3
Jesús iloac cache importönte que Moisés
1 Por inu, nocnihua yecteque, tli nuyejque Deus nemiechnutzque desde elfecac, xetieitztacö Jesús, öque iloac tlateotitlantle hua teopexque de lo que tli toneltoca.
2 Pues yejuatzi seme quecumplirojque lo que tli quenequihuaya Deus. Pues Deus tietlölejque para inu. Ejqueu nuyejque quechihuaya Moisés ipa noche tequetl tli quechihuaya ipa tiechö de Deus.
3 Pero Jesús cache quemeresieruro bieye yectieniebelestle que Moisés. Pues sente cale amo tönto quemeresieroa ma tecyectieniehuacö, tlöcamo cache quemeresieroa öquenu yaja oquechejchi.
4 Pues amo onca chöntle sa yaja mochejchi, pos innochtie tlachejchijme por yeca. Hua noche sösantle tli onca, Deus oquechejchijque.
5 Hua Moisés de melöhuac quecumpliro cuale iteque *ipa noche tiechö Deus. Pues oyeya sente tlatequepano, hua ejqueu omochihuaco sente testigo de lo que sötiepa mojtus.
6 Cache Cristo amo iloac quiename sente tlatequepano, tlöcamo cache tlamandöruro quiename sente öque iconie tli tlamandöroa ipa ichö itajtzi. Hua inu tiechö tejua tecate, tlö seme tecsequirojtasque ca inu balur hua inu pöquelestle tli tecpejpea por tomöcheales.
Onca siebelestle para tiegiente Deus
7 Por inu, xejcaquecö cuale lo que tli quejtulo Espíritu Sönto:
Tlö nenquecaquesque öxö tietlajtul,
8-9 amo xectepitzucö nemoyulo quiename oquechijque nemobiebetcöhua,
cuöc niechpiepiehualtejque ompa cöne nionöque chönte
ipa inun tunale cuöc niechprobörojque para quejtasque tlö necualönes.
Pues oniechprobörojtaya hua oniechmatque,
mös ye oquejtaque notlachihual ipa cuarenta años.
10 Por inu onecualö ca inu niecate giente
hua onequejto: “Seme san tlimach quenemelea yejua ipa inyulo,
hua amo oquenejque oquixomatque noojfe”.
11 Por inu onetlabielmec hua necprometiero ca juramento:
Nieca giente amo quepeasque pörte ipa nosiebeles.
12 Nocnihua, xecpeacö cueröro amo cana de repiente yeca de nemejua quepeas amo cuale iyulo para ayecmo tlaneltocas, hua ejqueu monencuaxelus de Deus öque nemoa.
13 Cache xomotlajtulmacacö entre nemejua cöra tunale, mientras öxö oc onca locör, para majcamo iye que canajyeca de nemejua quetepitzus iyulo ipampa quecajcayöhua itlajtlacul.
14 Pues tecpeasque pörte tieca Cristo tlö tecsequirusque tocuajpetzojtasque ipa toyulo hasta itlamejyo tlöltecpactle ca inu balur tli tecpea desde cuöc toneltocaque.
15 Xequelnömequecö tli quejtoa:
Tlö nenquecaquesque öxö tietlajtul,
amo xectepitzucö nemoyulo,
quiename oquechijque nemobiebetcöhua cuöc niechpiepiehualtejque.
16 ¿Öquemeju noso oquecajque tietlajtul Deus hua tiepiepiehualtejque? Pues innochtie tli oquisque de Egipto ica Moisés.
17 Hua ¿ca öquemeju ocualönoac Deus por cuarenta años? Pues inca innochtie tli otlajtlacojque, tli omejmejque ompa cöne nionöque chönte.
18 Hua ¿öquemeju oquemelfejque ca juramento que amo quepeasque pörte ipa tiesiebeles? Pues niecate tli amo tieneltocaque.
19 Hua cuale tequejta que amo oquepexque pörte ipampa amo moneltocaque.