15
यरूशलेमान सोबा
1 ओवता थोड़ाक माणहे यहुदिया रेन अन्ताकिया माय आवीन विश्वासीह हिकाड़ने बाज गीया, “केदी मुसान नेमान गेत तुमरो खेतना नाय एय ताहार तुमरो सुटकारो नाह एय सिकेत।”
2 ज्यान बाराम जेवी पौलुस एने बरनबास ता हेऱ्या सहमत नाह एता केरीन ता हेऱ्यो जुलूम बोलचाल एनो, तेवी इहकेरीन ठेराया काय पौलुस एने बरनबास एने तान थोड़ाक हाती ज्यी समस्यान समादान ने केरता प्रेरित एने मोंडलीन डायडाया फाय यरूशलेम माय जाय।
3 ओवती मोंडली ताह आदेक वोर पोचाड़ देनी; तेवी ता फीनीके एने सामरीया माय रेन गीया, एने ता ज्यी जाणकारी कितेन गीया काय बिगेर यहुदि माणहे किहीक बोगवाना फाय आवा; ज्यो होमलीन आखा विश्वासी जुलूम खुस एय गीया।
4 जेवी ता यरूशलेम पोचना ते प्रेरित एने मोंडलीन डावाला तान स्वागत केऱ्या, तेवी तो आखो काय केय होमलाया जो बोगवान ता हिऱ्यो किरेल ईतो।
5 पुण फरिसीन टोलान थोड़ाक माणहे जा विश्वास माय आव जायेल एता उबरीन केया, “बिगेर यहुदिह खेतना केरने जोरेवरी हे, एने ताह मुसान नेमान पालेन केरने जुवे।”
6 तेवी प्रेरित एने मोंडलीन डावाला ज्यी वातीन बाराम विचार केरनेन केरता टुलो एना।
7 तेवी जुलूम बोलचाल एणेन बाद पतरस उबरीन ताह केयो, “एय बाहख, तुमू जाणतेह काय जुलूम दिह पेल बोगवान तुमरे माय रेन माहु निवाड़ लिदो काय मार मुया केरीन बिगेर यहुदि हाजाली खुबेर होमलावु, ज्यानकेरता काय ता होमलीन बुरहो केरी।
8 एने आखान मोनाह जाणनार बोगवान आपणे गेत ताह बी चोखालो जीव आपेल हे, एने तान बाराम गोवाय दिनो।
9 एने तान विश्वासान द्वारा तान पापाह माफ केर दिनो; ता माय एने आपणे विची माय काय फारेक नाह मेल्यो।
10 ते एवी तुमू काहा बोगवानान पारेख केरतेह काय विश्वासीन बोची पोर ओहलो वोजो मीलो, जाह नाहते आमरा बाप दादा विस सिकेल एता एने नाह आमु विस सेकतेह?
11 नाह, आमरो ज्यो बुरहो हे काय जिहकेरीन आमरो मालीक यीशुन गीणी माय सुटकारो ईयेल हे; तिहेस तान बी ईयेल हे।”
12 तेवी आखी बिड़ ठावकीस बरनबास एने पौलुसान होमेलने बाज गियी, काय बोगवान तान द्वारा बिगेर यहुदि माय कोहला मोट मोटला चोमेत्कार, एने मोटला काम देखाड़ेल हे।
13 जेवी ता ठावका एना ते याकुब केयो: “एय बाहख, मारी हुमलो!
14 शिमोन केयो काय बोगवान पेलुस रेन बिगेर यहुदि पोर किहीक गीण किरेल हे ता माय रेन तान नावान केरता आखाह एक बाणाव लेय।
15 ज्यी वाती से जाणाव केरनारान वातु बी मीलात्युह,” जिहकेरीन पुस्तेक माय लिखेल हे,
16 “तान पासाण मी पोशो आवुह,
एने दाऊदान पुड़ेल तोम्बु पुशो हुदारूह,
तान टुटेल बितड़ाह पोशो बांदुह
एने मोजबुत केरूह।
17 ज्यानकेरता काय बाकी माणहे बी एने आखा बिगेर यहुदि बी जा मार नावान केवातेह,
मालीकाह होदि।
18 ज्यो तोस मालीक किथे, जो दुनियान सुरवात रेन ज्यी वातीन खुबेर जाणेह देखाड़तीन आयेल हे।”
19 तानकेरता मारो विचार ज्यो हे काय बिगेर यहुदि माय रेन जा माणहे बोगवानान उगे आवतेह, ताह दुख नाय देणे जुवे।
20 पुण आमुह ते ता फाय चिट्ठी लेखीन मोकेलने जुवे; काय ता ओहलो खाणो नाय खाणे जुवे जो रितीन गेत एठो हे काय मुरती पोर चेड़ायेल हे, सिनाला हेऱ्या रेन ता सेटा रेय एने गिलो टिबलीन मारील काल्ला बी जेनवेरान माह एने लुय नाय खाय।
