15
मेपिन्त याये माःगु वास्ता
1 थथे झी बल्लाःपिन्सं बमलाःपिन्त विश्वासी जुयाः म्वाना च्वनेत ग्वाहालि यायेमाः, झीत जक यःथें याना जुइ मज्यू।
2 झी फुक्कसिनं थः जःलाखःलापिन्त भिं जुइगु मतिइ तयेमाः, अले जक इमिगु विश्वास बल्लाना वइ।
3 मुक्ति बीम्ह ख्रीष्टं नं थःत यःथें याना मजूगु खँ धर्मशास्त्रय् थुकथं च्वयातःगु दु -- “छितः क्वह्यंकिपिन्सं जितः नं क्वह्यंकाहःगु दु।”
4 न्हापा न्हापा जूगु च्वयातःगु फुक्क खँ झीत स्यनेत खः। धर्मशास्त्रय् च्वयातःगु पाखें ग्वाहालि कयाः सह यानाच्वन धाःसा झीत आशा दइ।
5 सह याये फय्कादीम्ह अले ग्वाहालि बियादीम्ह परमेश्वरं छिपिं सकसिनं छप्पँ जुयाः येशू ख्रीष्टयागु लँपुइ वने फय्कादीमा।
6 थथे छिपिं फुक्कं छप्पँ जुयाः छगू हे सलं झी प्रभु येशू ख्रीष्टया बाः परमेश्वरयात जय जय याये फयेमा।
7 परमेश्वरयात जय जय यायेमा धकाः ख्रीष्टं छिमित नालादी थें तुं छिमिसं नं बल्लाःपिं व बमलाःपिं दाजुकिजापिन्त नाला कायेगु या।
8 जिं छिमित धाये -- परमेश्वर भरोसा याये बहःम्ह खः धकाः सीके बीत ख्रीष्ट हे यहूदीतय् च्यः थें जुयादिल। इमि तापाःबाज्यापिन्त बचं बियादीगुलिं
9 यहूदीमखुपिन्सं नं परमेश्वरं दया माया यानादीगुलिं वय्कःयात जय जय यायेमा धकाः ख्रीष्ट झायादीगु खः। धर्मशास्त्रय् नं थथे च्वयातःगु दु --
“यहूदीमखुपिं दुथाय् नं
जिं छितः जय जय याये
छिगु नां कयाः भजन हाले।”
10 धर्मशास्त्रय् नं थथे च्वयातःगु दु --
“हे जातित!
वय्कःया मनूत नाप
लय्ताया च्वँ।”
11 हानं थथे च्वयातःगु दु --
फुक्क यहूदीमखुपिन्सं नं
प्रभुयात जय जय या।
फुक्क जात जातियापिन्सं नं
म्ये हालाः
वय्कःया प्रशंसा या!
12 अले यशैयां नं थथे धाःगु दु --
“यिशैया सन्तान दइ,
वं यहूदीमखुपिन्त राज्य याइ।
अले इमिसं वय्कःयाके हे आशा तइ।”
13 छिमिसं विश्वास याःगुलिं भरोसा याये बहःम्ह परमेश्वरं छिमिगु नुगलय् आनन्द व शान्ति जाय्कादीमा। थुकथं पवित्र आत्मायागु शक्तिं छिमिगु आशा व भरोसा अप्वः दया वनेमा।
यहूदीमखुपिन्थाय् पावलं याःगु ज्या
14 यःपिं दाजुकिजापिं, छिपिं तसकं भिंपिं अले बुद्धिं जाःपिं जूगुलिं छम्हं मेम्हय्सित स्यनेकने याये फुगुलिं जि लुधं।
15 परमेश्वरं जितः दया माया यानाः अधिकार बियादीगुलिं छिमित हानं छुं मूखँ लुमंका बीत मग्यासे थथे च्वयाच्वना।
16 जितः यहूदीमखुपिन्त परमेश्वरयागु भिंगु खँ कनेत ख्रीष्ट येशूयाम्ह च्यः यानादीगुलिं पुजाहारीं छाःथें जिं नं परमेश्वरयात यःगु पवित्र आत्मां शुद्ध याना तःपिं यहूदीमखुपिन्त छाये हयागु दु।
