4
माटड्यान ठामलाम देन
1 तानकेरता जेवी आमु पोर ओहली गीण एनी काय आमुह जी सेवा जुड़नी, ते आमु ईमोत नाह सोड़ते।
2 पुण आमु लाज आवी ओहला कामे सोड़ देना, एने नाह मोठाय माय चालते, एने बोगवानान वचन माय सोतान फायदान केरता बेचेक केरती नाह; पुण खेरायीह देखाड़ीन बोगवानान ओंगाण एकेक माणहान मोना माय आपणे आपाह हाजा ठेरावतेह।
3 एने आमरी हाजाली खुबेर जी आमु होमलाड़तेह तान कारेण ज्यो पुड़दो पुड़ेल हे, ते जो खेतेम एणारान केरता पुड़ेल हे।
4 एने ता अविश्वासीन केरता जान इकेल ज्या दुनियान देव जो सैतान हे आंदलो केर दियेल हे। काहाकाय मसी जो बोगवानान वेह रूप हे तान चोमेकणार हाजाली खोबरीन उजालाह ता देख नाय सेकी।
5 आमु ते आमरो नाह पुण यीशु मसीन पारचार केरतेह काय तो मालीक हे, एने आमु सोता यीशु मसीन कारेण तुमरा पावोर हेते।
6 काहाकाय बोगवानुच हे जो कियेल, “आंदारा माय उजालो चोमके,” एने तोस आमरा मोना माय चोमेकनो काय बोगवानान बोड़ाय ने ओलखातान उजालो यीशु मसीन मुया केरीन उजालो एय।
7 पुण आमु माटड्यान ठामलाम गेत हेते, जा माय आत्मिक मालदेन हे। ज्य देखाड़नेन केरता काय मोटली ताकेत आमरी उगे रेन नाह, पुण बोगवानाच उगे रेन ठेराय।
8 आमु चार उगे रेन सेंकेट वेटतेह, पुण खेतेम नाह केराते, एने काईच नाह जुड़ेत, पुण नाराज नाह एते;
9 माणहे पाड़ ते देतेह, पुण खेतेम नाह एते, एने माणहे सेतावतेह ते खोरा, पुण एखाला नाह पोड़ते।
10 आमु यीशुन मोतीह आमरा सेरीरा माय आखी टेम ली फिरतेह, काय यीशुन जीवाय बी आमरा सेरीरा माय देखाय।
11 काहाकाय आमु जा जीवणे बाजरेनाह, कायेम यीशुन कारेण मोतीन आथाम होपाय जातेह काय यीशुन जीवाय बी आमरा मुरेल सेरीर माय देखाय।
12 ज्यानकेरता मोत ते आमु माय, पुण जीवाय तुमू माय काम किरेह।
13 तानकेरता आमरे माय तास बोरहान जीव हे, जान बाराम देरेम पुस्तेक माय लिखेल हे, “मी बुरहो किरेल तानकेरता मी बुलेल।” एने आमु बी बुरहो केरतेह, तानकेरता बोलतेह।
14 काहाकाय आमु जाणतेह काय जो बोगवान मालीक यीशुह जिवाड़ेल हे, तोच आमुह बी यीशु माय गोवांद्यो जाणीन जीवाड़ी, एने तुमरी हिऱ्यो आमुह बी तान ओंगाण उबो केरी।
15 काहाकाय आख्यु वोस्तु तुमरी केरता हेत्यु, ताकाय गीण मोकतास माणहा फाय जाथे तान द्वारे होवटो एन बोगवानान बोड़ाय ने केरता दन्यवाद बी वोदाड़े।
बोरहा माय जीवणु
16 तानकेरता आमु ईमोत नाह सोड़ते, एने आमरो बाहेरल्यो सेरीर खेतेम ईती जाथे, पुण आमरो मायवालो सेरीर दाड़ीन दिह नोवालो ईती जाथे।
17 काहाकाय आमरो दुख जो थोड़ीक वार ने केरता हे, आमरे केरता जुलूम मोहत्वान केरता हे, एने आमरी जेलेमक्यो बोड़ाय ली आवीह।
18 एने आमु ते दिखेल वोस्तुह नाह, पुण नाह दिखेल वोस्तुह देखती रेतेह; काहाकाय दिखेल वोस्तु थोड़ास दिह्यान हे, पुण नाह दिखेल वोस्तु जेलेमक्यो बोणीन रिथे।