17
Na palu mana taluutuni
(Matthew 18:6-7, 21-22; Mark 9:42)
1 Jesus te ghoi bosa vanira nina vaovarongo, “Na lei totobo te nera na tinoni ge kara palugha, ke mua ghoi taho tua na kale. Mana tinoni te nei lei totobo kiri ge ra kale, God ke vahaghitailira.
2 Ma sakai na tinoni ke ba nea a sakai tadira rana taluutuniu raini, ge ke tumu tana palu ke, me uto vaa vania ge kara taria na vatu sule tana luana, ma kara va lumia tana horara.
3 Keri ke, ge kau righiutoa na hava tau gonia.
“A sakai hoghomiu ke ba tangohahi ke, ma kau tarai utoa, me ke tughulio ke, ma kau talukehai vania na paluna.
4 Keba vitu na tughuru ni goni hahiana vanighau siki totobo lokana sakai na bongi ke, me vitu ghua na tughuru ni oli mai tamiu, na mai bosaana te tughulio, ma kau talukehai vania na paluna.”
Nia tarai na taluutuni
5 Ma rana manevetena tara bosa vania Lord, “Ko nei nimami taluutuni ge kara ngasi.”
6 Ge bosa tughu vanira Jesus, “Sakai vamua ke pile nimiu taluutuni vaghaa na vuavua ni ghai te pile kikia ngangata, ma kau bosa vania na tabalolo keri, ‘Ko tavuti mo ko va subagho heghemu tana tahi,’ me ke rongovia na bosamiu.”
Na loana na ghairau
7 Jesus te ghoi bosa so, “A sakai tamiu ke loghoa nina ghairau, keba ivu tana leghai, pe ke righitaonighi na lei sheep. ?Ivei tea, tana bona te soko na lutu, me oli mai tana vale, ma kau bosa vania, ‘Sopou mo ko vanga?’
8 Taho! Kau diki bosa vania, ‘Ko diki gonidilaa ghagua na vanga, mo ko tughu tivi, mo ko hola mai ghagua na vanga. Murina ku vanga vaho ge ko vanga!’
9 Na ghairau keri te mua ulaghana ge kara holoutoa, na pukuna te taonighi lei bosa ni keikeri vamua.
10 Keri ke, ge ighau ghua kau nea te vaghaa. Mi tana bona tau goni sokoi tua na lei totobo udolu tara bosai kau gonighi ke, mi ani kau nea vamua na bosa, ‘Ighai eni tai ghairau vamua, me mua ulaghamami ge kau holoutoghai, na pukuna tai gonighi vamua na lei totobo te loamami ge kai gonighi.’ ”
Jesus te kisura paregho na kuhu
11 Mi tana bona Jesus te sakutua tona i Jerusalem, te va liu haghe i lilighina na bubulo i Samaria mi Galilee.
12 Me va rughuhaghe ta sakai na komu, ge sodora ga e paregho na kuhu, mara tughuru hauvia,
13 mara ghaeghahe vania Jesus mara ghaghua, “Lord Jesus, ko arovighai mai!”
14 Me righira Jesus ge bosa vanira, “Kau tona itadira rana manesukaghi, ma kara diki siro tetetei na hulimiu.” Tana bona tara sania Jesus mara sakutua tona tana halautu, me mavo tua na hulidira.
15 Ma sakai tadira, na mane ni Samaria, te righia te marabu tua, ge oli mai me holoutoa God nia na manga sule.
16 Me mai poghotao tana pari tana tuana Jesus, me holoutoa gaia.
17 Keri ge bosa Jesus, “?Agaira e paregho tara mai tagua tara marabu tua, mi vei gaira ra hiua?
18 ?E ghua ge na sinogho eni vamua te oli mai ni holoutoana God?”
19 Ge bosa Jesus vania na mane, “Ko tughuru, mo ko tona, nimua taluutuni te negho ge o mavo.”
Na maiana na kinakabuna God
(Matthew 24:23-28, 37-41)
20 Mana balu Pharisee tara huatia Jesus, “?Ingiha vaho ge ke sara mai nina kinakabu God?”
Ge bosa tughu Jesus, “Na kinakabu ta God ke mua mai te vaghaa na vaughilala ta righi kalea na pukuna tau kenea.
21 Me taho ghua hei ke bosa, ‘A eni gaia,’ pa ‘Keri gaia!’ Taho. Na pukuna na kinakabuna God te kabu dila tua i lokamiu.”
22 Keri ge bosa vanira nina vaovarongo, “Na bongi ke mai, ge kau liona ge kau righia sakai tadira na bongigu inau, na Dale Tinoni, ma kau mua righia.
23 Mana balu kara bosa vanighau, ‘Gaia keri, kau righia vaa,’ pa, ‘Gaia eni.’ Kau bei tona ni va keneana gea.
24 Mete vaghaa na viti te saopoa na parako, me marara horu mai tana levuna na maramana, me va sara ta sakai na levuna, ke vaghaa ghua keri tana bongina na Dale Tinoni.
25 Ke diki vahaghitaili mughua, mana vure ni maramana eni tara vola itaeni, kara nia sika.
26 Me vagha tana bongina Noah idania, ke vaghaa ghua keri tana lei bongigu inau na Dale Tinoni.
27 Na vure udolu tara vanga mara inu so, na lei mane mana lei vaivine tara taulaghi polo me sara tana bongi a Noah te haghe tana vaka me mai na lualua me mate udolura na vure.
28 Ke vaghaa ghua keri tana bongina Lot idania. Na vure tara vanga mara inu, ra pelupelu mara hunuhunulu, ivu mara vade, mara kisu vale.
29 Mi tana bongi a Lot te tona sania i Sodom, na lake mana gougovu kolu ruruhu te horu mai kokou me mate sokora na vure.
30 Ke vaghaa ghua keri tana bongi, inau, na Dale Tinoni, ku oli mai.
31 Tana bongi keri, siki sakai ke ghanaa tana vouvotu ni vale, ke bei ghoi oli gea na holaana siki nina totobo. Ma hei te lutu tana leghai, ke bei ghoi oli tana valena ge ke holaana siki lologho.
32 Kau ghanaghana olia na hava te kalea a tauna Lot!
33 Gaira tara holopangotia na vola ni maramana eni tara sivilaghinia, ma gaira tara sivilaghinia na voladira mara taoniu kara holaa na vola kasila.
34 Mi tana bongi vaghana keri, erua na tinoni koro maturu ta sakai na malei ghime vamua, a sakai ke lavikeha ma sakai ke ghana olia.
35 Me rua na vinekama koro ghighiri vanga koukolu, ma sakai God ke lavikehaa, ma sakai ke ghana olia.”
36
37 Ma rana vaovarongo tara huatia Jesus, “?Maghutu, ke ghua nigha ke kale na lei totobo raini?”
Ge bosa tughu vanira Jesus, “Ivei tua ke mate, me ke dudura horu ga na hulina na maumanu, mi ga lilighina kara vahikolu na lei manukama.”