17 थथे येशू ख्रीष्ट लिसे परमेश्वरया ज्या याये दुगुलिं जिगु छ्यं धस्वाः।
18 ख्रीष्टं जिगुपाखें यहूदीमखुपिन्त परमेश्वरयात मानय् याकेत यानादीगु वचन व ज्याखँ बाहेक मेगु खँ ल्हायेगु आँट जिं मयाना।
19 जिं अजूचायापुगु चिं व ज्या नं याना, पवित्र आत्मायागु शक्तिं यरूशलेमंनिसें इल्लुरिकन तक फुक्कभनं ख्रीष्टयागु भिंगु खँ न्यंकागु दु।
20 ख्रीष्टयागु नां मस्यूपिन्थाय् वनाः ख्रीष्टयागु भिंगु खँ न्यंकेगु जिगु इच्छा खः। मेपिन्सं जग स्वना तये धुंकूथाय् वनाः छेँ दनेथें मेपिन्सं न्यंका तये धुंकूथाय् वनाः हानं न्यंके मास्ति मवः।
21 थथे च्वयातःगु नं दु --
“वय्कःयागु खँ गुबलें हे मन्यनिपिन्सं
वय्कःयात खनी।
वय्कःयागु खँ गुबलें हे मताःनिपिन्सं
वय्कःयागु खँ थुइकी।”
पावलया रोमय् वनेगु ग्वसाः
22 थथे जुयाच्वंगुलिं तःकःमछि जि छिमिथाय् वये मास्ति वःसां वये मफुगु खः।
23 आः थन फुक्कभनं ज्या याये धुंगूलिं, अले यक्व दँ न्ह्यवंनिसें जि छिमिथाय् वये मास्ति वय्का च्वनागुलिं
24 स्पेनय् वनेत वयेबलय् लँपु लाकाः छिमित नाप लाः वये। छन्हु निन्हु जि छिमिथाय् हे च्वनेगु इच्छा दु, नापं स्पेनय् वनेत जितः छिमिसं छुं भचा ग्वाहालि बी धकाः जिं आशा यानागु दु।
25 आः धाःसा जि यरूशलेमय् विश्वासीतय्त ग्वाहालि यायेत वनेत्यना।
26 यरूशलेमय् च्वंपिं चीमिपिं विश्वासीतय्त ग्वाहालि बीत माकेडोनियाय् व अखैयाय् च्वंपिं मण्डलीयापिन्सं लय् तातां भेटी बिल।
27 इमिसं धाये म्वाय्क थःपिन्सं हे भेटी ब्यूगु खः। इमिसं थथे ग्वाहालि याये हे माः, छाय्धाःसा यहूदीतय्पाखें हे यहूदीमखुपिन्सं परमेश्वरया आशिष काये खंगु खः। अथे हे यहूदीमखुपिन्सं नं माल कि यहूदीतय्त ग्वाहालि यायेमाः।
28 थ्व ज्या सिधय्काः जिं कया हयागु चन्दा लः ल्हाना बी धुंकाः छिमित नापलानाः जि स्पेनय् वने।
29 जि छिमिथाय् वयेबलय् ख्रीष्टं बियादीगु यक्व आशिष नं ज्वनाः वये दइ धकाः जिं स्यू।
30 यःपिं दाजुकिजापिं, झी प्रभु येशू ख्रीष्टया नामं व पवित्र आत्मां बियादीगु मायां जिगु निंतिं जिलिसें मदिक्क परमेश्वरयात प्रार्थना याना ब्यु धकाः बिन्ति यानाच्वना।
31 यहूदियाय् च्वंपिं विश्वास मयाःपिं मनूतय्पाखें जि बचय् जुइमा धकाः व यरूशलेमय् जिगु सेवा अन च्वंपिं विश्वासीतय्त ययेमा धकाः परमेश्वरयात प्रार्थना या।
32 अले परमेश्वरयागु इच्छा दुसा जि लय्लय्तातां छिमिथाय् वये, अले छिपिं नाप आनन्दं च्वने।
33 शान्ति बियादीम्ह परमेश्वर छिपिं नाप दयेमा। आमेन।