23
Itlamiya camanal David
1 Ya ni itlamiya camanal David:
“Na niDavid, niicone Isaí, nicamanalti.
Na catli Toteco Dios nechhueyitlalijtoc.
Na catli nechtlapejpeni huan nechchijqui nitlanahuatijquetl,
Toteco Dios, yaya catli iDios tohuejcapan tata Jacob.
Na catli Toteco nechmacac miyac huicatl yejyectzitzi para tiisraelitame hueli ica tijpaquilismacase.
2 Itonal TOTECO quitequihuía nocamac para ma niquijtos icamanal.
Toteco quichijqui para icamanal ma quisa nocamaco.
3 Yaya Toteco toDios tiisraelitame nechcamanalhuijtoc.
Yaya catli ipan tiisraelitame timochiyaj nechilhui:
‘Hualas se catli tlanahuatis xitlahuac campa masehualme.
Yaya nechimacasis huan tlanahuatis quen monequi.
4 Yaya elis quen nopa tlahuili catli quisa cualca.
Elis quen quema tlahuijtihuala tonati yejyectzi ica ijnaloc quema amo onca niyon quentzi mixtli.
Yaya temacas paquilistli quen techmaca paquili para chamanis sacatl ipan tlali quema yancuic tlaquiyajtoc.’
5 Huan Toteco Dios quintlapejpenijtoc nochaj ehuani catli teipa tlacajtiyase para tlanahuatise iixpa.
Huan nohuaya quichijtoc se camanal sencahuali para nochipa catli quipiya nochi catli noca mocajtoc nechchihuilis teipa.
Nopa camanal sencahuali catli nohuaya quichijqui quipiya nochi tlanahuatili catli monequi huan elis temachtli para nochipa.
Temachtli yaya quitlamichijtiyas sesen tlamantli catli nechilhuijtoc quichihuas ica noixhuihua huan nochi quisas cuali para na.
Masque noja polihui para panos, nijmati para se tonal panos nochi catli nijnequisquía ma onca pampa quej nopa noca mocajtoc.
6 Pero nochi catli amo quitlepanitaj Toteco itztose quen huitztli catli tijcuatepehuaj huejca.
Amo aqui quinequis quinitzquis ica imax.
7 Huan sintla acajya quitzontequisnequis nopa huitztli,
monequi momapiquis huan quihuicas itepos cuatopil para amo quimachajcos. Monequi quintlatis ipan tlitl huan senquistoc quitlamiltis.”
Inintoca isoldados David catli más motemacayayaj.
8 Ya ni inintoca nopa eyi tlacame catli más tetique huan más motemacayayaj tlen nochi isoldados David; Yaya catli más hueyi tlen ne eyi itoca Joseb Basebet catli iixhui Tacmon catli quinyacanqui nopa eyi. Ica icuatlaminhua catli huejhuehueyac quinmicti 800 tlacame ipan se tlahuilancayotl.
9 Nopa ompa hueyi soldado itoca eliyaya Eleazar catli elqui icone Dodo huan iixhui Ahohi. Eleazar monexti para nelía motemacayaya quema san ni eyi tlacame huan David mocajque para quinhuilanase nopa filisteos. Huan nochi sequinoc israelita soldados cholojque.
10 Huan Eleazar pejqui quinmictía filisteos nopa tonal, huan quinmictijtiyajqui hasta tlahuel siyajqui. Huan macuatiyaya hasta amo hueliyaya quimajcahuas icuayo imachete. Huan Toteco nelía quipalehui David huan nopa eyi soldados, huan yeca tlahuel tlatlanque nopa tonali. Huan teipa nopa sequinoc israelitame catli cholojtoyaj mocuepque san para quinquixtilise nopa filisteo soldados catli mictoyaj nochi catli ipati catli quihuicayayaj.
11 Huan nopa expa hueyi soldado itoca eliyaya Sama, icone Age, catli ejqui altepetl Harar. Se tonal mosentilijque se hueyi pamitl tlen filisteo soldados para quinhuilanase israelitame campa itoca Lehi. Huan nochi sequinoc israelita soldados nopona cholojtejque.
12 Huan Sama moquetzqui tlatlajco se mili tlen tlatoctli tlen nopa etl catli siltic huan iseli quinhuilanqui huan quimanahui nopa mili huan quinmicti miyac filisteos nopa tonal. Tlahuel quintlanqui, pampa TOTECO quipalehui.
13 Se tonal quema pixquistli, nopa filisteo soldados mosansejcotilijtoyaj ipan tlamayamitl Refaim huan campa hueli pixcayayaj. Nojquiya mocalaquijtoyaj miyac filisteo soldados ipan altepetl Belén,
14 huan huajca David mocahuayaya ipan nopa tecacahuatl nechca Adulam pampa más temachtli. Huan nopona hualajque quipaxalocoj eyi soldados tlen nopa 30 itlayacanca soldados David catli más motemacayayaj.
