इफिसीयो पौलुस ने लिखा हुआ पत्र
इफिसीयो पौलुस लिखेल पोत्रो
ओलखात
मसीन जेल्मान 60 वोरह्यान पेल ज्यी इफिसीयोन पोत्री कुलीसियोन पोत्री हेऱ्यी एकठी लेखाय जायेल हे। प्रेरित पौलुस ज्यी ओलखात आपेह काय तोस पोत्रीह लेखणार हे। 1:1
कुलीसियोन पोत्रीन गेत ज्यी पोत्री माय बी होवटोह ते पोंडीतान ज्यो मान्नो हे काय पौलुस ज्यी पोत्रीह लिख्यो एय तानकेरता ईलाकान आलेग आलेग मोंडली माय ज्यी पोत्री फिरावीन वाचाय जाय इहकेरीन पौलुसान इरादो एय सिकेह, जेवी तो ज्यी पोत्रीह लिखेल तेवी पौलुस किथे काय तो जेली माय ईतो। 3:1; 4:1; 6:20 जेवी तुखीकुस इफिसीयोन मोंडलीह मिलने इफिसुस जाणे बाजरियेल ईतो तेवी पौलुस ज्यो पोत्रो तान आथाम लेन मोकलेल। 6:21-22
इफिसीयो जुलूम मोठो हियोर ईतो ती नेम माय आसीया खेड़ान ती राजदानी एती हेयरा माय अरतीमीस नावान ग्रीक देवतान मोटलो नाव गाजेल मोंदिर एतो ता माय ताह जुलूम नाव लायेल एती प्रेरितान काम 19:23-31 ज्यो इफिसुस वाली मोंडलीन सुरवात मोजबुत रिती से ईयेल पुण पासाण ती कोमजोर देखाताली। प्रकाशितवाक्य 2:1-7 बोगवान तान माणहाह निवाड़ेन यीशु मसीन द्वारे किहीक तान पापा माय रेन सोड़ायेल ज्यी वात पौलुस पोत्रीन पेल्ला ईसा माय साप देखाड़ेह तो मोंडलीन तुलना ता सेरीरा हिऱ्यो किरेह जान मुंड मसी हे एने ती आवाली हिऱ्यो किरेह जीन कोपरान दिगोड़ मसी हे पुस्तेकान दिहरा ईसा माय पौलुस मसी जीवाय किहीक जीवणे जुवे तान बाराम लिखेल हे।
रूपरेखा
1. पौलुस सोता ओलखात आपीन इफिसीयोह नमस्कार किथे। 1:1-2
2. बाद माय तो मोंडलीन नातो कोहलो रेणे जुवे तो साप देखाड़ेह। 1:3–3:21
3. बाद माय पौलुस मसी किहीक जीवणे जुवे ज्यान वाट देखाड़ेह। 4:1–6:20
4. पौलुस आखरी सोबदो लेखीन खेतेम किरेह। 6:21-24
1
नमस्कार
1 पौलुसान उगे रेन जो बोगवानान मोरजी माय मसी यीशुन प्रेरित हे, इफिसुस माय बोगवानान माणहाह, जा मसी यीशु हेऱ्या तान जीवन माय बुरहो केरनारे हेते।
2 आमरो आबोख बोगवान एने मालीक यीशु मसीन उगे रेन तुमूह गीण एने सान्ती जुड़ते रेय।
मसी यीशु माय आत्मिक बोरकेत
3 आमरा मालीक यीशु मसीन बोगवान एने आबाख ने दन्यवाद एय काय तो आमुह मसीन द्वारा आखी बातीन हेरगावाल्यु आत्मिक बोरकेत आपेल हे।
4 जिहकेरीन तो आमुह केल बोणनेन पेल ता माय निवाड़ लियेल हे! काय आमु तान आहने मोंग माय चोखाला एने निर्दोस रेय।
5 एने तान मोरजीन हाजी योजनान गेत आमुह तान केरता पेलुस रेन ठेरायेल हे काय यीशु मसीन द्वारा आपु बोगवानान गोद लियेल सोरा एने सोर्यु एय।
