9
लिपाया जुजु
1 अथेसां संकटय् लाःपिनिगु निंतिं थ्व खिउँगु दयाच्वनी मखु, न्हापा ला वय्कलं जबूलून व नप्ताली कुलतय् देशयात क्वह्यंकादिल, तर लिपा वय्कलं यर्दन खुसि व समुद्र दथुइ लाःगु यहूदीमखुपिं च्वनाच्वंगु गालीलयात हनाबना याइ।
2 थ्व तसकं खिउँथाय् न्यासि जुइपिं मनूतय्सं
छगू तःधंगु जः खनीतिनि।
तसकं खिउँगु देशय् च्वनाच्वंपिन्सं नं
थ्व तःधंगु जः स्वइतिनि।
3 छिं उपिं जातितय्त अप्वय्कादीगु दु,
अले छिं इमिगु आनन्दयात नं अप्वय्कादीगु दु,
अन्न मुंकीबलय् मनूत लय्ता थें
व लुतय् यानाहःगु माल इनाकाइबलय् लय्ता थें इपिं लय्ताःगु दु।
4 छाय्धाःसा छिं इमिगु जुवा
व ब्वहलय् च्वंगु कथियात,
इमित अत्याचार याःपिनिगु तुतांयात त्वथुलादीगु दु।
अले इमित मिद्यानया सिपाइँतय्त बुकु थें
छिं थः प्रजायात अत्याचार याःपिन्त व क्वत्यलातःपिन्त बुकादीगु दु।
5 लडाइँलय् सिपाइँतय्सं छ्यःगु
फुक्क लाकां व हि क्यूगु वसःत मि छ्वय्का छ्वइगु जुइ।
6 छाय्धाःसा झीगु निंतिं छम्ह मचा बूगु दु।
झीगु निंतिं छम्ह काय् ब्यूगु दु।
वं हे झीत राज्य याइ।
वय्कःया नां
“तसकं अजू चाइपुसे च्वंम्ह सल्लाहकार,” “शक्ति दुम्ह परमेश्वर,”
“सदांयाम्ह अबु,” “शान्तिया राजकुमार” जुइ।
7 वय्कःया शासन न्ह्याबलें दयाच्वनी,
वय्कःया शान्तिया अन्त्य गुब्सं जुइ मखु।
दाऊद जुजुया लिपा वइम्ह जुजु वय्कः हे खः।
न्याय व धर्मया निंतिं धिसिलाक्क दना
थनिंनिसें सदांया निंतिं राज्य यानादी।
दक्व शक्ति दुम्ह परमप्रभुया जोशं थ्व पूवनी।
इस्राएलीतय्त परमप्रभुया दण्ड
8 परमप्रभुं इस्राएल राज्ययात,
याकूबया सन्तानतय्त दण्ड बीगु आज्ञा यानादीगु दु।
9 इस्राएलया फुक्क मनूत
व सामरिया शहरय् च्वंपिं फुक्कसिनं थ्व आज्ञा न्यनी।
आः ला इपिं घमण्डी
व मभिंपिं खः, इमिसं धाइ,
10 “अप्पात कुतुं वंगु दु,
तर जिमिसं कियातःगु ल्वहँतं छेँ दय्के।
यःमरिमायात पालाब्यूगु दु
तर जिमिसं उकिया पलेसा देवदारु तये।”
11 तर परमप्रभुं इमिगु विरोधय् रसीनया शत्रुतय्त बल्लाकादीगु दु,
अले इमि शत्रुतय्त ग्वाकादीगु दु।
12 अरामीतय्सं पुर्बपाखें व पलिश्तीतय्सं पच्छिमपाखें
म्हुतु चाय्काः इस्राएलयात घुतुकुगु दु।
अज्ज नं वय्कःया तं क्वलाःगु मदुनि,
अले वय्कःया ल्हाः ल्ह्वनातःगु हे दनि।
13 तर मनूत इमित कय्कूम्ह मनूपाखे लिहां वःगु मदुनि,
न इमिसं दक्व शक्ति दुम्ह परमप्रभुयात माःगु दु।
14 उकिं परमप्रभुं इस्राएलं छ्यं व न्हिप्यं खजूरया कचा
व तिंकथि छन्हुं हे ध्यनादी।
15 थकालिपिं व हनेबहःपिं मनूत छ्यं खः,
अले मखुगु खँ स्यनीपिं अगमवक्तात न्हिप्यं खः।
16 थुपिं मनूतय् नायःतय्सं इमित मखुगु लँय् यंकूगु दु
अले इमित इतिमिति कंका ब्यूगु दु।
17 उकिं इमि ल्याय्म्हपिं मनूत खनाः परमप्रभु लय्तायामदी,
न वय्कलं इमि मां बौ मदुपिं व भाःत मदुपिन्त माया यानादी।
छाय्धाःसा फुक्क मनूत परमेश्वरयात मानय् मयाइपिं व दुष्ट खः।
सकसिगु म्हुतुं मभिंगु खँ पिहां वइ।
अज्ज नं वय्कःया तं क्वलाःगु मदुनि,
अले वय्कःया ल्हाः ल्ह्वनातःगु हे दनि।
18 धात्थें हे मि थें दुष्टता च्याइ,
उकिं सिउँडी व कंयात भस्म याइ।
उकिं गुँयागु झाःतय्त च्याकी,
अले उपिं कुँत्याः जुयाः च्वय् पाखे चाचाःहिलाः थाहां वनी।
19 दक्व शक्ति दुम्ह परमप्रभुया तमं
देश भस्म जुइ।
मनूत नं मियागु निंतिं इन्धन जुइ।
सुं मनुखं थः किजायात तकं त्वःती मखु।
20 जवपाखे इमिसं क्वाप्प नइ
अय्नं नयेपित्याःम्ह जुया हे च्वनी।
इमिसं खवपाखे नइ, अय्नं लुधनी मखु।
सकसिनं थः मचातय्गु ला नइ,
21 मनश्शें एफ्राइमयात व एफ्राइमं मनश्शेयात नइ,
अले इपिं निथिं यहूदाया विरोधय् जुइ।
अज्ज नं वय्कःया तं क्वलाःगु मदुनि,
अले वय्कःया ल्हाः ल्ह्वनातःगु हे दनि।