11
1 तुमू मार गेत चालु जीहे मी मसीन गेत चालथु।
विन्ता माय मुंड डापणु
2 एय बाय बोणहा, मी तुमूह हाजो केथु, काय आखी वातु माय तुमू माहु ईर केरतेह; एने जो नेम मी तुमूह होपेल हे, तान पालेन केरतेह।
3 पुण मी होदथु काय तुमू ज्यो सोमजी लेय काय एकेक एदमीन मुंड मसी हे, एने बायकुन मुंड एदमी हे, एने मसीन मुंड बोगवान हे।
4 जो एदमी मुंड ढापीन विन्ता एने बोगवानान उखीर रेन जाणाव किरेह, तो सोतान मुंडान ईजुत उड़ावीह।
5 पुण जी बायकु उगाल्लो मुंड लेन विन्ता एने बोगवानान उखीर रेन जाणाव किरेह, ती सोतान मुंडान ईजुत उड़ावीह, काहाकाय ती टाली एणेन बाराबोर हे।
6 केदी बायकु फाड़कु नाय पांगरी ते लेट्या बी काटाड़ लेय; केदी बायकुन केरता लेट्या काटणो एने टाली केरनो लाजावणेन वात हे, ते फाड़कु पांगरी।
7 होव एदम्याह तान मुंड ढापणे हाजो नाह सोतो, काहाकाय तु बोगवानान वेह एने बोड़ाय हे, पुण बायकु एदम्यान बोड़ाय हे।
8 काहाकाय एदमी बायकुम रेन नाह बुणील, पुण बायकु एदम्याम रेन बुणेल हे;
9 एने एदमी बायकुन केरता नाह बुणेल सुतो, पुण बायकु एदम्यान केरता बुणेल हे।
10 ज्यानकेरता एने हेरोगदुतान कारेण बायकुह हाजो हे काय आदिकारान निसाणी सोमजीन सोतान मुंड ढापी।
11 तीबी बोगवान माय एकीन कारेण बायकु रेन एदमी आलेग नाह, एने एदमी बायकु रेन आलेग नाह।
12 काहाकाय बायकु एदम्या माय रेन बुणेल हे, तिहेस केरीन एदमी बी बायकुन द्वारे पायदा ईथे, पुण जो सोब बोगवानान उगे रेन आयेल हे।
13 तुमू सोतास विचार किरो, काय बायकुह उगाल्लो मुंड लेन बोगवानाह विन्ता केरनो होबा दिथे।
14 दुनियान रितीन गेत तुमू नाह जाणते, केदी एदमी लाम्बाला लेट्या मेली ते तान केरता ईजुत उड़ावणेन बाराबोर हे।
15 पुण केदी बायकु लाम्बाला लेट्या मेली ताहार तीन केरता होबा हे, काहाकाय लेट्या तीह मुंड ढापणेन केरता आपेल हे।
16 पुण केदी कुण बोलाचाल केरने होदि, ते ज्यो जाण लेय काय नाह आमरी एने नाह बोगवानान मोंडलीन ओहली रिती हे।
मालीकान खाणान बारामाय
17 पुण ज्यो उकुम आपतेन मी तुमरी बोड़ाय नाह किरेत, जेवी तुमू बोगवानान बोक्ती केरनेन केरता एकठा टोलवातेह, तेवी हाजो नाह ईत, पुण नुकसान ईथे।
18 काहाकाय पेल ते मी ज्यो होमेलथु, काय जेवी तुमू मोंडली माय एकठा एतेह ताहार तुमरा माय फुट ईथे, एने मी ज्यी वातु पोर थुड़ थुड़ो बुरहो बी केरथु।
19 काहाकाय बेदबाव बी तुमू माय एय, ज्यानकेरता काय जा माणहा तुमू माय खेरा हेते ता देखाय जाती।
20 तान केरता जेवी तुमू एक जागे एकठा एतेह, ते ज्यानकेरता नाह काय मालीकान खाणो खाय।
21 काहाकाय खाणेन बुखेत एक दिहराह रेन पेल सोतान खाणो खाय लेतेह, इहीचकेरीन कुण ते बुखल्यो रिथे, एने एगदो ते पियेन दुंदवाय जाथे।
22 काय खाणे पिणेन केरता तुमरो गेर नाह सोतो? एने बोगवानान मोंडलीह खाराब जाणतेह, एने जा फाय नाह सोतो ताह लाजवाड़तेह? मी तुमूह काय केव? एने काय मी तुमरी बोड़ाय केरू? नाह; ज्यी वातुन केरता मी तुमरी बोड़ाय नाय केरूह।
23 काहाकाय ज्यी हिकवोण माहु मालीक फाय रेन जुड़नीह एने मी तुमू फाय बी पोचाड़ दिनो, जी राती मालीक यीशु देराव दियेल, रूटो लिदो,
24 एने बोगवानान उपकार मानेन ता रोटाह मुड़ीन केयो, “ज्यो मारो सेरीर हे जो तुमरी केरता आपाय जायेल हे, मारी इर ने केरता ज्योस केऱ्या किरो।”
25 तिहेस केरीन खाणो खाणेन पासाण वाटको लिदो एने केयो, “ज्यु वाटको मारी लुय माय नोवाली वायदो हे, जुलबुखे बी पिहो, ते मारी इर ने केरता ज्योस केऱ्या किरो।”
26 काहाकाय जाह वोर तुमू ज्यु रूटो खातेह एने ज्या सिंगुल माय रेन पितेह, ते मालीकान मोतीह जाह वोर तु नाह आवीत, पारचार केरती रिवो।
27 तानकेरता जो कुण गेलेत रिती माय मालीकान रूटो खाय एने तान वाटका माय रेन पिय, तो मालीकान सेरीरान एने लुयान गुनेगार ठेराय।
28 तानकेरता माणुह सोताह पारेख लेय एने इहीचकेरीन ज्या रोटा माय रेन खाय, एने ज्या सिंगुल माय रेन पिय।
29 काहाकाय जा खाणे पिणे बुखेत मालीकान सेरीराह नाय उलखे, तो ज्या खाणा पिणा पोर रेन सोतान उपेर डेंड लावतेह।
30 जीह केरीन तुमरा माय मोकतास कोमजोर एने दुखाऱ्या हेते, एने मोकतास मोरी बी जायेल हेते।
31 केदी आपु सोताह पारेखता ते बोगवाना उखीर रेन डेंड नाय लेता।
32 पुण बोगवान आपुह डेंड आपीन आपुह सेजा आपेह, ज्यानकेरता बोगवान आपणो नियाव केरीन दोसी नाय ठेराहो।
33 तानकेरता एय मार बाय बोणहा, जुलबुखे तुमू मालीकान खाणो खाणेन केरता टुलो एतेह, ते एका दिहरान केरता थोब्या किरो।
34 केदी एगदाह बुख लागतेय ते तान गेरूस रूटो खाईन आवी, ताकाय जेवी तुमू टुलो एतेह, ते डेंडान कारेण नाय एय, रियेल वातुह मी आवीन ठिक केरूह।