23
योशियाहं मूर्ति पुजा मदयेकाछ्वःगु
२ इति ३४:३-७,२९-३३
1 जुजुं यहूदा व यरूशलेमयापिं फुक्क थकालितय्त सःतके छ्वत।
2 अले जुजु परमप्रभुया देगलय् वन। वनापं यहूदायापिं मनूत, यरूशलेमयापिं मनूत, पुजाहारीत व अगमवक्तात, चिधंपिंनिसें तःधंपिं फुक्क मनूत दु। अले वं परमप्रभुया देगलय् लुयावःगु सफुलिइ च्वयातःगु फुक्क खँ इमित ब्वना न्यंकल।
3 जुजुं थांया लिक्क दनाः “जि परमप्रभुया ल्यू वने, वय्कःया आज्ञा, विधि व नियम तनमन बियाः पालन याये अले थ्व सफुलिइ च्वयातःगु खँ पूवंके धकाः बाचा चिल।” फुक्क मनूतय्सं नं थथे धकाः हे बाचा चिल।
4 जुजुं दकलय् तःधंम्ह पुजाहारी हिल्कियाह, पुजाहारीत व लुखा पिवाःतय्त परमप्रभुया देगलय् दुगु बालद्यः, अशेरा द्यःमय्जु व आकाशया नगुतय्गु लागि दय्कूगु थलबल ज्वना वा धकाः उजं बिल। वं उपिं फुक्क थलबलयात यरूशलेमया पिने, किद्रोनया ब्यासिइ यंकाः छ्वयेकाबिल अले नौ बेथेलय् यंकल।
5 अले वं यहूदाया जुजुपिन्सं यहूदाया शहर शहरय् व यरूशलेमया लिक्क लाःगु पुजा याइगु थासय् बालद्यः, सूर्य, तिमिला, नगुतय्गु लागि धुपाँय् च्याकेत यहूदायापिं जुजुपिन्सं ल्ययातःपिं द्यःपालातय्त लिकाल।
6 वं परमप्रभुया देगलं अशेरा द्यःमय्जुया थां लिकयाः यरूशलेमया पिने किद्रोन ब्यासिइ यंकाः अन हे छ्वयेकाबिल। अले उकियात चुंचुं यानाः साधारण मनूतय्गु चिहानय् ह्वलाबिल।
7 वं परमप्रभुया देगलय् दुने दुगु मिजं वेश्यात च्वनीगु छेँ थुनाबिल। अन मिसातय्सं अशेरा द्यःमय्जुया लागि पर्दा थाइगु खः।
8 योशियाहं यहूदाया फुक्क शहरय् च्वनिपिं पुजाहारीतय्त हल, अले द्यःपालातय्सं धुपाँय् च्याकीगु गेबांनिसें बेर्शबा तकया पुजा याइगु थाय्यात अशुद्ध यानाबिल। वं शहरया बडा-हाकिम यहोशूया ध्वाखाया लिक्क शहरया ध्वाखाय् दुगु देगःचात स्यंकाबिल। थ्व ध्वाखा शहरय् दुहां वनीगु ध्वाखाया खवपाखे दु।
9 थुपिं पुजा याइगु थाय्या पुजाहारीतय्सं यरूशलेमय् परमप्रभुया वेदीइ सेवा मयाः। तर इमिसं थः पुजाहारी पासापिंलिसें सोडा मदुगु मरि नइगु।
10 जुजु योशियाहं मोलोखया निंतिं सुनानं थःकाय् वा म्ह्याय्यात मिइ छाये मफयेमाः धकाः बेन-हिन्नोमया खोँचय् दुगु द्यःपुजा याइगु थाय् तोपेतयात अशुद्ध यानाबिल।
11 परमप्रभुया देगःया ध्वाखाय् यहूदाया जुजुपिन्सं सूर्यया पुजा यायेत नातान-मेलेक धाःम्ह छम्ह हाकिमया क्वथा लिक्क लाःगु चुकय् तयातःगु सलत चीकाछ्वल। अले सूर्ययात देछाःगु रथत योशियाहं छ्वयेकाबिल।
