4
परमप्रभुं इस्राएलीतय्त द्वपं ब्यूगु
1 अय् इस्राएलीत, परमप्रभुया वचन न्यँ!
छाय्धाःसा थ्व देशय् च्वंपिन्त परमप्रभुया द्वपं दु –
“थ्व देशय् विश्वास याये बहसू मदु।
सदां दइगु दयामाया मदु,
व परमेश्वरया बारे ज्ञान नं मदु।
2 थन सराः बीगु, मखुगु खँ ल्हायेगु, मनूया ज्यान कायेगु,
खुयाकायेगु, व्यभिचार यायेगु ज्या जक जुइ।
छिमिगु मभिंगु ज्या झन अप्वया वनी,
छगूया ल्यू मेगु स्यायेगु ज्या जुया हे च्वनी।
3 अथे जुयाः थ्व देशं नुगः मछिंकी,
थन च्वनीपिं दक्व मनूतनापं पशुत,
आकाशय् ब्वइपिं झंगःत
व समुद्रय् च्वनीपिं न्यात नं नाश जुइ।
4 “सुनानं सुयातं द्वपं बी मते
व ब्वःबी मते,
छाय्धाःसा छिमि मनूत
पुजाहारीतय्त दोष बीपिं थें च्वं।
5 छिपिं चान्हि लुफिं हाइ।
अगमवक्तात नं छिपिंनापं हे लुफिं हाइ।
जिं छिमि मां इस्राएलयात नाश याये।
6 जिमि प्रजा जिगु ज्ञान मदुगुलिं नाश जुल।
“छिमिसं ज्ञानयात हेला याःगुलिं
जिं नं छिमित थः पुजाहारीया ज्याय् तये मखु।
छिमिसं थः परमेश्वरया ब्यवस्थायात त्वःतूगुलिं,
जिं नं छिमि काय् म्ह्याय्पिन्त त्वःताबी।
7 गुलि गुलि पुजाहारीया ल्याः अप्वयावल,
उलि हे अप्वः इमिसं जिगु विरोधय् पाप याना हल।
अथे जुयाः जिं छिमिगु मान इज्जतयात लज्याय् हिलाबी।
8 मनूतय्सं हःगु शुद्ध जुइगु बलित पुजाहारीतय्सं नइ।
उकिं मनूतय्सं पाप याइबलय् पुजाहारीत लय्ताइ।
9 पुजाहारीतय्सं नं मनूतय्सं थें सजाँय फयेमाली।
जिं इमित सजाँय बी अले इमिसं थःम्हं याःगु
मभिंगु ज्याया लिच्वः जिं इमित बी।
10 “इमिसं न ला नइ तर लुधनी मखु।
इमिसं व्यभिचार याइ तर इमिगु ल्याः अप्वइ मखु,
छाय्धाःसा इमिसं परमप्रभुयात त्वःतूगु दु,
11 वेश्या ज्याय् मन बीत, दाखमद्य व न्हूगु दाखमद्यं यानाः
जिमि मनूतय्गु दुग्यां मदया वःगु दु।
12 इमिसं थःगु सिँया मूर्तिनापं सल्लाह काइ,
इमिसं सिँया कथिं लिसः काइ,
वेश्या ज्या याइगु आत्मां मखुगु लँय् यंकी,
अले इपिं परमेश्वर प्रति विश्वास यायेबहः जुइ मखु।
13 इमिसं पहाडया च्वकाय् च्वकाय् बलि छाइ
अले डाँडाय् डाँडाय् बांलाक किचः वइगु तःतमागु,
न्यनावंगु सिमाया क्वय् धुपाँय् च्याकी।
अथे जुयाः छिमि म्ह्याय्पिं बांमलाक स्यन,
अले छिमि भौपिंन्सं व्यभिचार याना जुल।
14 “छिमि म्ह्याय्पिं वेश्याया ज्या याना जूसां
जिं छिमि म्ह्याय्पिन्त सजाँय बी मखु,
व्यभिचार ज्या याइबलय्
जिं छिमि भौपिन्त सजाँय बी मखु,
छाय्धाःसा मिजंपिं नं थः हे द्यःतय्थाय् वेश्यातनापं द्यनी
अले इपिंनापं मिलय् जुयाः मूर्तितय्त बलि छाइ,
अथे जुयाः दुग्यां मदुपिं मनूत नाश जुइ।
15 “अय् इस्राएल, छं व्यभिचार याःसां नं
यहूदा दोषी मजुइमा।”
“छिपिं गिलगालय् वने मते
बेथ-आवनय् नं वने मते,
अले म्वानाच्वंम्ह परमप्रभुयात साक्षी तयाः पाफये मते।
16 इस्राएली मनूत मचाःम्ह सा थें अतेरि खः।
अले गथे यानाः परमप्रभुं तःधंगु ख्यलय्
इमित चीधिकःम्ह भ्याःचा थें ज्वये फइ?
17 एफ्राइम मूर्तितय्गु पासा जूगु दु।
इमित थःगु हे इच्छाय् त्वःताछ्व।”
18 इमिगु मद्य फुनावंसा इमिसं वेश्या ज्या याना हे च्वनी।
इमिगु शासकतय्सं इज्जत स्वयाः
बेइज्जत हे यय्काच्वनी।
19 फसं पुइकायंकू थें इमित पुइकायंकी,
अले मूर्तितय्गु न्ह्यःने बलि छाःगुया कारणं हे इपिं लाजय् च्वनेमाली।