प्रेरितो के काम
प्रेरितान काम
ओलखात
प्रेरितान पुस्तेक सुरवातीन मोंडलीन बारा माय हे, ज्यी यरूशलेम रेन आखा यहुदिया, सामरीया देस एने ताह रेन ओंगाण किहीक पोसरती गियी। जिहकेरीन यीशु हेरगाम जाणेन पेल तान चेलाह कियेल ईतो। 1:8 ज्या पुस्तेकाह लुका लिखेल हे जो लुकान हाजाली खुबेर लिखेल ईतो। लुका एक वोंसी एने आखी वातुन ईसाब मेलनार ईतो। लुका तान हाजाली खोबरीह एने प्रेरितान कामान पुस्तेक थियुफिलुस नावान एक ग्रीक एदम्यान केरता लिखेल हे, पुण पुस्तेक लेखणेन उद्देश ज्यो हे काय ईसाई समुह जा माय यहुदि एने बिगेर यहुदि दुयू सामील हेते। 1:1
प्रेरितान पुस्तेक यीशु मसीन जेल्मान पासाण कोम से कोम 60-64 सालान विची माय लेखायेल एती, काहाकाय ज्यी पुस्तेक पौलुसान जेल माय रेन सुटणेन पेल निवरी जाथे। लुका प्रेरित पौलुस हिऱ्यो यात्रा किरेल एने शायद अन्ताकिया हेयरा माय रेन ज्यी पुस्तेकीह लिख्यो एय।
प्रेरितान पुस्तेक आमरे केरता सुरवातीन मोंडलीन उदारण प्रदान किरेह, एने यीशु मसी माय बुरहो केरीन किहीक जीवणु हे तो देखाड़ेह। एने प्रेरितान उदारण आमुह देखाड़ेह काय हाजाली खुबेर दिहराह केणेन केरता चोखाला जीवान ताकेत पोर बुरहो किहीक केरनु हे।
रूपरेखा
1. चोखाला जीवान उतेरनो एने मोंडलीन वोड़ती। 1:1–8:1
2. मोंडली पोर सेताव एने यरूशलेम माय रेन हाजाली खुबेर पोसेरने। 8:2–12:23
3. पौलुस ने पेल्ली मिश्नरी यात्रा। 12:24–14:28
4. यरूशलेम ने गेरीब विश्वासीन जोरवुत ने बाराम। 15:1-35
5. पौलुस ने दुसरी मिश्नरी यात्रा। 15:36–18:22
6. पौलुस ने तिसरी मिश्नरी यात्रा। 18:23–20:38
7. पौलुसाह यरूशलेम माय बोंदी बाणावणो। 21–26
8. पौलुसाह रोम माय ली जाणो। 27–28
1
ओलखात
1 एय मोंगाल्ला थियुफिलुस: मी पेल्ली पुस्तेक त्यु सोब वातीन बाराम लिख्यो जो यीशु सुरवातीच रेन किरते एने हिकाड़ते रिनो,
2 तो उपेर हेरगाम विसाय नाह गीयो, ताह वोर तान निवाड़ेल प्रेरिताह चोखाला जीवान द्वारे उकुम आपीन हिकाड़ते रिनो।
3 तो मोरीन पासाण जुलूम पाका पुरावा हिऱ्यो सोताह जीवतालो देखाड्यो, एने चालीह दिह वोर तो ताह देखाती रिनो। एने बोगवानान राज ने वातु किरते रिनो।
4 एने ता हिऱ्यो मिलीन ताह उकुम आप्यो, “यरूशलेम सोड़ीन जाहो मा: पुण मार आबाख ने ता वायदाह पुरो एणेन वाट जोवते रिवो, जान बाराम मी तुमूह कियेल ईतो।
5 काहाकाय योहान पाण्या केरीन बपतीस्मा आपेल, पुण थोड़ाक दिह्यान पासाण तुमू चोखाला जीवा केरीन बपतीस्मा सापड़ावहो।”
यीशुन हेरगाम जाणो
6 ओवता ता एक जागे टोलवाय रियेल एता तेवी ता यीशुह फुशा, “एय मालीक, ज्याच कालाम इस्राएलान राज पोशो लाव दिहे काय?”
