गलातीयो पौलुस ने लिखा हुआ पत्र
गलातीयो पौलुस लिखेल पोत्रो
ओलखात
गलातीयान पुस्तेकीह प्रेरित पौलुस 1:1 लिखेल ईतो। ज्यो एक पोत्र एतो जो पौलुस यीशु मसीन जेल्मान 48-57 वोरह्यान विची माय लिखेल ईतो। गलातीया माय रेणारे रोमन ईलाकान गलातीयो माय रेणारे माणहे एता। जाणकाराह मालुम नाह सोतो काय जेवी पौलुस पोत्र लिखेल ईतो तेवी तो काहरी ईतो, पुण इफिसुस एने कुरिंथीयो ज्या दुय हेयरान आंदासान जागो हे।
पौलुस विश्वासी एने बिगेर यहुदि दुयूह हिकाड़नेन केरता गलातीयोन मोंडलीन बारा माय लिखेल हे, तो खास केरीन गेलेत सिक्शान सामनो केरनेन केरता लिखेल ईतो, जा माय कियेल ईतो काय विश्वासीह जुनाला नेम माय यहुदि कायदाह पालने जोरवरी नाय मिले, खास केरीन खेतना। जुड़ाइजर नावान विश्वासीन विची माय माणहान एक टुलो ईतो, जाह बिगेर यहुदि विश्वासीह खेतना केरनेन गिरेज एती। ता पौलुसान एपोस्टोलिक प्रदाकारणाह बी सावाल माय कियेल हे। पौलुस तान थोड़ीक वातु 1:11–2:14 माय किन तान देरमाह वोचाड़ेल हे, एने तो ज्यो सोमजाड़ीन हाजाली खोबरीह वोचाड़ेल हे काय सुटकारो यीशु मसी हे। 2:16
रूपरेखा
1. पौलुस तान पोत्रान सुरवात गलातीयोन मोंडलीह केरीन किरेल हे। 1:1-5
2. तेवी पौलुस हिकाड़नेन तान आदिकारान राखवाली केरने एने देखाड़नेन केरता सोतान देशान बारा माय कियेल हे तो कायदा लेन जीवणेन कोसीत किरेल ईतो पुण तो काम नाह केरतालो। 1:6–2:21
3. ओंगाण तो सुटकारो एने कायदो एने दया बुमिकान व्याख्या किरेह। 3–4
4. ओवतो तो एक हाजो मसीह जीवणो जीवणेन केरता थोड़ीक वातु किथे। 5:1–6:10
5. पौलुस तान पोत्राह एक आबिवादन एने आखरी वातु किन निवरावेह काय ज्यो एर मेलनेन केरता काय बोगवानान उगे रेन नोवाला माणहाह बोदेलने जुलूम जोरवरी हे, बाहेरल्या नेम जो काय खेतना केराय जाणो। 6:11-18
1
1 मी पौलुसान उगे रेन प्रेरित जो नाह माणहान उगे रेन एने नाह माणहान द्वारा निवोड़नो, पुण यीशु मसी एने आबोख बोगवानान द्वारा जो यीशुह मुरेल माय रेन जीवाड्यो।
2 एने आखा बायाख ने उगे रेन जा मार हेऱ्या हेते, गलातीयान मोंडलीह नमस्कार मोकेलतेह।
3 आपणो आबोख बोगवान एने मालीक यीशु मसीन उगे रेन तुमूह गीण एने सान्ती जुड़ते रेय।
4 जो आपणा पापान केरता सोताह आप दिनो, काहाकाय आपणो बोगवान एने आबाख ने मोरजीन गेत आपुह ज्यी एवीन खाराब दुनिया से सोड़वे।
5 तान बोड़ाय जेलेम एते रेय। आमेन।
काल्ली दिहरी हाजाली खुबेर नाह
6 माहु आश्चर्य ईथे काय जो तुमूह मसीन गीण माय हाद्यो ताह तुमू ओला उतवाल्या एगदी दिहरीस हाजाली खोबरीन केरता बोटेकणे बाजरेनाह।
7 पुण “दिहरी हाजाली खुबेर सोतीस नाह,” पुण वात ज्यी हे काय थोड़ाक माणहे ओहला हेते जा तुमूह गाबराव देतेह, एने मसीन हाजाली खोबरीह बिगाड़ ने होदतेह।
8 पुण केदी आमु, नाहते हेरोगदुत बी ती हाजाली खोबरीह सोड़ीन जी आमु तुमूह होमलाड़ेल हेते, एगदी दिहरी हाजाली खुबेर तुमूह होमलाड़े ताहार हाराप एय।
9 जीहे आमु पेल कियेल हेते, तिहेच केरीन मी एवी उंजु केथु काय ती हाजाली खोबरीह सोड़ीन जीह तुमू स्वीकार किरेल हेते, केदी एगदी दिहरी हाजाली खुबेर होमलाड़ेह, ताहार हाराप एय!
