13
बरनबास एने शाऊलाह निवाड़नो एने मोकेलनो
1 अन्ताकियान मोंडली माय थोड़ाक जाणाव केरनार एने मास्तेर्या एता: जिहकेरीन बरनबास, शिमोन जाह नीगर केताला; एने लुकियुस जो कुरेनी मायवालो हे, एने मनाहेम जान पालेन पोषण राजा हेरोद हेऱ्यो ईयेल एतो, एने शाऊल।
2 जेवी ता उपास देरीन मालीकान सेवा केरने बाजरियेल एता, तेवी चोखालो जीव केयो, “मार केरता बरनबास एने शाऊलाह ता कामान केरता आलेग किऱ्यो ज्यानकेरता मी ताह हादेल हे।”
3 तेवी ता उपास एने विन्ता केरीन एने ता पोर आथ मेलीन ताह वोलाव देना।
साइप्रस माय बरनबास एने शाऊल
4 चोखाला जीवान द्वारे तान वोलावणो एणेन बाद बरनबास एने शाऊल सीलुकीया माय गीया, एने ता रेन डोंडह्या माय बोहीन साइप्रस गीया।
5 एने सलमीस माय पोचीन, ता यहुदिन बोक्ती केरन्या गेरा माय बोगवानान वचनान पारचार केरने सुरवात केऱ्या। एने योहान मरकुस तान मोदेक ने रूप माय ईतो।
6 एने जेवी ता आखा टापु माय रेन चालीन पाफुस वोर पोचना, ताहरी ताह बार यीशु नावान एक यहुदि जादुगार जुठो जाणकार मिलानो।
7 तो आदिकारी सीरगीयुस पौलुसान जोड़ीदार ईतो, जो एकेलदार एदमी ईतो। आदिकारी बरनबास एने शाऊलाह ता फाय हादिन बोगवानान वचन होमेलने होद्यो।
8 पुण एलीमास जादुगार (तान नावान मतलब ग्रीक माय ज्योच हे।) तान विरोद केरीन आदिकारीह बुरहो केरने से रोकणे होद्यो।
9 तेवी शाऊल जो पौलुस बी केवाथे; तो चोखाला जीवा केरीन पुरो एन एलीमास जादुगर ने उगे हास केरीन देखते लेन केयो,
10 “एय आखा कोपेट एने आखी लुच्चाय माय बोरायेल बुतड़ान सोरा! तु जो आखा देरमान दुसमोन। एने मालीकान खेरायीह वाकड़ी केरनेन नाय सोड़हे!
11 एवी देख, मालीकान आथ तार विरोद माय हे; एने तु थोड़ीक टेम वोर आंदलो रिहे एने दिह्यान उजालाह नाय दिखहे।”
तेवी चालोच आदारी एने आदारो तान डोला पोर सावाय गीयो, एने तो न्या पोला सापेलने बाज गीयो काय एगदो तान आथ देरीन ली चाली।
12 तेवी जो काय ईयेल एतो तो देखीन आदिकारी मालीकान हिकवोण पोर रेन बोंगलायीन बुरहो किऱ्यो।
पिसीदियान अन्ताकिया माय पौलुसान पारचार
13 पौलुस एने तान हाती पाफुस रेन डोंडह्या माय बोहीन पंफुलीयान पिरगा हेयरा माय आवा, एने योहान ताह सोड़ीन यरूशलेम माय जात रिनो।
14 ओवता ता पिरगा हेयरा माय रेन निकलीन फिरते फिरतेन पिसीदियान अन्ताकिया माय पोचना, एने विहेवणेन दिह यहुदिन बोक्ती केरन्या गेरा माय जाईन बोह गीया।
15 मुसान नेम एने जाणाव केरनारान पुस्तेक माय रेन वाचणेन पासाण यहुदिन बोक्ती केरन्या गेरान आदिकारी ता फाय केय मोकल्या, “एय बाहख, आमु ज्यो होदतेह काय केदी तुमरी फाय माणहाह उत्साह केरनेन केरता काह वात एय ते किवो।”
16 तेवी पौलुस उबरीन एने आथा केरीन इसारो केरीन केयो,
“एय इस्राएली एने आखा बिगेर यहुदि बोगवानान बोक्ती केरनारे, मार हुमलो!
