19
1 Iwá̱n Pilato tatekimáꞌ iga makimagaka̱n Jesús.
2 Solda̱dojmej kita̱lilijkej ipan itzontekon Jesús se̱ corona de witzti yej kiyawalchijkej iwá̱n kaki̱ltijkej se̱ tzótzol yej este ken tata̱ꞌcha̱potiꞌ.
3 Iwá̱n kina̱ꞌtechojkej iga kijli̱toj:
—¡Nimitzweyimati̱ltiáj tej iRre̱y judiyojmej!
Iwá̱n kixa̱ygatatzi̱nkej.
4 Pilato ki̱saꞌ sej, iwá̱n kijtoj:
—Taꞌ xikitaka̱n, niki̱xtij iga xikmatika̱n iga ayá̱ꞌ nikasiliá siga kichij yej aye̱kti.
5 Iwá̱n ki̱saꞌ Jesús iwá̱n icoro̱naj yej chijtoꞌ iga witzti ipan itzontekon iwá̱n kakijtia̱ya tzótzol yej chi̱ltiꞌ yej este a̱cha̱potiꞌ. Pilato kijtoj:
—¡Nija onoꞌ in iní̱n ta̱gaꞌ!
6 Kua̱ꞌ kitakej ije̱fejmej sacerdo̱tejmej iwá̱n policiyajmej, pe̱wakej iga tzajtzikej:
—¡Xikmikti ipan cruz! ¡Xikmikti ipan cruz!
Pilato kijtoj:
—Puej xikui̱gáka̱nya iwá̱n xikmikti̱ka̱n ipan cruz amejeme̱n, nej ayá̱ꞌ nikasiliá siga kichij yej aye̱kti.
7 Eꞌ judiyojmej kijtojkej:
—Nejeme̱n nikpiáj se̱ ley, inó̱n ley kijtowa iga yawi mikiti, iga igá̱najsan mojlia̱ya iga yéj iPiltzi̱n Dios.
8 Kua̱ꞌ iní̱n kikáꞌ Pilato, ma̱jya majmawiꞌ.
9 Kalaꞌ sej al palacio iwá̱n kitajtan Jesús:
—¿Ká̱ntaj in tej mocha̱n?
Eꞌ Jesús até̱ kijtoj.
10 Iwá̱n Pilato kijtoj:
—¿Iwá̱n aya̱ꞌtaj tine̱no̱tza? ¿Ix ayá̱ꞌ tikmati iga nej wel nitatekimaka iga mamitzmikti̱ka̱n ipan cruz iwá̱n wel no̱ nimitzmajka̱wa?
11 Jesús kijtoj:
—Awel tikchi̱wa nité̱ ipan nej siga Dios ayá̱ꞌ kineki; inó̱n iga yej nij ne̱ka̱wakoj mo‑i̱xtaj, má̱j kichijkej yej aye̱kti que tej.
12 Desde íkua̱ꞌ Pilato kite̱mowa̱ya ken iga makimajka̱wa Jesús; eꞌ judiyojmej tzajtzikej:
—¡Siga tikmajka̱wa, tej ayéj iyami̱goj el rey César! ¡Nochi yej mochi̱wa rey, mochi̱wasneki iyenemi̱goj el rey César!
13 Kua̱ꞌ Pilato iní̱n kikáꞌ, tatekimáꞌ iga makiki̱xti̱ka̱n Jesús, iwá̱n Pilato mota̱lij ipan iweyi‑asie̱ntoj ka̱n manda̱rowa, ompa ka̱n ipan hebreo ito̱ka̱ꞌ Gabata, yej kijto̱jneki piso de teꞌti.
14 Inó̱n mochij kua̱ꞌ kipolowa̱ya se̱ día iga mochi̱wa iyilwi la Pascua, ken tajkodía. Iwá̱n Pilato kijlij judiyojmej:
—¡Nigaj onoꞌ amorre̱y!
15 Eꞌ yejeme̱n tzajtzikej:
—¡Mamiki! ¡Mamiki! ¡Xiclavá̱ropa ipan cruz!
Pilato tatajtan:
—¿Ix nikmiktiá ipan cruz amorre̱y?
