4
1 जेवी आराम माय रिगणेन वायदो एवी वोर हे, ते आपुह बिणे जुवे, ओहलो नाय एय काय तुमरे माय रेन कुण बी ताह रेन एंजाणल्यो रेय जाय।
2 आपुह बी ताच ने गेत हाजाली खुबेर केणेन आयेल एती, पुण होमलेल वचना केरीन ताह काईच फायदो नाह ईनो, काहाकाय होमेलणारान मोना माय बोरहा हेऱ्यो नाह बोहनो।
3 पुण आपु जा बुरहो किरेल हेते, ता आराम माय रिगतेह। जीहे तु कियेल ईतो:
“मी मारा रागा माय सुगोण खाईल हे,
ता मारा आराम माय रिग नाय सेकती!”
दुनियाह बोणनेन बुखे रेन तान काम पुरा एय जायेल एता।
4 काहाकाय हातवा दिह्यान बाराम वचन ज्य कियेल हे: “बोगवान हातवे दिह तान आखो काम निवरावीन आराम किरेल।”
5 एक वारीन उंजु ज्याच बागाम पोशो किथे, “ता मार आराम माय रिग नाय सेकती।”
6 जेवी ज्यी वात बाकी हे काय कोलाक उंजु हेते जा ता आराम माय रिगती, एने ताह तान हाजाली खुबेर पेल होमलायेल ता उकुम नाह मान्या केरीन ता माय नाह रिग्या, पुण एवी बी दिहरान केरता आराम ने बायणो उगड़ो हे।
7 तानकेरीन तो ईखेह खाज दिह्याह ठेरावीन ओलाक दिह्यान पासाण दाऊद ने पुस्तेक माय ताह “आज ने दिह” किथे। जीहे पेल केवाय जायेल एतो,
“केदी आज तुमू तान बोल होमेलहो,
ते तुमरा मोनाह वातड़ो मा किरहो।”
8 केदी यहोशु ताह आराम माय रिगाड़ लितो, जान बाराम बोगवान वायदो किरेल ईतो, ते बोगवान ज्यान पासाण दिहरा दिह्यान बाराम नाय कितो।
9 ते जो बी एय, जिहकेरीन बोगवान हातवे दिह आराम किरेह, तिहेस केरीन बोगवानान माणहान केरता तो एक आराम बाकी हे।
10 काहाकाय जो तान आराम माय रिगेल हे, तो बी बोगवानान गेत तान काम पुरो केरीन आराम केरती।
11 केरीन आपु ता आराम माय रिगणेन कोसीत केरने जुवे, ओहलो नाय एय काय एगदाह तान गेत उकुम नाह मानेन डेंड बोगणे पोड़ जाय।
12 काहाकाय बोगवानान वचन जीवतालो एने ताकेतवालो हे, एने दुयदारी तेलवारीह रेन बी जुलूम तेज हे; एने जीव एने जीवाह, एने गाठ गाठ एने गोदा गोदाह आंगे केरीन आरा पार कोरने। एने मोनान आसा एने विचारान नियाव किरेह।
13 केलीन काल्ली बी वोस्तु बोगवानान नेजरी मा लिकायेल नाह सोती, तान डोलान सामने जाह आपुह लेखो जोखो आपणु हे। एकेक वोस्तु बिगेर लिकायेल उगाड़ली हे एने काल्ली बी लिकायेल नाह सोती।
यीशु मुठलो चाकर्यो
14 जेवी आपणो उहलो मुखी चाकर्यो हे, जो हेरगाम रेन आयेल हे, मतलब बोगवानान बिटोख यीशु, ते आवो, आपु आपणा बोरहा माय मोजबुत बोणीन रेता।
15 काहाकाय आपणो उहलो मुखी चाकर्यो नाह सुतो जो आपणी कोमजोरी माय आपु हिऱ्यो दुखी नाय एय सिके, पुण तो आखी वातु माय आमरे गेत पारखाय ते जायेल, तीबी विण पाप निकेलनु।
16 केरीन आवो, आपु गीण ने राजगादिन आहने ईमोत बांदिन चालहु काय आपु पोर किव एय, एने ती गीण सापड़ावहु जो गिरेज ने बुखेत आपणी मोदेक केरी।