9
हाती मसी माणहान केरता मोदेक
1 एवी ती सेवान बाराम जी यहुदिया माय बोगवानान माणहान केरता केराय जाथे, माहु तुमरी केरता लेखणेन जोरवुत नाह सोती।
2 काहाकाय मी तुमरा मोनान तियारीह जाणथु, ज्यान कारीन मी तुमरी बाराम मकादुनिया वालान ओंगाण मोठाय केरथु काय आखायान माणहे एक साल रेन तियार एय रेनाह, एने तुमरो ईमोत उंजु बी मोकतास माणहाह तियार किरेल हे।
3 पुण मी बायाख ज्यानकेरता मुकलेल हे काय आमु जो मोठाय तुमरा बाराम केरतेह, तो ज्यी वातु माय फालतुक नाय ठेराय; पुण जिहकेरीन मी तुमूह कियेल तिहेस केरीन तियार रिज्यो,
4 ओहलो नाय एय काय केदी एगदो मार हेऱ्यो मकादुनिया रेन आवी, एने तुमूह तियार नाय देखी, ज्या बोरहान कारेण आमुह एने तुमूह बी लाजवाणे पोड़ी।
5 तानकेरता मी बायाख ज्यी विन्ता केरनेन जोरवुत सोमजेल काय ता पेलुस तुमरी फाय जाती, एने तुमरा सोतान मोरजीन फोल जान बाराम पेलुच रेन वायदो आपायेल एतो, तियार केर मेली काय ज्य दाबाव माय नाह पुण सोतान मोरजीन फोलान गेत तियार एय।
पुरा मोना केरीन दान आपणु
6 पुण वात ज्यी हे: जो थोड़ोक पिरेह, तो थोड़ोक काटती बी; एने जो मोकतोस पिरेह, तो मोकतोस काटी।
7 एकेक जिहकेरीन मोनाम ठाणी तिहेस केरीन दान केरी; एने नाह कुड़कुड़ावीन एने नाह दाबाव से काहाकाय बोगवान खुसी से आपणाराह मोंग किरेह।
8 बोगवान आखी बातीन गीण तुमूह जुलूम होवटो आप सेकीह, ज्याह रेन आखी वातु माय एने आखा टेम माय आखो काय, जो तुमूह जोरवुत हे तुमू फाय रेय; एने एकेक बातीन हाजा कामान केरता तुमू फाय जुलूम काय रेय।
9 जिहकेरीन देरेम पुस्तेक माय लिखेल हे:
“तो पुरा मोन से गेरब्याह दान आप्यो;
एने तान खेराय जेलेम बोणीन रेय।”
10 जो पेरनाराह बिज एने खाणेन केरता रूटो आपेह, तो तुमूह बिज आपी, एने ताह फोलदार केरी एने तुमरा पुरा मोनान फोलाह वोदाड़ी।
11 तुमूह एकेक वातु माय मालदार बाणाय जाहो। ज्यान वोजेसे आखा माणहे बोगवानान दन्यवाद केरती।
12 काहाकाय ज्यी सेवाह पुरो केरने से बोगवानान माणहान जोरवुत पुरी ओलीस नाह ईत, पुण माणहान उगे रेन बोगवानान बी जुलूम दन्यवाद केरती।
13 ज्यी सेवाह पुरावो मानेन बोगवानान बोड़ाय केरतेह, काहाकाय तुमू मसीन हाजाली खोबरीह मानेन तान ताबा माय रेतेह; तान एने आखान मोदेक केरने माय खुसी रेतेह।
14 एने ता तुमरी केरता मोटला मोंग माय विन्ता केरतेह, ज्यानकेरता काय तुमू पोर बोगवानान मोटली गीण हे।
15 बोगवानान ता दानान केरता जो गेणतीह रेन बाहेर हे। दन्यवाद एय!