Eꞌ ije̱fej sacerdo̱tejmej kijtoj:
—Nejeme̱n ayá̱ꞌ nikpiáj seꞌ rey, petz isé̱ltisan rey César.
16 Iwá̱n pilato kentrega̱roj Jesús iga makimikti̱ka̱n ipan cruz, iwá̱n yejemej kiwi̱gakej.
Jesús kiclava̱rowaj ipan cruz
17 Iwá̱n Jesús ki̱saꞌ, kiwi̱gaya icru̱z iga yajki ka̱n ito̱ka̱ꞌ Kuaomiꞌ, ipan hebreo kijliáj Gólgota.
18 Ompa kiclava̱rojkej Jesús ipan cruz. No̱ kiclava̱rojkej ite̱noj o̱me tajta̱gaꞌ ipan sejsé̱ icru̱z, se̱ de cada lado, Jesús onoya tatajkoya̱n.
19 Pilato tati̱tan iga makita̱lili̱tij se̱ tajkuílo̱l ipan icru̱z, yej kijtowa̱ya: “JESÚS DE NAZARET, IRRE̱Y JUDIYOJMEJ.”
20 Ka̱n kiclava̱rojkej Jesús ipan cruz, na̱ꞌsan weyi‑a̱ltepe̱ꞌ Jerusalén, inó̱n iga miaꞌ judiyojmej kitajto̱ltijkej inó̱n tajkuílo̱l yej ijkuilijtoya ipan hebreo, ipan griego iwá̱n ipan latín.
21 Inó̱n iga ije̱fejmej sacerdo̱tejmej kijlijkej Pilato:
—Amo xikijkuilo “iRre̱y judiyojmej”; má̱j ye̱kti xikijkuilo “Iní̱n mojliá iga iRre̱y judiyojmej.”
22 Eꞌ Pilato kijtoj:
—Yej nikijkuíloja, ijko̱nya maka̱wi.
23 Kua̱ꞌ kiclava̱rójkeja Jesús ipan cruz, na̱wi solda̱dojmej morreparti̱rowilijkej itzotzolmej Jesús. Ijkó̱n no̱ kichi̱wayaj wa̱n isota̱ntzótzol, eꞌ como inó̱n tzótzol ayá̱ꞌ sa̱sa̱lijtoya, se̱san iga ijkititoya desde ajko wa̱n este tani,
24 solda̱dojmej mosepan‑ijlijkej:
—Amo matiktza̱tzaya̱naka̱n; matik‑rifa̱ro̱ka̱n iga matikitaka̱n a̱ꞌyéj kikuis.
Ijkó̱n mochij ken ijkuilijtoꞌ itájto̱l Dios ka̱n kijtowa: “Mota̱tajkolowilijkej notzótzol iwá̱n kirrifa̱rojkej nosota̱ntzótzol.” Ijkó̱n kichijkej solda̱dojmej.
25 Iye̱ꞌ Jesús iwá̱n isiwa‑ikni̱n iye̱ꞌ onoyaj ite̱noj cruz ka̱n Jesús onoya, no̱ onoyaj María yej isiwa̱ꞌ Cleofas iwá̱n María Magdalena.
26 Kua̱ꞌ Jesús kitaꞌ iye̱ꞌ iwá̱n iná̱ꞌ onoꞌ idiscí̱poloj yej má̱j kicho̱kilia̱ya, kijlij iye̱ꞌ:
—Nomáj, ine̱pa xikita ken mopiltzi̱n.
27 Iwá̱n kijlij inó̱n idiscí̱poloj:
—Xikneki noye̱ꞌ ken moye̱ꞌ.
Iwá̱n desde íkua̱ꞌ, ícha̱n inó̱n discípulo ki‑o̱mema̱wij María.
Miki Jesús
28 Kua̱ꞌ nochi panoj iní̱n, Jesús kimatiꞌ iga nóchiya mochij, iwá̱n iga mamochi̱wa ken ijkuilijtoꞌ, kijtoj:
—Na̱taneki.
