8
Jesús te̱tajtowiliá iyi̱xtaj Dios
1 Ini̱nwaꞌ in yej ma̱jya sej ye̱kti yej nemi nimitzijliáj: iga tikpiáj tosacerdo̱tej yej ijé̱fejpa sacerdo̱tejmej yej e̱watoꞌ ilá̱dojpa iye̱ꞌma̱ꞌ Dios ka̱n manda̱rowa ne‑iga pan cielo.
2 Iwá̱n kichijtoꞌ itekiyo sacerdote ipan melaꞌtio̱pan yej onoꞌ ipan cielo yej kichij toTe̱ko, ayéj tajta̱gaꞌ kichij.
3 Nochi sacerdote kita̱liáj iga kimaka ofrenda iwá̱n kimiktiá yo̱lka̱ꞌ iga kitatiliá Dios. No̱ kajasi iga Jesús makipiá tejté̱ iga makimaka Dios.
4 Siga Jesús onoya katka nigaj ipan ta̱jli ayá̱ꞌ mochi̱waya sacerdote, iga onókejoꞌ sacerdo̱tejmej yej kimakaj iyofre̱ndaj Dios ken tatekimaka iley Moisés.
5 Eꞌ ini̱mej sacerdo̱tejmej iga kichi̱waj itekipano̱lmej, te̱ne̱xtiliá ken tikita itasejka̱nyo yej mochi̱wa ne‑iga ipan cielo. Iga kua̱ꞌ Moisés kijlijkej iga makichi̱wa kuetaxtio̱pan, Dios kijlij: “Taꞌ xikita, tia tikchi̱wati ijkó̱mpasan ken nimitzne̱xtilij ipan tepe̱ꞌ.”
6 Eꞌ itekiyo Jesús yej iná̱n ijé̱fejpa sacerdo̱tejmej, ma̱jya sej ye̱kti que yej kichi̱wa sacerdote ken yej tatekimáꞌ Moisés. Iga inó̱n pacto yej kichij, wel te̱tajtowiliá iyi̱xtaj Dios. Iwá̱n iní̱n mochi̱was iga Dios kíjtoja iga te̱makas yej ma̱jya sej te̱ye̱ꞌchi̱was.
7 Siga katka inó̱n pacto yej áchtoya onoya akipolowa̱ya nité̱, ayejoꞌ katka iga mamochi̱wa seꞌ pacto.
8 Eꞌ Dios kitaꞌ iga yej kitokayaj achto pacto, ayá̱ꞌ ye̱ꞌnemiáj, ijkí̱n kijtoj de yejemej ka̱n ijkuilijtoꞌ:
ToTe̱ko kijtowa: Ke̱man asis día kua̱ꞌ
nikchi̱was seꞌ pacto wa̱n ipilówa̱mpa Israel iwá̱n ipilówa̱mpa Judá.
9 Ayéj ken inó̱n pacto yej nikchij iwá̱n iyikyapatajwa̱n
kua̱ꞌ nikma̱ki̱tzkijkej iga niki̱xtijkej Egipto;
iwá̱n ayá̱ꞌ kichijkej ken kijtowa inó̱n pacto yej nikchij iwa̱mej,
inó̱n iga niksenkokajtejkej, kijtowa toTe̱ko.
10 Inó̱n iga, iní̱n pacto yej nikchi̱was wa̱n israeli̱tajmej, ke̱man kua̱ꞌ asis idíaj, kijtowa toTe̱ko:
Nikchi̱was iga noley nochipa makimatitoka̱n,
iwá̱n ijkuilijtos ipan iya̱lmajmej.
Wa̱n nej nimochi̱was iDio̱s,
iwá̱n yejemej yawij mochi̱watij notatki.
11 Ayagaj yawi kimachti̱ti seꞌ,
niga yej íwa̱n motoka, niga iyikni̱n iga makijli: “Xiki̱xmatika̱n toTe̱ko”,
iga nochi yawij ne‑i̱xmatitij,
este yej aya yo̱lej iwá̱n este yej ma̱jya yo̱lej.
12 Wa̱n nej nia nikperdona̱rowili̱tij yej kichijkej yej aye̱kti,
iwá̱n nike̱man má̱j ayoꞌ nikejla̱mikis yej kichijkej yej aye̱kti.
13 Kua̱ꞌ Dios kijtowa iga mochi̱wa seꞌ pacto, inó̱n kijto̱jneki iga yej achto mochij, ayoꞌ vale̱rowa. Yej ikyapa pacto ayoꞌ ke̱ꞌ poliwi iga yawi poliwiti.