6 बोगवानान बोड़ायीन गीण ने स्तुती एय, काहाकाय जीह तो तान मोंगाल्ला सोरान द्वारे आमुह फुकेट आपेल हे।
7 आमुह मसी माय तान लुयीन द्वारे सुटकारो, मतलब पापान माफी, बोगवानान ती गीण ने देनान गेत जुड़ेल हे।
8 जीह तो तान इकेल एने सोमेज ने वापेर केरीन आमु पोर मोकतोस किरेल।
9 काहाकाय बोगवान तान मोरजीन मालमात, तान हाजा उद्देशान गेत देखाड़ेल हे, जो तो खुद मसी माय स्थापित किरेल ईतो।
10 बोगवानान जी योजना एती काय ठिक टेम आवणे बुखेत हेरगान एने देरतीन आख्यु चिजीह टुलो केरी काय मसी तान आदिकारी एय।
11 मसी माय आमु पेलुस बोगवानान माणहे केरीन तान योजनान गेत निवड़ायेल ठेराय गीया, जो आखी वातु तान मोरजीन गेत केरने,
12 एने जा मसी पोर आमु पेलुस आसा मीलेल एता, काय आमु तान बोड़ायीन स्तुती केरी।
13 जेवी तुमू खेरलो पारचार होमल्या एने ती हाजाली खोबरी केरीन तुमरो सुटकारो एनो, एने तुमू बी बोगवानान माणहे बोण गीया। एने चोखालो जीव जो वायदो किरेल ताह आपणेन द्वारा बोगवान तुमरे पोर सिक्को लागाड़ेल हे एने तुमू मसी पोर बुरहो केऱ्या।
14 तो जीव आपणा उत्तर आदिकारीन बाग ने जामीन ने रूप माय ताह वोर आपाय जायेल हे, जाह वोर काय तो आपुह पुरी रिती से सुटकारो नाह आपेत। तान बोड़ाय एने स्तुती एय!
पौलुसान विन्ता
15 ज्यो कारेण हे काय मी बी मालीक मसी यीशु माय तुमरो बुरहो एने चोखाला माणहान केरता तुमरा मोंग ने बाराम होमलीन,
16 मी तुमरी केरता बोगवानाह दन्यवाद केरने सोड़ेत नाह, एने मारी विन्ता माय तुमूह एर केऱ्या केरथु।
17 काय आमरा मालीक यीशु मसीन बोगवान एने बोड़ायीन आबोख हे, तुमूह इकेल एने बुद्दीन जीव आपी काय तुमू ताह हास केरीन जाण सिकहो।
18 एने तुमरा मोनान डोलान उजाला केरीन तुमू जाण जावो काय तान हादावणीन आसा काय हे, एने चोखाला माणहा माय तान मिरास ने बोड़ायीन देन कोहलो हे।
19 एने तान ताकेत आमरी उगे जा बुरहो केरतेह, कोलीक हे, तान सेक्तीन प्रबाव ने ता कामान गेत हे,
20 बोगवान जो मसीन बाराम किरेल, काय ताह मुरेल माय रेन जिवाड़ेन हेरगा माय तान जीवड़े उगे बोहाड्यो।
21 आखी बातीन सत्ता, आदिकारी प्रदानता, ताकेत, आदिकार एने एकेक नावान उपेर, ज्या दुनियान ओलोस नाह, पुण आवता कालाम बी लेवाय जाय।
22 एने आखो काय मसीन पायान बुंदे केर देनो एने ताह आखी चिजी पोर उचो ठेरावीन मोंडलीह आप देनो।
23 मोंडली मसीन सेरीर हे, एने तान बोरपुरी हे, जो आखा माय सोब पुरो किरेह।