29 Ompa onoya se̱ jarro yej te̱ntoya iga xoko̱ꞌvi̱noj, iwá̱n ka̱pachojkej tejté̱ yej ken ichkaꞌ ipan xoko̱ꞌvi̱noj, iwá̱n kilpijkej ipan se̱ ima̱ꞌ kuawiꞌ yej ito̱ka̱ꞌ hisopo iwá̱n kite̱nwi̱ltijkej iga makichichi̱na.
30 Kua̱ꞌ Jesús konij xoko̱ꞌvi̱noj, kijtoj:
—Móchija nochi.
Iwá̱n motzompiloj, íkua̱ꞌya miguiꞌ.
Se̱ soldado kisolowa Jesús ise̱katan iga ila̱nzaj
31 Kipolowa̱ya se̱ día iga mochi̱wa iyilwi la Pascua, iwá̱n judiyojmej ayá̱ꞌ kinekiáj iga a̱nimajmej maka̱wika̱n ipan icru̱zmej ipan día sábado, iga inó̱n día kipoxweyimatiáj. Inó̱n iga kijlijkej Pilato iga matatekimaka iga makipojpostekili̱ka̱n iyikximej yej onokej ipan icru̱zmej iga má̱j nimaní̱n mamikika̱n iwá̱n makitemowí̱ka̱nya.
32 Iwá̱n solda̱dojmej yajkij, iwá̱n kipo̱postekilijkej iyikximej yej achto ta̱gaꞌ, iwá̱n seꞌ ta̱gaꞌ yej onoya no̱ ipan icru̱z iná̱ꞌ Jesús.
33 Eꞌ kua̱ꞌ kina̱ꞌtechojkej Jesús, kitakej iga míktoꞌya, inó̱n iga ayá̱ꞌ kijikxipostekikej.
34 Eꞌ se̱ soldado kisoloj ise̱kate̱noj iga ila̱nzaj, iwá̱n ki̱saꞌ esti iwá̱n a̱ꞌti.
35 Iní̱n kipowa yej kitaꞌ, iwá̱n ijko̱nya ken kijtowa, yéj kimati iga ijko̱nya nokta yej kijtowa iga amejeme̱n no̱ xicre̱do̱ka̱n.
36 Iní̱n mochij iga mamochi̱wa ken ijkuilijtoꞌ: “Ayá̱ꞌ kipo̱postekilijkej nisé̱ iyomiyo.”
37 Iwá̱n seꞌ ka̱n ijkuilijtoꞌ itájto̱l Dios kijtowa: “Kitaskej yej kisolojkej.”
Kito̱kaj Jesús
38 Kua̱ꞌ nochi iní̱n mochij, José yej icha̱n a̱ltepe̱ꞌ Arimatea, kitajtanilij Pilato iga wel makiwi̱ga icue̱rpoj Jesús iga makito̱ka. José no̱ kitokaya Jesús, malej iga ichtákasan iga kimajmawilia̱ya judiyojmej. Pilato kijlij iga wel kiwi̱gaꞌ icue̱rpoj Jesús, iwá̱n José yajki kikuito.
39 Asiꞌ no̱ Nicodemo yej se̱ yówal yajka tajto̱to̱ya iwá̱n Jesús, kiwajli̱ꞌ ken treinta kilos yej ajwiya̱ꞌ, nelijtoꞌ iga mirra iwá̱n áloes.
40 Ijkó̱n iga José iwá̱n Nicodemo kikuikej icue̱rpoj Jesús, iwá̱n kiki̱kimilojkej iga venda yej kakalijtoꞌ iga yej ajwiya̱ꞌ, ken iga kitekichi̱wayaj judiyojmej iga kito̱kaj a̱nimajmej.
41 Ompa ka̱n kimiktijkej Jesús ipan cruz onoya se̱ huerto, iwá̱n ipan huerto onoya se̱ a̱nimajtexapoꞌ yej kichíjkejoꞌ, ka̱n aya agaj kito̱kaj.
42 Ompa kakijkej icue̱rpoj Jesús, iga inó̱n a̱nimajtexapoꞌ na̱ꞌsan onoya, iwá̱n pe̱wasnekiáy inó̱n día kua̱ꞌ mose̱wiáj judiyojmej.