10 काय ज्याकेरीन ओहलो लागेह काय मी माणहाह मानथु काय बोगवानाह? काय मी माणहाह खुस केरनेन कोसीत केरने कोसीत केरथु? केदी मी माणहास खुस किरतो, ताहार मी मसीन सेवक नाय बोण सेकतो।
पौलुस किहीक प्रेरित बोणेल
11 एय बाय बोणहा, मी तुमूह केय दिथो काय जी हाजाली खुबेर मी होमलाड़ेल हे ती माणहान उगे रेन नाह।
12 काहाकाय ती माहु काल्ला माणहान उगे रेन नाह पोचनी, एने नाह माहु एगदो हिकाड़ेल, पुण यीशु मसीन द्वारा देखानी।
13 यहुदि देरमा माय जो पेल मारो बोलनो चालनो एतो, तान बाराम तुमू होमेल लियेल हेते काय मी बोगवानान मोंडलीह जुलूम वेला केरायेल एने खेतेम केरतालो।
14 मारा जुलूम होवटा जातीवालाह जा मारी वोयावाला एता, यहुदि देरमा माय जुलूम वोदते जाताला एने मारा डायडायान रितीन केरता उत्साही ईतो।
15 पुण बोगवान तान गीणीन द्वारा माहु मारी आईख ने पेटास माय रेन निवाड़ लिदो, एने हाद्यो काहाकाय मी तान सेवा केर सेकु,
16 जेवी तो निर्णय लिदो काय तान सोराह मार माय देखाड़ी काय मी बिगेर यहुदि माय तान हाजाली खुबेर होमलाडु, ते मी काल्ला माणहान मोदेक नाह लिदो।
17 एने नाह मी ता फाय गीयो जा माहु रेन पेल यरूशलेम माय प्रेरित निवड़ायेल एता, पुण मी अरब माय जात रिनो, एने ता रेन पोशो दमिश्क माय वोलीन आवतरनो।
18 ओवतो तीन वोरह्या बाद मी पतरसा हिऱ्यो मिलनेन केरता यरूशलेम गीयो, एने ता फाय पोंदरा दिह वोर रिनो।
19 पुण मालीकान बाहख याकुबाह सोड़ीन काल्ला दिहरा प्रेरिताह नाह मिलनो।
20 बोगवान मारो गोवा हे काय ज्यु वातु मी तुमूह लेखथु, त्यु जुठ्यु नाह।
21 तान बाद मी सीरीया एने किलीकीयान फोलाम आवो।
22 पुण यहुदियान मोंडली जा मसीन बोरहाम हेते, माहु व्यक्तिगत रूप से केदी नाह मीलना;
23 पुण मार बाराम जाणताला काय जो आपुह पेल वेला केरावतालो, “तो एवी तास बोरहान हाजाली खुबेर होमलाड़ेह जीह पेल खेतेम केरतालो।”
24 एने ता मार बाराम बोगवानान बोड़ाय केरताला।