17 ज्या इस्राएल माणहान बोगवान आमरा डायडायाह निवाड़ लिदो, एने जेवी ता माणहे मीस्र देसा माय पाराया बोणीन रेताला, तेवी तान बोड़ती किऱ्यो। एने मोटली ताकेत केरीन ताह मीस्र देसा माय रेन निकाल लावो,
18 एने तो कोमीत कोमी चालीह वोरह्या वोर उजाड़ी माय तान वेठते रिनो।
19 एने कनान देसा माय तो हात राष्ट्राह खेतेम केर दिनो, तेवी बोगवान ती बुयीह इस्राएलान माणहाह तान आदिकार माय वाट दिनो।
20 एने ज्यो आखो केरने माय कोमीत कोमी साड़े चार होव वोरह्या लागा।”
तान बाद तो शमुएल जाणाव केरनारान टेम वोर ता माय नियाव केरनार ठेरावीन आप्यो।
21 ओवता ता एक राजान मांग केऱ्या, तेवी बोगवान बिन्यामीन वोच माय रेन किशान बिटोख शाऊलाह चालीह वोरह्या वोर तान राजा ठेरायो।
22 ओवता ताह आलेग केरीन दाऊदाह तान राजा बाणायो; जान बाराम बोगवान गोवाय दिनो, “माहु एक माणुह यीशेन बिटोख दाऊद मार मोनान गेत जुड़ जायेल हे; तोच मारी आखी मोरजी पुरी केरी।”
23 एने दाऊदान वोच माय रेन बोगवान तान वायदान गेत इस्राएल फाय एक सोड़ेवणार, मतलब यीशुह मोकल्यो।
24 यीशु तान कामाह सुरवात केरनेन पेल, योहान बपतीस्मा आपणार इस्राएलान आखा माणहान केरता पापा माय रेन मोन फिरावणेन केरता बपतीस्मान पारचार किऱ्यो।
25 जेवी योहान तान सेवा पुरी केरने पोर ईतो, तेवी योहान माणहाह केयो, “तुमू माहु काय सोमेजतेह? मी तो नाह सुतो जान तुमू वाट जोवतेह! पुण दिखो, मार पासाण एक आवण्यो हे, मी ज्यी लायकीन नाह सुतो काय तान पायान खाहड़ाह काडु।”
26 एय मारा इस्राएली बाहख, तुमू जा अब्राहामान सोरा हेते; एने आखा बिगेर यहुदि जा बोगवानान बोक्ती केरतेह, आपणी फाय ज्या सुटकारान वचन मोकलाय जायेल हे।
27 काहाकाय यरूशलेम माय रेणारे एने तान आदिकारी, नाह ता सुटकारो आपणाराह ओलख्या एने नाह जाणाव केरनारान वातु, ज्यी देर विहेवणेन दिह वाचाय जाथे तीह सोमज्या। एने यीशुह गुनेगार ठेरावणेन द्वारा जाणकारान वातुह खेरो साबीत केऱ्या।
28 ता यीशुह मार टाकणेन केरता कायच गुनो ता माय नाह सापोड़नो, तीबी पिलातुसाह मांग केऱ्या काय तो माराय जाय।
29 एने जेवी ता पुस्तेक माय लिखेल यीशुन बाराम आख्यु वातु पुऱ्यू केऱ्या, ते ताह खुरूसखाम पोर रेन उतारीन माहणा माय मेल देना।
30 पुण बोगवान ताह मुरेल माय रेन जीवाड्यो,
31 ता हेऱ्या जा गेलील माय रेन यरूशलेम आयेल एता, तान नेजरीम जुलूम दिह वोर देखाती रिनो। इस्राएल माणहान सामने एवी ताच तान गोवा हेते।
32 एने ता वायदान बाराम जो आपणा बाप दादाह आपेल एतो, तान हाजाली खुबेर आमु तुमूह केतेह।
33 काय बोगवान यीशुह जिवाड़ेन, तोस वायदो आपणा सोरान केरता पुरो किरेल हे; जिहकेरीन बजन माय बी लिखेल हे,
“तु मारो बिटोख हे;
आज मी तुवाह पायदा किरेल हे।”
34 एने बोगवान यीशुह मुरेल माय रेन जीवतो केरीन उठाड्यो काय सेड़नेन केरता माहणा माय पोड़ीन नाय रेय, तानकेरीन तो इहकेरीन कियेल हे:
