12
यर्मियाया बिन्ति
1 हे परमप्रभु, जिं छिथाय् मुद्दा हइबलय्
छिं न्ह्याबलें जितः न्याय बियादीगु दु।
अय्नं जितः छिनापं छिगु इन्साफया बारे खँ ल्हाये मास्ति वः।
दुष्टत छाय् अपाय्सकं जियावःगु?
मभिंपिं मनूत छाय् याउँक म्वानाच्वंगु?
2 छिं इमित पिनादिल, इमिसं हा नं काःगु दु,
इपिं थाहां वइ अले फल नं बी।
इमिगु म्हुतुइ छिगु नां ला दु,
तर इमिगु मन छिपाखें तापाः।
3 तर हे परमप्रभु, छिं ला जितः म्हस्यू।
छिं जितः खं, छिं जिगु मनयात जाँचय् यानादी।
स्यायेत यंकीपिं फैतय्त थें इमित साला यंकादिसँ!
स्याइगु दिंया लागि इमित अलग तयादिसँ!
4 देशय् गुबलय् तक वा मवयाच्वनीगु?
ख्यलय् च्वंगु घाँय् गुबलय् तक गनाः सुकूचिना च्वनीगु?
देशय् च्वंपिं मनूतय्सं याःगु मभिंगु ज्याया कारणं
पशुत व झंगःत फुक्क नाश जुइ धुंकल।
छाय्धाःसा मनूतय्सं
“झीत छु जुइ, वय्कलं खनी मखु” धयाच्वंगु दु।
परमेश्वरया लिसः
5 “मनूतलिसें ब्वांय् वनाः हे छ त्यानुचाल धाःसा
छ गथे यानाः सलतनापं ब्वांय् वने फइ?
छ सुरक्षित थासय् हे क्वदल धाःसा
यर्दन लिक्कया झालय् छं छु यायेगु?
6 छिमि दाजुकिजापिं, छंगु थःगु हे परिवारं हे छन्त झंगःलाःगु दु।
इपिं छंगु विरोधय् तःसलं हाला वयाच्वंगु दु।
इमिसं छलिसें नाइक खँल्हासां
छं इमित पत्याः याये मते!
7 “जिं जिमि मनूत इस्राएलयात त्वःताबी।
जिगु सर्बय जिं वांछ्वयाबी।
जितः यःम्हय्सित
जिं वया शत्रुतय्गु ल्हातय् बी।
8 जि थः मनूत जिगु लागिं गुँयाम्ह सिंह थें जूगु दु।
इपिं जितः स्वयाः गर्जय् जूगु दु, उकिं जितः इपिं मयः।
9 छु जिगु सर्बय जिगु लागि
शिकारी झंगःतय्सं घेरय् यानातःम्ह फुतिफुति दुम्ह शिकारी झंगः थें जूगु मदु ला?
हुँ, ख्यलय् च्वंपिं फुक्क पशुतय्त मुंकि।
अले वयात नयेत सःताः हजि!
10 यक्व फैजवाःतय्सं जिगु दाखया क्यबयात स्यंकाब्यूगु दु।
इमिसं जिगु बुँयात न्हुत्तुन्हुगु दु,
इमिसं जिगु न्ह्याइपुगु बुँयात मरुभूमि थें
छुं नं मसइगु थाय् यानाब्यूगु दु।
11 इमिसं थुकियात ज्याख्यलय् मजूगु जमिन दय्काब्यूगु दु।
व जिगु न्ह्यःने गंगु व झिजांमिजां दंगुथाय् जूगु दु।
देशया फुक्क थाय् मरुभूमिइ जूगु दु,
सुनां उकियागु वास्ता मयाः।
12 मरुभूमियागु फुक्क नांगा डाँडाय् नाश याइपिं थाहां वःगु दु।
परमप्रभुयागु तरवारं देशयागु छगू कुन्चांनिसें मेगु कुन्चा तक नाश याइ,
अले सुं नं सुरक्षित जुइ मखु।
13 इमिसं छ्व ह्वल, तर कं बुल।
इमिसं दुःख सियाः ज्या यात,
तर इमित छुं फाइदा मदु।
जि तसकं तंम्वयागुलिं इमिगु बाली मदुगु जुयाः इपिं मछाले माल।”
इस्राएलया जःलाखःला देशतय्त परमप्रभुया बुखँ
14 परमप्रभुं थथे धयादी, “जि थः प्रजा इस्राएलयात अधिकार यायेत बियागु देश कब्जा याःपिं जिम्ह दुष्ट जःलाखःलातय्त जिं थम्हं हे सिमायात थें लिनाकयाः इमिगु देशं पितिनाछ्वये। यहूदाया घरानायात नं जिं इमिगु दथुं लिनाकाये।
15 तर इमित जिं लिनाकाये धुंकाः हाकनं जि लिहां वये अले इपिं सकसितं दया याये। जिं इमित इमि पुर्खाया देशय् लित हये।
16 इमिसं न्हापा जि प्रजायात बालद्यःया नामं पाफयेगु स्यं थें ‘धात्थें परमप्रभु म्वाःम्ह खः’ धयाः जिगु नां कयाः पाफयाः जिगु प्रजाया पहःचहः धात्थें हे बांलाक सयेकाकाल धाःसा इमित जि प्रजाया दथुइ थाय् बी।
17 तर गुगु जातिं जिगु आज्ञा पालन याइ मखु जिं उगु जातियात लिनाकयाः नाश याये।”
परमप्रभुं धयादी।