21 काहाकाय जुनाला कालाम रेन गावा गावा माय मुसान नेमान पारचार केरनारे ईती आयेल हेते, एने तो देर विहेवणेन दिह्या बोक्ती केरन्या गेरा माय वाचाय जाथे।
बिगेर यहुदि विश्वासीह चिट्ठी
22 तेवी प्रेरित, डायडाया एने आखी मोंडलीन राय काड़ीन ताहरी रेन थोड़ाक माणहाह निवाड़ लेदा, एने पौलुस एने बरनबास हेऱ्यो अन्ताकिया मोकेलनेन फिसलो केऱ्या। जा माय यहुदा जो बरसबा केवाथे, एने सिलास जो बायाख माय मुखी ईतो।
23 एने तान आथा माय ता इहकेरीन चिट्ठी लेखीन लेय मोकल्या: “अन्ताकिया एने सीरीया एने किलीकीयाम रेणारे बायह्याख जा बिगेर यहुदि माय रेन हेते, ताह प्रेरित एने मोंडलीन डायडायान उगे रेन बायाख नमस्कार।
24 आमु ज्यो होमलेल हेते काय आमु माय रेन काल्लो आदेस लेया बिगेरच थोड़ाक माणहे जाईन तान सोबदा केरीन तुमूह दुख पोचाड्या एती।
25 तानकेरता आखा आमु एकी केरीन मोंगाल्ला, बरनबास एने पौलुसा हेऱ्या थोड़ाक माणहाह निवाड़ेन तुमरी फाय मोकलेल हेते।
26 ज्या ता माणहे हेते जा तान जीव आपणा मालीक यीशु मसीन कामान केरता दोका माय टाकेल हेते।
27 तानकेरता आमु यहुदा एने सिलासाह मोकलेल हेते, जा तान मुया केरीन बी लिखेल हे, त्यु वातु केय देती।
28 काहाकाय चोखाला जीवाह एने आमुह ज्योस ठिख लागो काय जोरेवरी वाती सावाय तुमरी पोर जादा बार नाय टाके,
29 एने मुरतीन सामने चेड़ायेल चिज, एने लुयीह रेन एने गिलो दाबीन मारील जेनवेरान माहाह रेन एने सिनालाह रेन सेटा रिवो। केदी तुमू न्याह रेन सेटा रिहो ते तुमरो हाजो एय। ओंगाण आमरे उगे रेन हाजो।”
30 ताह मोकेल देन पासाण ता अन्ताकियाम गीया, एने ता आखा विश्वासीह टुलो केरीन ती चिट्ठी ताह आप देना।
31 जेवी ती चिट्ठी मोठेस वाचाय गियी, तेवी ता मायवालो उत्साह खुबेर होमलीन जुलूम खुस एय गीया, एने ईमोत जुड़नो।
32 यहुदा एने सिलास ज्या खुद जाणाव केरनार एता, केरीन ता जुलूम वातु से विश्वासीह हिकवोण आप्या, एने दिलासो आपीन मोजबुत केऱ्या।
33 ताहरी ता थोड़ाक दिह रेना एने जा ताह मोकलेल एता, ता फाय पोशो जाणेन केरता विश्वासी ताह सान्ती से मोकेल देना।
34 पुण सिलासाह ताहरी रेणे हाजो लागो।
35 पुण पौलुस एने बरनबास बी अन्ताकियाम रोकाय गीया, एने दिहरा जुलूम माणहा हेऱ्या बी मालीकान वचन होमलावते एने हिकाड़ते रेना।
पौलुस एने बरनबासान आलेग एणे
36 थोड़ाक दिह्यान बाद पौलुस बरनबासाह केयो, “चाला, ता गावा माय जाता, जा आपु मालीकान वचन होमलायेल एता, ताहरी पोशा जाईन आपणा विश्वासी बायाख मिलीन देखता काय ता कोहलाक हेते।”
37 पुण बरनबास ज्यो ईरादो केर लियेल ईतो काय योहान जाह मरकुस बी केतेह आपणी आरही ली जाणेन होद्यो।
38 पुण पौलुसाह लागो काय पंफुलीया माय रेन जो आपुह सोड़ीन जात रियेल ईतो, एने आपु हिऱ्यो काम पुरो एणे वोर नाह रिनो, ताह आरही ली जाणे हाजो नाह सोमज्यो।
39 ज्या पोर रेन तान विची माय ओहलो मोटलो बोलचाल उठनो काय ता एका दिहरा हेऱ्या रेन आलेग एय गीया, एने बरनबास मरकुसाह लेन डोंडह्याम बोहीन साइप्रस जात रिनो।
40 पुण पौलुस सिलासाह निवाड़ लिदो, एने विश्वासीह ता दुयूह मालीकान गीणी माय होप देना एने पौलुस ता रेन जात रिनो।
41 एने सीरीया, एने किलीकीया माय फिरतेन मोंडलीह मोजबुत किरतेन गीया।