23
Balaam camanalti camanali tlen Toteco
1 Huajca Balaam quiilhui Tlanahuatijquetl Balac:
―Techchihuili nica chicome tlaixpame, huan techcualtlalili chicome becerros huan chicome borregojme.
2 Huan Tlanahuatijquetl Balac quichijqui senquistoc quen Balaam quinahuatijtoya. Huan san sejco ipan sesen tlaixpamitl quitencahuilijque se becerro huan se borrego.
3 Huan teipa nopa tlachixquetl Balaam quiilhui Balac:
―Ximocahua nica ica motlacajcahualis tlatlatili huan na niyas nepa niquitas sintla TOTECO nechnamiquiqui. Teipa nimitzilhuis catli ya nechilhuis para ma nimitzilhui.
Balaam quintiochijqui nopa israelitame
4 Huajca Balaam yajqui ipan se piltepetzi catli amo tleno quipiya, huan Toteco hualajqui quinamiquico huan quiilhui:
―Na nijcualtlalijtoc chicome tlaixpamitl huan ipan sesen tlaixpamitl nimitztencahuilijtoc se becerro huan se borrego.
5 Huajca TOTECO quimacac Balaam nopa camanali catli quinequiyaya ma quiijto, huan quiilhui:
―Ximocuepa campa itztoc Tlanahuatijquetl Balac huan xiquijto nochi senquistoc quen nimitzilhuijtoc.
6 Huan Balaam mocuepqui huan quipantico Tlanahuatijquetl Balac ijcatoc nechca nopa tlacajcahualistli catli quitlatijtoya. Huan ihuaya itztoyaj nochi nopa tlayacanani tlen nopa tlali Moab.
7 Huajca Balaam quiijto ni camanali:
“Nechchijtoc ma nihuala nica nopa hueyi Tlanahuatijquetl Balac ipan ni tlali Moab.
Huan nihualajtoc tlen nopa tepeme ipan tlali Aram ica campa hualquisa tonati.
‘Xihuala’, yaya nechilhui, ‘xiquintelchihuaqui ni israelitame.
Xijcahua mocualancayo ma tlejco ica inijuanti para ma ininpanti catli fiero.’
8 Pero amo hueli niquintelchihuas sintla Toteco amo quintelchijtoc.
Amo hueli niquincualanis catli TOTECO amo ininca cualani.
9 Niquinita tlen nica itzonatipa ni hueyi tepetl.
Nojquiya niquintlachilía tlen piltepetzitzi.
Niquinita para moiyocatlalijtoque tlen sequinoc.
Inijuanti seyoc tlamantli masehualme.
Amo quen sequinoc tlaltipac ehuani.
10 Tlahuel miyaqui inijuanti hasta itztoque quen tlaltejpoctli.
Amo aqui hueli quinpohua.
Niyon se amo hueli quimatis quesqui itztoque.
Nipaquisquía sintla nimiquisquía xitlahuac iixpa TOTECO quen inijuanti.
Ma nimiquis ica nopa tlatiochihualistli catli se israelita quipiya.”
11 Huajca nopa Tlanahuatijquetl Balac quiilhui Balaam:
―¿Tlaque tijchijtoc? Na nimitzhualicac para xiquintelchihua nocualancaitacahua, huan ta tiquintiochijtoc.
Sempa Balaam camanalti camanali tlen TOTECO
12 Huan Balaam quinanquili:
―Monequi san niquijtos catli TOTECO nechilhuis.
13 Huajca Tlanahuatijquetl Balac quiilhui Balaam:
―Xihuala nohuaya huan ma tiyaca seyoc lugar. Huan tlen nopona hueli tiquitas san se achi tlen nochi nopa miyaqui israelitame. Tlen nopona huelis tiquintelchihuas san se achi tlen inijuanti.
