27
पौलुसान रोम माय जाणो
1 जेवी ज्यो ठेराव लेदा काय आमु डोंडह्या माय बोहीन इटली जाहु, ते ता पौलुसाह एने थोड़ाक दिहरा आरापीह बी युलीयुस नावान ओगुस्तुस रोमी पलटनान एक आदिकारीन आथा माय होप दिनो।
2 जेवी आमु आसीया ईलाकान दिड़े जा एक अद्रमुत्तियुम ने एक डोंडह्यो दिड़े बेटा माय जाण्यो एतो, आमु डोंडह्या माय चेड़ना एने बोहीन निकली गीया। एने अरीस्तर्खुस नावान थिस्सलुनिक्योन एक मकिदुनि एदमी बी आमरी हिऱ्यो ईतो।
3 दिहरे दिह आमु सेदान हेयरा माय पोचीन डोंडह्याम रेन उतेरना, तेवी युलीयुस पौलुसा पोर गीण केरीन पौलुसान जोड़ीदार फाय जाणे दिनो। काय ताह लागणार जोरवुत ने वोस्तु ता आप सेकी।
4 ता रेन आमु देरीयान वाटे पोशा चाल पोड़ना, काहाकाय वारो आमरो हुम्बो एतो, केरीन आमु डोंडह्याह साइप्रसान आड़ावे निकेलना।
5 एने जेवी आमु किलीकीया एने पंफुलीयान देरीयान दिड़े रेन निकेलना, ते लुसीयान मुरा माय उतेरना।
6 ताहरी आदिकारीह आलेकजांडरीयान एक डोंडह्यो इटली जातालोन मिलनो, एने तो आमुह ता माय बोहाड़ दिनो।
7 जेवी आमु जुलूम दिह वोर बागे बागे जाईन जुलूम केठीण माय रेन कनिदुस ने सामने पोचना, ते ज्यानकेरता काय वारो आमुह ओंगाण जाणे नाह देतालो, केरीन आमु क्रेते टापुन आड़ावे सलमोन ने सामने गीया।
8 ओवता आमु जुलूम केठीण माय रेन तान दिड़े दिड़े सुरक्शीत टापु नावान जागे पोचना, ता रेन लसया गाव जुलूम आहने एतो।
9 एने आमु ता जुलूम दिह रेना, एने तोलास माय उपासान दिह बी पुरा एय जायेल एता, केरीन ती टेम माय देरीया पोर रेन जाणे तेकलीतान एतो, केरीन पौलुस ताह ज्यो चेतावणी देयीन केयो,
10 “एय एदमी, माहु ओहलो मालुम पुड़ेह काय ज्या देरीयाम जाणे माय माल एने डोंडह्यान ओलोस नाह, पुण आपणा जीवाह बी दुको एण्यो हे।”
11 पुण आदिकारी पौलुसान वातीह रेन डोंडह्यान मालक्यान एने डोंडह्यो चालाड़नारान वातीह जादा मान्यो।
12 ज्यो टापु हियालान दिह काड़णेन केरता हाजो नाह एतो; तानकेरता मोकता जाणान विचार ईनो काय ता रेन निकले, एने एय सेकी ते फीनिक्स ने क्रेतान टापु माय जाईन हियालो काड़े, जान मुय दक्शिण पुर्व एने उत्तर पश्चिम ने उगे हे।
देरीया माय वादोण वारो
13 जेवी दक्शिण उगे वारो आवो ते क्रेतान दिड़े रेन डोंडह्याह ओंगाण ओंगाण हेरकावणे बाज गीया।
14 पुण थोड़ीक टेम माय बुईन उगे रेन एक मोटलो “उत्तर पुर्व” नावान वादोण वारो आवो।
15 जेवी वादोण डोंडह्या हेऱ्यो ठोकाय गीयो, तेवी वादोणान कारेण डोंडह्यो ओंगाण नाह जातालो ते आमु कोसीत केरने सोड़ देना एने डोंडह्याह वारा हेऱ्या जा जाय ता जाणे देना।
16 तेवी कोदा नावान एक आत्यास बेटान आड़ाव माय रेन वोयते वोयते, आमु केठीण माय रेन जीवणान डोंडह्याह काबा माय केर सेकना।
17 ओवता डोंडह्या चालाड़नारे आतल्या डोंडह्याह विशा एने डोंडह्याह बुंदे रेन उपेर वोर राही केरीन वेटालीन बांद देना। एने लीबिया रेटा माय फोस जाणेन बिय से पाल एने सोमान उतारीन वोयाड़तेन जात रेना।
18 जेवी वादोणान वोजेसे आमरो जुलूम बुरो हाल एणे बाज गीयो, ते दिहरे दिह ता डोंडह्या माय रेन थोड़ोक माल टाकणे बाज गीया,
19 एने तीसरे दिह ता तान आथा केरीन डोंडह्यान सोमान बी टाक देना।
20 जेवी जुलूम दिह वोर दिह्या दिह नाह उगनो एने नाह ते राती चांदण्या देखाना, एने मोटलो वादोण वारो चालते रिनो। ते सेवली बुखेत आमरे वोचणेन आखी आसा जाणे बाज गियी।