12 आहाजया छेँय् च्वय्च्वंगु क्वथाया लिक्क च्वंगु कःसिइ यहूदाया जुजुपिन्सं दय्कूगु वेदीत, अले परमप्रभुया देगलय् निगुलिं चुकय् मनश्शें दय्कूगु वेदीत वं थुनाबिल। वं उपिं वेदीयात चुंचुं यानाः किद्रोन ब्यासिइ वांछ्वयाबिल।
13 वं सोलोमन जुजुं यरूशलेमया पुर्बपाखे, बिनाशया डाँडाया दच्छिन कुन्चाय् सीदोनीतय् घच्चाइपूम्ह द्यःमय्जु अश्तोरेत, मोआबीतय् घच्चाइपूम्ह द्यः कमोश व अम्मोनीतय् घच्चाइपूम्ह द्यः मोलेखया निंतिं दय्कूगु पुजा याइगु थाय्त अशुद्ध यानाबिल।
14 योशियाह जुजुं पुजा याइगु ल्वहंया थांत कुचा कुचा यानाबिल। अशेरा द्यःमय्जुया थां पालाः क्वःथलाबिल। उगु थासय् सीपिं मनूतय्गु क्वँचं जाय्काबिल।
15 इस्राएलयात पाप याकूम्ह नबातया काय् यारोबामं दय्कूगु बेथेलय् दुगु पुजा याइगु थाय् व वेदी नं वं स्यंकाबिल। वं व पुजा याइगु थाय्यात छ्वयेकाबिल। उकियात चुंचुं यानाबिल। अशेरा द्यःमय्जुया थांयात नं छ्वयेकाबिल।
16 अनंलि योशियाहं थुखे उखे स्वल। डाँडाया लिक्क लाःगु चिहानत खनाः वं उपिं चिहानं क्वँय् लिकाकेबिल। अले उगु वेदीयात अशुद्ध यायेत क्वँय् अन हे छ्वयेकाबिल। थ्व खँया अगमवाणी याःम्ह परमेश्वरया मनूपाखें न्ववाःगु परमप्रभुया वचनकथं वं थ्व ज्या यात।
17 अले जुजुं न्यन, “जिं खनागु व थां छु खः लय् सा?”
अले शहरयापिं मनूतय्सं वयात धाल, “व ला यहूदां वयाः बेथेलया वेदीया विरोधय् छिं यानादीगु फुक्क ज्याया अगमवाणी याःम्ह परमेश्वरया मनूया चिहानया चिं खः।”
18 वं धाल, “अथे खःसा उकियात त्वःताब्यु। छिपिं सुनानं वयागु क्वँय्यात लिकाये मते।” उकिं इमिसं वयागु व सामरियां वःम्ह अगमवक्ताया क्वँय्यात अथें त्वःताबिल।
19 हानं इस्राएलया जुजुपिन्सं सामरियाया शहर शहरय् दय्कूगु पुजा याइगु थाय्त, गुकियात दय्काः इस्राएलयापिं जुजुपिन्सं परमप्रभुयात तंचायेकूगु खः, व फुक्कयात योशियाहं बेथेलय् याःगु थें क्वःथलाबिल अले अशुद्ध यानाबिल।
20 अनया पुजा याइगु थाय्यापिं फुक्क द्यःपालातय्त योशियाहं इमिगु वेदीइ स्यात अले वेदीइ वं इमिगु क्वँय् छ्वयेकल। अनंलि व यरूशलेमय् लिहां वल।
योशियाहं छुत्काराया नखः हंगु
२ इति ३५:१-१९
21 जुजुं फुक्क मनूतय्त थ्व उजं बिल, “परमप्रभु थः परमेश्वरया छुत्काराया नखः बाचाया सफुलिइ च्वया तः थें हँ।”
22 न्याय याइपिनिगु इलंनिसें अले इस्राएलयापिं जुजुपिं व यहूदाया जुजुपिनिगु इलंनिसें थुखे थज्याःगु छुत्काराया नखः गुबलें हंगु मदुनि।
23 तर योशियाह जुजु जूगु झिंच्यागूगु दँय् यरूशलेमय् परमप्रभुया निंतिं थ्व छुत्काराया नखः हन।
