थिस्सलुनिक्यो पौलुस ने लिखा हुआ दुसरा पत्र
थिस्सलुनिक्यो पौलुस लिखेल दुसरो पोत्रो
ओलखात
ज्यो पोत्र थिस्सलुनिक्योह प्रेरित पौलुस लिखेल ईतो 1:1 पेल्लो पोत्र लेखीन पासाण ज्यो पोत्र कोमीत कोमी मसीन 51 साल पासाण पौलुस ज्यो पोत्र लिखेल जेवी तो ज्यो पोत्र लिखेल तेवी तो कुरिंथीयो हेयराम ईतो ज्यो पोत्र थिस्सलुनिक्यो मोंडलीह लिखेल ज्यी मोंडलीह पौलुस तान दिहरी वारी सेवाम जाणे बुखेत बाणायेल ईतो प्रेरितान काम 17:1-10 प्रेरितान कामा बाराम ज्यो लिखेल हे मोंडली माय थोड़ाक यहुदि एने थोड़ाक बिगेर यहुदि माणहे एता।
ज्यी मोंडलीन माणहे सेवली टेमीन एने मालीकान दिहरी वारीन आवणेन बारामाय थिस्सलुनिक्योन माणहाह जाणनेन केरता जुलूम आसा एती तानकेरता पौलुस तान दुयू बी पोत्री माय चेरचा किरेह ज्यी दिहरी पोत्री हे कोमीत कोमी आदो ईसो आखरी टेमीन बाराम लिखेल हे, ज्या पौलुस जा आलह्या हेते ताह बी चेतावणी आपी एने इही किथे काय आखा एदमी सोतान पेट बोरनेन केरता काम केरी 3:6-10।
रूपरेखा
1. पौलुस सोतान तान हातीन ओलखात केरावेह। 1:1-2
2. पौलुस बोगवानाह थिस्सलुनिक्यो मोंडलीन केरता दन्यवाद किरेह एने तानकेरता विन्ता किरेह। 1:3-12
3. आखरी टेमीन बाराम चेरचा। 2:1-15
4. आलह्यान बाराम हिक एने काम केरनेन बाराम पौलुसान जोरेवरी हिकवोण। 3:1-15
5. पौलुस मोंडलीन बाराम पोशो नमस्कार किरेह। 3:16-18
1
नमस्कार एने दन्यवाद
1 मी पौलुस सिलवानुस एने तीमुथीयुस हिऱ्यो ज्यो पोत्रो लेखथु आमरा आबाख बोगवानान एने मालीक यीशु मसीन माणहाह थिस्सलुनिक्योन मोंडली माय हेते,
2 बोगवान आबाख एने यीशु मसीन उगे रेन तुमूह गीण एने सान्ती जुड़ती रेय।
नियाव ने दिह
3 एय बाय बोणहा, आमुह तुमरा बाराम आखी टेम बोगवानान दन्यवाद किरते रेणे जुवे, एने ज्योस लायकीन हे, ज्यानकेरता काय तुमरो बुरहो जुलूम वोड़ती जाथे, एने तुमू आखान मोंग आपसाम जुलूम वोड़ती जाथे।
4 एने न्या वोर काय आमु खुद बोगवानान मोंडली माय तुमरा बाराम मोठाय केरतेह, एने जोला सेताव एने दुख तुमू वेठतेह, ता आखा माय तुमरो दिर एने बुरहो देखाथी।
5 ज्यो बोगवानान खेरला नियाव ने साप साप पुरावो हे काय तुमू बोगवानान राज ने लायकीन ठेराहो, जान केरता तुमू दुख वेठणे बाजरेनाह।
6 बोगवानान आहने ज्यो नियाव हे काय जा तुमूह दुख देतेह, ताह बोदला माय दुख आपी।
7 एने तुमू जो दुख वेठतेह, आमरी हेऱ्यो तुमूह आराम आपी; तुलबूखे जेवी मालीक यीशु तान ताकेतवाला हेरोगदुता हिऱ्यो जेजेलताली आक्ठा माय हेरगाम रेन आवी।
8 एने जा बोगवानाह नाह ओलेखते एने आपणा मालीक यीशुन हाजाली खोबरीह नाह मानते, ताह डेंड आपी।
9 ओहला माणहे मालीक ने ओंगाण रेन एने तान ताकेतीन तेजाह रेन सेटा एन जेलेमक्या खेतेमान डेंड होद्ती।
10 ज्यो ते दिह एय, जेवी यीशु तान चोखाला माणहाम बोड़ाय होदणे एने आखा बुरहो केरनाराम बोंगलाणेन कारीन एणेन केरता आवी। एने तुमू बी ता माय बाग लिहो; काहाकाय आमरी गोवाही पोर तुमू बुरहो किरेल एता।
11 ज्यानकेरीन आमु कायेम तुमरी केरता बोगवानाह ओहलीस विन्ता केरतेह, ता जीवणान लायकीन सोमजो जा माय तो तुमूह हादिल हे। एने आखी बोलायीन मोरजी एने बोरहान आखा कामाह ताकेत माय पुरो केरी।
12 आमरो बोगवान एने मालीक यीशु मसीन गीणान द्वारे मालीक यीशु मसीन नाव तुमू माय बोड़ाय जुड़ने जुवे, एने तुमू ता माय।