7 यीशु ताह केयो, “ता टेमाह एने कालाह जाणने जाह आबोख ताच ने आदिकार माय मीलेल हे, तो तुमरो काम नाह सोतो।
8 पुण जेवी चोखालो जीव तुमू पोर आवी तेवी तुमूह ताकेत जुड़ी, एने यरूशलेम एने आखा यहुदिया माय, एने सामरीया माय एने देरतीन कोपरे वोर तुमू मार गोवा रिहो।”
9 ज्यो केयीन यीशु तान देखता देखता उपेर हेरगा माय विसाय गीयो, एने वादेल ताह तान डोलान सामने रेन लीकाड़ लेदो।
10 जेवी ता यीशुह जुगाम जातालो तालताल देखणे बाजरियेल एता, तेवी दिखो, दुय माणहे दोवल्या फाड़का पिरील तान आहने आवीन उबरेय गीया।
11 एने ताह केया, “एय गेलील वाला माणहे तुमू जुगान उगे देखतीन काहा उब रेनाह? ज्योच यीशु तुमू हिऱ्यो रेन उपेर हेरगा माय विसाय जायेल हे, जीह केरीन तुमू ताह हेरगाम जातालो देख्या तिहेच केरीन तो पोशो आवी।”
यहुदान जागे मत्तीयान निवोड़
12 तेवी प्रेरित जेतुन नावान बोयड़ा पोर रेन उतेरना जो यरूशलेम ने आहने एक किलो मिटर सेटो एतो, ता यरूशलेम हेयरा माय पोशा आवा।
13 एने ता आवा तेवी उपेरली खोलीम गीया, ताहरी पतरस, योहान, याकुब एने अन्द्रियास, फिलीपुस एने थोमा, बरतुल्मे एने मत्ती, हलफाईन बिटोख याकुब एने देस बक्त शमोन, एने याकुबान बिटोख यहुदा न्या रेताला।
14 न्या ओलाक जाणे, एने ता हेऱ्यु मोकत्युच बायकु एने यीशुन आहख मरीयम एने यीशुन बायाख हेऱ्यो मिलीन एक मोन केरीन विन्ता केरताला।
15 थोड़ाक दिह्यान पासाण विश्वासी माणहान मिटींग एती, ती टेम माय कोम से कोम एक होव विह माणहे एता, बायाख ने विची माय रेन पतरस उबरीन केणे बाज गीयो,
16 “एय मारा बाय बोणहा, यीशुह बोंदी बाणावणार अगुवा यहुदान बाराम चोखाली पुस्तेक ने लेख माय दाऊदान मुया केरीन चोखालो जीव पेलुच रेन कियेल ईतो, ताह पुरो एणे जोरेवरी एतो।”
17 काहाकाय यहुदा आपणी विचीम रेन एक ईतो, एने ज्या कामाह केरनेन केरता ताह निवाड़ेल एतो।
18 (ज्यो माणुह अन्याय ने कामा माय रेन एक खेत वेचातो लेदो, एने मुंडान बोरहे पोड़नो; एने तान पेट फुट गीयो एने तान आखा आतड्या बाहेर निकेल गीया।
19 एने ज्यी वातीह यरूशलेम हेयरा मायवाला आखा माणहे जाण गीया, तानकेरता तान बाषा माय ता खेतान नाव हकलदमा मतलब लुयीन खेत पोड़ गीयो।)
20 बजन पुस्तेक माय इहकेरीन लिखेल हे:
तान गेर उजेड़ जाय;
एने ता माय कुणीच नाय रेय,
एने तान पोद एगदो दिहरो लेय लेय।
21 “केरीन ज्यो जोरवरी हे काय एक ओहला एदम्याह निवाड़ लेता, जो मालीक यीशुन कामान आखी टेम ने गोवाह हे।
22 यीशु मसी योहान ने द्वारा बपतीस्मा आपाय जाणेन टेम माय रेन ते यीशुन उपेर विसाय जाता वोर जा माणहे बाराबोर आमरी हेऱ्या रेना। हाजो ज्यो हे काय ता माय रेन एक माणुह आपु हेऱ्यो यीशुन पोशो जीव उठणेन गोवा एय जाय।”
23 तेवी ता दुय जाणाह उब राख्या ता माय रेन एक युसूफाह जो बरसबा केवातालो, तान दिहरो नाव यूसतुस एतो एने दिहरो मत्तीया।
24 तेवी ता ज्यी विन्ता केऱ्या, “एय मालीक, तु जो आखान मोन जाणेह ज्यो देखाड़ काय न्या दुयाम रेन तु कुणीह निवाड़ेल हे
25 काय तो ज्यी सेवकाय एने प्रेरितान पोद लेय, जाह यहुदा सोड़ीन तान जागे जात रियेल हे।”
26 तेवी ता तान बाराम चिटठ्यु टाक्या एने चिट्ठी मत्तीयान नावे निकेलनी, एने तो ता ईग्यार प्रेरिता माय गेणाय गीयो।