3
1 जेवी तुमू मसी हेऱ्या जीवाड़ाय गीया, ते आपणा मोनाह हेरगावाली वोस्तुन होद माय रिवो जाहरी मसी हे, एने बोगवानान जीवड़े उगे बोह रियेल हे।
2 देरती पोर वाली नाह पुण हेरगावाली वोस्तु पोर आपणो मोन लागाड़ो।
3 काहाकाय तुमू ते मोर जायेल हेते एने तुमरी जीवाय मसी हेऱ्यी बोगवाना माय लीकाय रेनीह।
4 जेवी मसी जो आमरी खेरली जीवाय मसी हे, देखाय, तेवी तुमू बी ता हेऱ्या बोड़ाय हेऱ्या देखाड़ाय जाहो।
जुनाली एने नोवाली जीवाय
5 तानकेरता आपणा ता जेगान मोरजीह मार टाको, जी तुमू माय काम किरेह, मतलब सिनालो, एठोपोणा, खाराबपोणा, खाराब लालचाय एने लोबाह जो मुरती पुजान बाराबोर हे।
6 काहाकाय ज्यु वातीन वोजेसे जा बोगवानान वातु नाह मानतेह ता पोर बोगवानान राग आवी।
7 एने एक टेम एतो, तेवी तुमू बी ओहली आसा माय जीवताला, एने तुमरो जिवणो ताच ने आदिकार माय एतो।
8 पुण एवी तुमू बी जी आखी वातुह आखाह मतलब राग, लालसा, बेदबाव, चिहटा, एने तुमरा मुया केरीन जुलने ज्यो आखो तुमरी हेऱ्या रेन सेटा किरो।
9 एकमेकाह जुठ मा बोलो, काहाकाय तुमू जुनाला तान आदेत निकाल दियेल हेते।
10 एने जो नोवालो माणुह, आपुह बाणावणारान वेह रूपान गेत पुरी एकली माय नोवालो इती जाथे, ताह तुमू पिर लियेल हेते।
11 एने ज्यान परिणाम ज्यो हे काय तो यहुदि एने बिगेर यहुदि माय काय फारेक नाह रेत, एने नाह तो काल्ला खेतान किरेल माय नाह खेतना रहित माय एने नाहते सब्य नाहते असब्य माय। नाह गुलाम नाह सुटेल माणहा माय, पुण मसीच आखो हे, एने आखा माय तान वास हे।
12 एने तुमू बोगवानान माणहे हेते; तो तुमूह मोंग किरेह एने तान आपणा बोणनेन केरता निवाड़ेल हे, ते ओवतो मोटली गीण, बोलाय, गेरबोड़ाय, नम्रता एने दिराह पिरो।
13 एकमेकान सेहेन किरो, एने एगदान एगदा हेऱ्यी राड़ एय ताहार एकमेकान माफ किरो; मालीक तुमरा गुना माफ किऱ्यो, तिहेच केरीन तुमू बी एकमेकाह माफ किरो।
14 एने जी वातुन अतिरीक्त मोंगाह पिरो, मोंगुस आखाह आपसाम बांदणे एने परिपुर्ण केरने।
15 तुमरा लेणारा निर्णय पोर मसी फाय रेन जुड़णार सान्तीन मार्गदर्शन रेय, ज्यास ने केरता तुमूह बोगवान एकठोस ती सान्ती माय एक सेरीर बोणनेन केरता हादिल हे।
16 मसीन वचनाह तुमरा मोना माय मोकतोस रेणे दिवो, एने तुमू आखी बुद्दी माय एका दिहरा हिक एने चेतावणी दिते रिवो, बजन, स्तुती एने चोखाला गीते गावतीन आपणा मोना माय बोगवानाह दन्यवाद दिते रिवो।
17 जो काय बी तुमू किरो नाहते किवो, तो आखो मालीक यीशुन नावा केरीन किरो, एने तान द्वारे आबाख बोगवानान दन्यवाद किरो।
नोवाली जीवायीन कुटूमान नेम
18 एय बोणह्युख, जिहकेरीन मसी माय अनुयायीह होबीह, तिहेच केरीन आप आपणा एदम्यान ताबाम रिवो।
19 एय एदमी, आप आपणी बायकुह मोंग किरो, एने ती हेऱ्या खाराब वेवार मा किरो।
20 एय सोरा, तुमू आखी वातुम कायेम आपणा आईख आबाख ने उकुम मानो, काहाकाय मसीह अनुयायीन ज्या व्यवहारा से बोगवान खुस एणे।
21 एय आहख आबाख तुमरा सोराह राग मा लागाड़ो, इही नाय एय काय तान ईमोत तुट जाय।
22 एय सेवक, माणहाह खुस केरनेन गेत देखाड़नेन केरता नाह पुण बोगवानाह बिते लेन मोनान खेराय केरीन तान आखी वातु माय उकुम मानो जो देरती पोर तुमरा मालीक हेते।
23 जो काय काम तुमू केरतेह तो आपणा पुरा मोना केरीन किरो, ज्योस सोमजीन काय तुमू माणहान नाह, पुण मालीक ने काम केरतेह।
24 एर मिलो काय ज्यान फोल तुमूह मालीक आपी, काहाकाय मसीच खीरलो मालीक जा सेवा तुमू केरतेह। ज्यो जाणते लेन काय तुमूह मालीक से फोल जुड़ी। तुमू आपणो मालीक मसीन सेवा केरती रिवो।
25 काहाकाय जो बुराय किरेह, तो तान बुरायीन फोल सापड़ावी; काहाकाय बोगवान कुणीन बी नुकसान नाह केरने।