21 जोला डोंडह्या माय जाणे बाजरियेल एता, ता आखा जुलूम दिह वोर बुखल्यास रेना। तेवी पौलुस तान विची माय उबरीन केयो, “एय माणहे, क्रेते रेन नाह आवणेन सला मान लेता; ते तुमू नुकसान से वोच जाता।”
22 पुण मी एवी तुमूह विन्ता केरथु, “वातड़ी साती मीलो; काहाकाय तुमू माय रेन कुणीन बी जीव खेतेम नाय एय, पुण डोंडह्यान ओलोच नुकसान एय।
23 काहाकाय जा बोगवानान मी सेवक हे एने जान मी बोक्ती केरथु, ता बोगवानान एक हेरोगदुत आज राती मार फाय आवो,
24 एने केयो, ‘एय पौलुस बिय मा! काहाकाय तुवाह रोमान राजान ओंगाण उबरेणु हे। देख बोगवान तान गीण माय तुवाह एने जा तार हेऱ्या डोंडह्याम हेते ता सोबान जीवाय वोचाड़नु हे।’
25 तानकेरता एय बाहख! वातड़ी साती मीलो; काहाकाय मी बोगवाना पोर बुरहो केरथु जिहकेरीन माहु केय मीलेल हे, तिहेच केरीन एय।
26 पुण आपुह डोंडह्याह बेटान मीरे ली जाणे पोड़ी।”
27 जेवी चोवदावी रात आवी, एने बुमद्य देरीया माय बोटकेते फिरने बाजरियेल एता। तेवी डोंडह्याह चालाड़नारे ज्यो अनुमान लागाड़ लेदा काय आपु एगदा मेरान आहने जाय पुचील हेते।
28 ता देरीयान उंडवाय माप्या ते चार विह आथ निकेलनो, एने थोड़ोक उंजु ओंगाण जाईन पोशा पाण्यान उंडवाय माप्या; तेवी तीन विह आथ निकेलनो।
29 तेवी दिगोड़ ठोकाय जाय केरीन बियीन ता डोंडह्याह उब राखाड़नेन केरता डोंडह्यान पासाण चार लंगर टाक देना, एने उजालो एणेन केरता विन्ता केरने बाजरियेल एता।
30 तेवी डोंडह्यो चालाड़नारे ता रेन नाह जाणे होदताला, एने डोंडह्यान ओंगाण लंगर टाकणेन बाहानो केरीन आतल्या डोंडह्याह देरीयाम उतार देना।
31 पुण पौलुस सिपायड़ान आदिकारीह एने सिपायड़ाह केयो, “केदी ज्या डोंडह्या पोर नाय रोकाती, ते तुमू बी वोच नाह सिकहो।”
32 तेवी सिपायड़ा राह्यु तोड़ीन आतल्या डोंडह्याह पाड़ देना।
33 जेवी उजालो एण्योच एतो तेवी पौलुस विन्ता केरीन आखाह रूटो खाणेन केरता सोमजाड्यो, “आज चोवदा दिह एय गीयाह, तुमू आसा देखते देखतीन बुखल्या रेना, एने काय खाणो नाह खादा।
34 मी तुमूह रूटो खाणेन ज्यानकेरता विन्ता केरथु काय तुमूह जीवतालो रेणु हे। काहाकाय तुमरे माय रेन कुणीन बी मुंडान एक लेट्यो बी नाय उखली सेकी।”
35 एने इहकेरीन केयीन पौलुस रूटो लेन ता आखान ओंगाण बोगवानाह दन्यवाद केरीन खाणे बाज गीयो।
36 तेवी ता माय ईमोत आवी, एने रूटो खाणे बाज गीया।
37 आमु आखा मिलीन डोंडह्या माय दुय होव शाहत्तर जाणे एता।
38 जेवी ता पेट बोरीन रूटो खादा, ओवता गोवाह दाने देरीया माय टाकीन डोंडह्याह ओलवो केरने बाज गीया।
डोंडह्यान टुटणो
39 जेवी दिह उगनो, तेवी ता आखा ता देसाह नाह ओलख्या, पुण देरीयान एक मिरो देखानो, तो चार खुणान ईतो, ता विचार केऱ्या काय ज्या पोर डोंडह्याह उबराखाड़ देता।
40 तेवी ता लंगराह सोड़ीन देरीया माय सोड़ देना, एने तुलेचबूखी पतवारान बोंदेन सोड़ देना, एने डोंडह्यान सामनेन पाल सोड़ देना काय आपु मेरान उगे चाल पोड़ी।
41 पुण डोंडह्यो दुय देरीयान मेलान रेटा माय ठोकानो; एने डोंडह्यान ओंगाणल्यो खुणो पुरो गाड़ाय गीयो, एने पासाणल्यो ईसो वारान जेलखान जोराम टुटणे लाग गीयो।
42 तेवी सिपायड़ा आरापीह मारनेन विचार केऱ्या, काय ताम रेन कुण बी जेफीन बाहेर नाय निकेलने जुवे।
43 पुण सिपायान आदिकारी पौलुसाह वोचाड़ने होदतालो, तो ताह इहकेरीन केरने नाह दिनो एने ज्यो केयो। जाह जेफता ओवेड़तेय ता जेफीन बाहेर निकील जावो;
44 बाकी माणहे पाटड्या एने डोंडह्यान दिहऱ्यु वोस्तुन साहारे निकली जावो, इहकेरीन आखा माणहे वोचीन मीरे निकली गीया।