलं थथे धयादीगु दु --
“उकिं जिं तमं पाफयाः धया --
‘छिपिं जिगु झासु लनेगु थासय्
गुबलें दुहां वय् फइ मखु।’ ”
संसारया सृष्टि याये धुंकूबलय् निसें हे परमेश्वरया फुक्क ज्या सिधय् धुंकूसां वय्कलं थथे धयादिल --
4 धर्मशास्त्रय् न्हय्न्हुखुन्हुया खँय् थुकथं च्वया तःगु दु -- “न्हय्न्हुखुन्हुया फुक्क ज्या सिधय्काः परमेश्वरं झासु लनादिल।”
5 थ्व हे खँ वय्कलं हानं झी तापाःबाज्यापिन्त थुकथं धयादिल -- “छिपिं जिगु झासु लनेगु थासय् गुबलें दुहां वये फइ मखु।”
6 दकलय् न्हापालाक भिंगु खँ न्यंपिं मनूतय्सं परमेश्वरयात विश्वास मयाःगुलिं इमिसं झासु लने मखन। अय्नं गुलिसिनं धाःसा थुकथं झासु लने खनीतिनि।
7 अय्जूगुलिं परमेश्वरं झीत हानं “थौं” धकाः मौका बियादीगु दु। दाऊदयापाखें नं वय्कलं थ्व हे खँ धाय्कादीगु खः --
“थौं छिमिसं परमेश्वरयागु सः
ताल धाःसा
छिपिं जिद्दि जुइ मते।”
8 यहोशूं इस्राएली मनूतय्त झासु लंके ब्यूगु जूसा वय्कलं हानं “मेगु दिनयागु” खँ धाय्कादी मखुगु।
9 अय्जूगुलिं परमेश्वरं विश्वासीतय्गु निंतिं झासु लनेगु ई बियादीगु दु।
10 गथे सृष्टि यानादी धुंकाः वय्कलं झासु लनादिल, अथे हे झासु लने थ्याःम्ह मनुखं नं वय्कलं थें ज्या याये म्वायेक झासु लने खनी।
11 थथे जूगुलिं झीसं नं फक्व कुतः यानाः झासु लने थाय् वनेगु स्वये माल। तापाःबाज्यापिन्सं वय्कःयात मानय् मयाःगुलिं वय्कः नाप झासु लने मखन, उकिं झीसं नं इमिसं थें याये मज्यू।
12 परमेश्वरयागु वचन ज्या याना तुं च्वनिगु व जीवन बीगु खः। थ्व निखें धाः दुगु तरवार स्वयाः नं ज्वः, थ्वं दुने थ्यंक वनाः प्राण व आत्मायात छुतय् यानाबी, साहाः व स्यःयात छुतय् यानाबी। अले मनूतय्गु नुगलय् च्वंगु खँ व इच्छायात ल्ययाः जाँचय् याइ।
13 परमेश्वरं मखंगु छुं हे मदु। सृष्टियागु फुक्क खँ वय्कलं खं। थ्व हे परमेश्वरयात झीसं थःथःगु ल्याःचाः बी माः।
दकलय् तःधंम्ह पुजाहारी येशू हे खः
14 स्वर्गय् झायादीम्ह परमेश्वरया काय् येशू हे झी दक्वसिबय् तःधंम्ह पुजाहारी जूगुलिं झीसं मानय् यानाः वयागु विश्वासयात अज्जं क्वात्तुकाच्वने माः।
15 झी दकलय् तःधंम्ह पुजाहारी झी बमलाइबलय् छुं याये मफुम्ह मखु, बरु झीत थें वय्कःयात नं फुक्क खँय् शैतानं जाँचय् यात, अय्सां वय्कलं पाप यानामदी।
16 अय्जूगुलिं झीपिं भचा हे मग्यासे परमेश्वरया सिंहासनया न्ह्यःने वने नु। अले वय्कलं झीत दया यानाः माःबलय् माःकथं झीत ग्वाहालि यानादी।