15 Huan David quiijto: “¡Nelía cuali elisquía para niquijisquía se quentzi nopa cuali atl tlen ne ameli catli eltoc ipuertajteno Belén!”
16 Huajca nopa eyi tlacame catli nelmotemacayayaj quisque huan quiixcotonque campa itztoyaj nopa filisteos huan quiquixtijque atl ipan ne ameli nechca altepetl Belén huan quihuiquilijque David. Huan ya motequipacho ica catli quiijtojtoya huan amo quiijic. San quitoyajqui tlalchi iixpa TOTECO quen se tlacajcahualistli.
17 Huan quiijto: “TOTECO, ¿quenicatza niquijisquía ni atl? Elisquía quen niquijisquía inieso ni tlacame catli motemacaque para nechcuilitoj, pampa huelis mictosquíaj san por catli niquijto.”
Quej nopa motemacayayaj ne eyi tlacame catli quipaxalotoj David.
18 Huan Abisai, iicni Joab huan icone Sarvia, quinnahuatiyaya nopa 30 tlacame catli más motemacayayaj ipan tlahuilancayotl. Se tonal iseli moixnamijqui ica 300 icualancaitacahua huan quinmicti ica icuatlaminhua catli huejhuehueyac. Yeca ya nojquiya hueyi quen nopa achtihui eyi catli niquintocaxti para más motemacayayaj tlen isoldados David.
19 Abisai eliyaya más hueyi que nopa 30 huan yeca mochijqui inintlayacanca. Huan nochi quiiximatque Abisai para hueyi, pero amo eliyaya se tlen nopa eyi catli más tlaiximatilme.
20 Huan Benaía, icone Joiada, tlen altepetl Cabseel eliyaya se tlacatl catli tlahuel motemacayaya. Ipan tlali Moab quinmicti ome iconehua Ariel catli itztoyaj huejcapantique. Huan se tonal quema tlasehuetziyaya quipanti se tecuani catli itoca león huan quimicti ipan se ostotl.
21 Huan seyoc huelta Benaía quihuicayaya se cuahuitl huan pejqui quihuilana se tlacatl catli huejcapantic catli tlali Egipto ejquetl huan quihuicayaya icuatlamin catli huehueyac imaco. Huan Benaía quiquixtili icuatlamin catli huehueyac huan ica quimicti.
22 Tlamantli quej ni quichijtihualayaya Benaía, huajca nojquiya nochi quiiximatque para hueyi quen nopa eyi tlacame pampa tlahuel motemacaque.
23 Pero amo eliyaya se tlen inijuanti. Pero nopa 30 soldados catli tlahuel motemacayayaj quitlepanitaque miyac Benaía. Huan David quitequitlali ma quinnahuatis isoldados catli mocajque ihuaya ya para quimocuitlahuise.
Nopa soldados catli más motemacayayaj
24 Ipan nopa 30 soldados catli más motemacayayaj itztoyaj ya inin:
Asael, iicni Joab,
Elhanán, icone Dodo, tlen altepetl Belén,
25 Sama tlen altepetl Harod,
Elica tlen altepetl Harod
26 Heles tlen altepetl Palti,
Ira, icone Iques, tlen altepetl Tecoa,
27 Abiezer tlen altepetl Anatot,
Mebunai tlen altepetl Husah,
28 Salmón tlen altepetl Ahoh,
Maharai tlen altepetl Netofa,
29 Heleb, icone Baana, tlen altepetl Netofa,
Itai, icone Ribai, tlen altepetl Gabaa ipan inintlal iixhuihua Benjamín,
30 Benaía tlen altepetl Piratón,
Hidai catli ehuayaya campa itlaixtemolis Tepetl Gaas,
31 Abi Albón tlen altepetl Arba,
Azmavet tlen altepetl Bahurim,
32 Eliaba tlen altepetl Saalbon,
Jonatán, se icone Jasén,
33 Sama tlen altepetl Arar,
Ahíam, icone Sarar, catli nojquiya hualajqui tlen altepetl Arar;
34 Elifelet, icone Ahasbai, tlen altepetl Maaca,
Eliam, icone Ahitofel, tlen altepetl Gilo,
35 Hezrai tlen altepetl Carmel,
Paarai tlen altepetl Arba,
36 Igal, icone Natán, tlen altepetl Soba,
Bani, tlen altepetl Gad,
37 Selec tlen altepetl Amón,
Naharai tlen altepetl Beerot (catli eliyaya itlamocuitlahuijca Joab, icone Sarvia),
38 Ira tlen altepetl Itra,
Gareb tlen altepetl Itra,
39 huan Urías, nopa heteo tlacatl.
Huajca ica nochi eliyayaj 37 isoldados David catli más motemacayayaj para tlahuilanase.