“मी तुवाह चोखाली एने नाह टेलनार बोरकेत आपुह,
जी मी दाऊदा हिऱ्यो वायदो किरेल हे।”
35 तानकेरता तो उंजु एक बजन माय बी किथे,
“तु तारा विश्वासयोग्य पावराह सेड़ने नाय दिहे।”
36 काहाकाय दाऊद ते बोगवानान मोरजीन गेत तान टेमाम माणहान सेवा पुरी केरीन मोर गीयो, एने तान बाप दादान विचीम माहणा माय बुजाय गीयो, एने तान सेरीर माहणा माय सेड़ गीयो।
37 पुण जाह बोगवान मुरेल माय जीवाड्यो, तो माहणा माय सेड़नो नाह।
38 तानकेरता एय मारा इस्राएली बाय बोणहा, तुमू ज्यो जाण जावो काय यीशुन द्वारा पापान माफीन खुबेर तुमूह होमलावाय जाथे;
39 मुसान नेम तुमूह तुमरा पापा से सोड़ेव नाह सेकतालो, पुण जा माणहे यीशु पोर बुरहो केरतेह, ता आखा तान द्वारा पापा माय रेन सोड़वाय जाती।
40 तानकेरता चेकचेल्या रिवो, जिहकेरीन जाणाव केरनारान पुस्तेक माय जो कियेल हे, तो तुमरी पोर बी नाय गेट जाय:
41 “एय चिहटा केरनारे! दिखो, एने बोंगलायीन मोर जावो!
काहाकाय मी तुमरे दिह्या माय एक काम केरथु,
ओहलो काम काय केदी एगदो तुमू हेऱ्यो तान चेरचा केरी,
ते तुमू केदी बुरहो नाय किरहो!”
42 जेवी पौलुस एने बरनबास यहुदिन बोक्तीन गेरा माय रेन बाहेर निकेलने बाजरियेल एता, तेवी माणहे ताह विन्ता केऱ्या काय आमुह ओंगाणल्या विहेवणेन दिह्या आमुह ज्यु वातु उंजु किज्यो।
43 एने जेवी सोबा खेतेम एय गियी ते जुलूम यहुदि एने बिगेर यहुदिन राय माय आयेल बोकत्या माय रेन जुलूम माणहे पौलुस एने बरनबासान पासाण चाल पोड़ना; एने प्रेरित ताह जुलूम वातु केरीन सोमजाड्या काय बोगवानान गीण माय जीवाय बाणावीन मीलो।
44 ओंगाणल्या विहेवणेन दिह्या गावान आखा माणहे मालीकान वचन होमेलनेन केरता टोलवाय गीया।
45 पुण यहुदि गेरदीह देखीन रागा माय बोराय गीया, एने चिहटा केरती लेन पौलुसान वातीन विरोद माय बोलने बाज गीया।
46 तेवी पौलुस एने बरनबास पाका बोरहाम केया, बोगवानान वचन पेल तुमूह केणेन जोरेवरी एतो; पुण जेवी तुमू ताह नाकारतेह, एने सोताह जेलेमक्यो जीवायीन हाजा नाह ठेरावते, ताहार एवी आमु बिगेर यहुदिन उगे वोलतेह।
47 काहाकाय मालीक आमुह ज्यो उकुम आपेल हे,
“मी तुवाह बिगेर यहुदिन केरता उजालो ठेरायेल हे,
काय आखी देरती वोचाड़ाय जाय।”
48 ज्यो होमलीन बिगेर यहुदि माणहे खुस एना, एने बोगवानान वचनान बोड़ाय केरने बाज गीया; एने जोला जेलेमक्यो जीवायीन केरता ठेराय जायेल एता, ता बुरहो केऱ्या।
49 तेवी बोगवानान वचन ता आखा देसा माय पोसेरने बाज गीयो।
50 पुण यहुदि बोगवानान बोक्ती केरनार्यु बिगेर यहुदि मुखी बायकुह, एने गावान मुखी माणहाह बोड़काया। एने पौलुस एने बरनबासान विरोद केरीन ताह तान एद्दीन बाहेर निकाल देना।
51 तेवी प्रेरित ता माणहान विरोद माय आपणा पायान रेजड़ो जेटकीन इकुनियुम हेयरा माय जात रेना।
52 एने अन्ताकियान विश्वासी खुसी माय एने चोखाला जीवा केरीन पुरा एना।