24 हानं परमप्रभुया देगलय् दकलय् तःधंम्ह पुजाहारी हिल्कियाहं लुइकूगु व्यवस्थाया सफुलिइ च्वयातःगु खँ पूवंकेत योशियाहं फुक्क तन्त्रमन्त्र याइपिं, बोक्सी ज्या याइपिं, छेँ द्यःत व मूर्तित अले यहूदा व यरूशलेमय् खनेदुगु फुक्क घचाइपुगु चिजयात मदयेका छ्वल।
25 दुनुगलंनिसें तनमन बियाः मोशायागु फुक्क आज्ञा पालन यानाः परमप्रभुपाखे अथे लिहां वःम्ह सुं नं जुजु योशियाह थें न्हापा वा लिपा दुगु मदुनि।
26 अय्नं मनश्शे जुजुया ज्यां यानाः यहूदाया विरोधय् पिहां वःगु परमप्रभुया तं आः तक नं क्वमला।
27 परमप्रभुं धयादिल, “गथे जिं इस्राएलयात पितिनाछ्वया, अथे हे यहूदायात नं जिं जिगु न्ह्यःनं पितिनाछ्वये। अले जिं ल्ययागु यरूशलेम शहर अले उगु देगः, गुकियागु बारे जिं अन ‘जिगु नां दइ धकाः धयागु खः,’ उकिया विरोधय् जिं ल्हाः ल्ह्वने।”
योशियाहया शासनया अन्त
२ इति ३५:२०–३६:१
28 योशियाह जुजु जुयाच्वंबलय् जूगु फुक्क खँ, वं याःगु फुक्क ज्या यहूदाया जुजुपिनिगु इतिहासया सफुलिइ च्वयातःगु दु।
29 योशियाह जुजु जुयाच्वंबलय् हे मिश्र देशयाम्ह जुजु फारो नेको अश्शूरयाम्ह जुजुयात ग्वाहालि यायेत यूफ्रटिस खुसि तक वन। योशियाह जुजु वलिसें लडाइँ यायेत न्ह्यज्यात। तर नेकोनं वलिसें लडाइँ यानाः वयात मगिद्दोय् स्यात।
30 योशियाहया च्यःतय्सं वयागु सीम्ह रथय् तयाः मगिद्दों यरूशलेमय् हल। वयात वयागु हे चिहानय् थुन। अनंलि देशयापिं मनूतय्सं योशियाहया काय् यहोआहाजयात अभिषेक यानाः वया बौया थासय् जुजु दय्कल।
यहूदायाम्ह जुजु यहोआहाज
२ इति ३६:२-४
31 यहोआहाज निइस्वदँ दुबलय् जुजु जुल। वं यरूशलेमय् स्वला राज्य यात। वया मांया नां यर्मियाया म्ह्याय् हमुतल खः। व लिब्नायाम्ह खः।
32 वं थः पुर्खातय्सं याःगु थें परमप्रभुयात मयःगु मभिंगु ज्या यात।
33 वं यरूशलेमय् शासन मयायेमा धकाः फारो नेकोनं वयात सिखलं चिनाः हमात देशया रिब्लाय् कुनाबिल। वं यहूदायात स्विप्यसः (३,४००) किलोग्राम वहः व स्विप्यंगू किलोग्राम (३४) लुँ कर पुइकल।
34 फारो नेकोनं योशियाहया मेम्ह काय् एल्याकीमयात वया बौया थासय् जुजु दय्कल। वयागु नां हिलाः यहोयाकीम तल। वं यहोआहाजयात धाःसा मिश्र देशय् यंकल। व अन हे सित।
35 फारो नेकों फ्वंगु लुँ व वहः पुलेत यहोयाकीमं देशयापिं मनूतय्के कर काल। देशयापिं मनूतय्के इमिगु हैसियत कथं वहः व लुँ वं फारोयात बीत कर काल।
यहूदायाम्ह जुजु यहोयाकीम
२ इति ३६:५-८
36 यहोयाकीम निइन्यादँ दुबलय् जुजु जुल, वं यरूशलेमय् झिंछदँ राज्य यात। वया मांया नां पदायाहया म्ह्याय् जबीदा खः। व रूमायाम्ह खः।
37 वं थः पुर्खातय्सं याःगु थें परमप्रभुयात मयःगु मभिंगु ज्या यात।