14 Huajca Tlanahuatijquetl Balac quihuicac Balaam ipan se mili campa itoca Zofim ipan itzonatipa nopa tepetl Pisga, huan nopona quichijqui chicome tlaixpamitl huan quitencajqui se becerro huan se borrego ipan sesen tlaixpamitl.
15 Huajca nopona Balaam quiilhui Tlanahuatijquetl Balac:
―Ximocahua nica nechca motlacajcahualis tlatlatili huan na niquitati Toteco Dios nopona.
16 Huan TOTECO quinamiquico Balaam huan quimacac nopa camanali catli quinequiyaya ma quiijto. Huan nojquiya quiilhui:
―Ximocuepa campa itztoc Tlanahuatijquetl Balac huan xiquilhui catli na nimitzilhuijtoc.
17 Huan Balaam mocuepqui huan quiitac Balac ijcatoc nechca nopa tlacajcahualistli tlatlatili, huan ihuaya itztoyaj nopa tlayacanani tlen tlali Moab. Huan Tlanahuatijquetl Balac quitlatzintoquili:
―¿Tlaque mitzilhuijtoc DIOS?
18 Huajca Balaam sempa pejqui camanalti huan quiijto ni camanali:
“¡Tlanahuatijquetl Balac, ta catli tiicone Zipor,
cuali techtlacaquili!
19 Toteco amo itztoc quen titlacame. Yaya amo istlacati.
Niyon amo moyolpatla quen se tlacatl.
Catli yaya quiijtohua para oncas, ya nopa oncas.
Catli yaya quitencahua, ya nopa quichihua.
20 Nechnahuatijtoc ma niquintiochihua ni masehualme.
Huan pampa yaya ya quintiochijtoc,
amo hueli na niquijtos para amo.
21 TOTECO amo quipantía tlajtlacoli ipan ni israelitame.
Inijuanti catli iteipan ixhuihua Jacob.
Amo hualas tequipacholi ipan inijuanti pampa TOTECO catli inintata quihueyichijqui huan yaya itztoc ininhuaya.
Yeca inijuanti tzajtzij ica paquilistli,
pampa tlahuel hueyi inintlanahuatijca catli ininhuaya yohui.
22 Quen se hueyi toro quipiya icuacua,
ni masehualme quipiyaj TOTECO quen ininchicahualis, yaya catli quinquixti ipan tlali Egipto.
23 Amo aqui hueli quintelchihuas ni iteipan ixhuihua Jacob.
Ni israelitame amo tleno huelis quinchihuilis se tetlajchihuijquetl.
Nochi quiijtohuaj:
‘Huejhueyi tlamantli Toteco Dios quinchihuilijtoc.’
24 Ni masehualme motlananaj huan temajmatíaj
quen se tecuani catli amo mosiyajquetza
hasta quicuas catli moitzquilijtoc,
huan quiijis ieso catli momictilijtoc.”
25 Huajca Tlanahuatijquetl Balac quiilhui Balaam:
―Masque amo hueli tiquintelchihuas, amo xiquintiochihua.
26 Pero Balaam quinanquili:
―¿Amo nimitzilhui na san hueli niquijtos catli TOTECO nechilhui?
27 Huajca Tlanahuatijquetl Balac quiilhui:
―Techchihuili se favor, xihuala nohuaya huan nimitzhuicas seyoc lugar. Huelis tlen nopona Toteco mitzcahuilis xiquintelchihua.
28 Huan Balac quihuicac Balaam hasta itzonatipa nopa hueyi tepetl Peor campa nesiyaya nochi nopa huactoc tlali catli mocajqui tlatzintla.
29 Huan nopona Balaam quiilhui Tlanahuatijquetl Balac:
―Techchihuili nica chicome tlaixpamitl, huan xiquinsencahua chicome becerros huan chicome borregojme.
30 Huajca Tlanahuatijquetl Balac quichijqui nochi senquistoc quen quinahuati Balaam. Huan ipan sesen nopa tlaixpamitl quitencajqui se becerro huan se borrego.