3
जाति जातितय्गु न्याय
1 परमप्रभुं धयादी, “उगु दिनय् व उबलय् हे
जिं यहूदा व यरूशलेमयापिं मनूतय्त हाकनं भिं यानाबी।
2 उबले जिं सकल जातितय्त छथाय् मुंकाः
यहोशापातया बेँसीइ यंके।
अन हे जिं उपिं जातितय्त न्याय याये,
छाय्धाःसा इमिसं जिमि प्रजा, जिगु उत्तराधिकारी इस्राएलयात
जाति जातितय् दथुइ छ्यालब्याल यानाबिल,
अले जिगु देशयात ब्वथला बिल।
3 इमिसं जिमि प्रजाया निंतिं चिट्ठा तल,
अले वेश्याया पलेसा छम्ह मिजंमचा बिल,
छम्ह मिसामचा मियाः दाखमद्य त्वन।
4 “हे टुरोस, सीदोन व पलिश्तीया फुक्क लागाय् च्वंपिं मनूत, जिनापं छिमिगु छु ज्या दु? छु छिमिसं जिं यानागु ज्यायागु पलेसा जिके कायेत्यनागु खः ला? छिमिसं कायेत्यनागु खः धयागु जूसा, व जिं याकनं हे छिमिगु छेनय् प्वंकाबी।
5 छाय्धाःसा जिगु लुँ व वहः अले फुक्कं भिंगु सामान छिमिसं छिमिगु देगलय् यंकूगु दु।
6 छिमिसं यहूदाय् च्वंपिं मनूतय्त व यरूशलेमय् च्वंपि मनूतय्त इमिगु देशं तापाक्क छ्वयेत ग्रीकतय्गु ल्हातय् मियाछ्वःगु दु।
7 “अथे जुयाः न्यँ, छिमिसं इमित म्यूगु थासं जिं इमित लिकया हये, अले छिमिसं ब्यूगु पलेसा छिमिगु छेनय् हे प्वंकाबी।
8 छिमि काय् म्ह्याय्पिन्त जिं यहूदाया मनूतय्गु ल्हातय् मियाबी। इमिसं थुमित तापाक च्वंपिं छगू जाति शबायापिं मनूतय्त मियाबी,” परमप्रभुं धयादीगु दु।
9 जाति जातितय्गु दथुइ थथे धकाः घोषणा या,
लडाइँ यायेत तयार जु!
बहादुर सिपाइँतय्त न्यंकि!
दक्व सिपाइँतय्त मुंकि अले हमला या।
10 छिमिगु हलोया फालीतय्त दायाः तरवार दय्कि
अले छिमिगु ईंचायात दायाः भाला दय्कि।
बम्लाःपिन्सं थथे धायेमा,
“जि बल्ला।”
11 हे प्यखेरं च्वंपि जातित, याकनं वा,
अले छिपिं सकलें छथाय् हे मुँ।
हे परमप्रभु, छिं थः शुरवीरतय्त अन हयादिसँ।
12 “जातित सुरय् जुयाः
यहोशापातया बेँसीइ वयेमा,
छाय्धाःसा जिं अन हे
प्यखेरं च्वंपिं जातितय्गु न्याय यायेत फेतुये।
13 इँचा संकि, छाय्धाःसा छ्व लय्गु ई जुइ धुंकल।
वा, दाखयात न्हुत्तुन्हु,
छाय्धाःसा दाखतिसिगु थाय् जाये धुंकल,
दाखति तइगु गाः जायाः भय्भय् बिल।
इपिं तसकं मभिंना वने धुंकल।”
14 न्याय याइगु बेँसीइ
ग्वाः ग्वाः मनूत मुनाच्वंगु दु,
छाय्धाःसा न्याय याइगु बेँसीइ
परमप्रभुया दिं न्ह्यःने हे थ्यंकः वःगु दु।
15 सूर्य व तिमिला खिउँसे च्वनी,
अले नगु थी मखु।
16 परमप्रभु सियोनं तस्सलं हालादी।
वय्कःया सः यरूशलेमं वःगु नँ न्याःगु सः थें च्वं।
आकाश व पृथ्वी थुरथुर खाइ।
परमप्रभु धासाः थः प्रजाया निंतिं शरण कायेगु थाय्
व इस्राएलया मनूतय्गु निंतिं किल्ला जुयादी।
परमप्रभुया मनूतय्त सुवाः
17 “अले पवित्र पर्वत सियोनय् च्वनीम्ह परमप्रभु
छिमि परमेश्वर जि हे खः धकाः छिमिसं सीका काइ।
अले यरूशलेम पवित्र जुइ,
विदेशीतय्सं हानं गुबलें थन हमला याःवइ मखु।
18 “व दिंखुन्हु पहाडं तसकं साःगु दाखमद्य ज्वया वइ।
अले डाँडाय् दुरु बाः वइ।
यहूदाया फुक्कं खुसिचाय् लः बा वइ।
परमप्रभुया देगलय् लःया मूल तज्यानाः लः पिहां वयाः
शित्तीमया बेँसीयात प्याकी।
19 तर यहूदाय् च्वंपिं मनूतय्त अत्याचार याःगुलिं
व द्वंमदुपिनिगु हि बाः वय्कूगुलिं,
मिश्र देश उजाड जुइ
व एदोम छुं बुया मवइगु मरुभूमि जुयावनी।
20 यहूदा न्ह्याबलेंया निंतिं
व यरूशलेम पुस्ता पुस्ता तकं हे मनूतय्गु लागि च्वनेगु थाय् जुयाच्वनी।
21 जिं क्षमा मयानानीगु इमिगु हिया दोष,
जिं क्षमा यानाबी।”
परमप्रभु सियोनय् च्वनादी।