101
Toteco, tijnequij tiitztose tixitlahuaque
1 Na nijnequi nihuicas para ta,
TOTECO, pampa ta techicnelía huan techchihuilía catli xitlahuac.
Quena, nimitzpaquilismacas ica huicatl.
2 Nijnequi xitlahuac nimonejnemiltis ipan moojhui,
huan quema tihualas techitaqui,
amo techpantilis niyon se tlamantli catli amo cuali.
Nojquiya nimonejnemiltis xitlahuac ipan nochaj.
3 Amo nijnequi tlamantli catli nenpolihui huan catli amo tleno ipati.
Amo nijchihuas tlamantli catli amo xitlahuac.
4 Nijhuejcamajcahuas nochi tlalnamiquilistli catli nechchihuasquía ma nijchihua catli fiero.
Amo nijnechcahuis tlamantli catli amo cuali.
5 Amo niquijiyohuis catli quiichtacaejelnamiqui ihuampox.
Huan amo aqui nijcahuilis ma mohueyimati huan moyacaquetzas.
6 Niquinmocuitlahuis nopa masehualme catli temachme ipan notlal,
huan niquinnotzas para ma itztoca nohuaya ipan nochaj.
Huan san catli nelía monejnemiltíaj xitlahuac,
niquincahuilis ma nechtequipanoca.
7 Pero amo niquincahuilis ma itztoca ipan nochaj catli tlacajcayahuaj huan istlacatij.
8 Mojmostla ica ijnaloc niquintzontlamiltis nochi catli amo tleno quitlepanitaj.
Huan quej nopa niquintlamiltis nochi catli quichihuaj catli fiero ipan ialtepe TOTECO.