8
यीशु आपणो मुठलो चाकर्यो
1 जो काय आमु केतेह, तान मुखी वात ज्यी हे काय आपु फाय खेरीच एक उहलो मुखी चाकर्यो हे, जो हेरगा माय मोटला बोगवानान राजगादिन जीवड़े उगे जाय बुहेल हे,
2 तो चोखाला जागा पोर मतलब खेरला तोम्बु माय जाह बोगवान बाणायेल ईतो, नाह माणहान आथा केरीन। ती जागे तो मोटला चाकर्यान काम किरेह।
3 काहाकाय एकेक मुखी चाकऱ्याह ज्यानकेरीन निवाड़नो काय तु बेट एने बोलीदान दुयाह बी चेड़ावी। एने केरीन ज्या मुखी चाकर्यान केरता बी ज्यो जोरवरी एतो काय ता फाय बी चेड़ावणेन केरता काह रेय।
4 केदी तो देरती पोर रितो ते तो केदी चाकर्यो नाय रितो, काहाकाय तो पेलुस रेन उहलो मुठलो चाकर्यो हे, जो यहुदि कायदान नुसार बेट चेड़ावतेह।
5 जो चाकर्यान पोद ने काम ता केरतेह तो हेरगा माय जो हे तान एक सावलो एने बाणावट हे। ज्यो तिहेस केरीन हे जेवी मुसा चोखालो तोम्बु बाणावण्योस ईतो, तेवी बोगवान ताह केयो, “एर मेल काय तु एकेक वोस्तु ठिक तास वेह रूपान गेत बाणावजी, जो तुवाह बोयड़ा पोर देखाड़ेल एतो।”
6 पुण एवी जी चाकऱ्यान पोद ने सेवा यीशुह सापड़ेल हे, ती तान सेवा कामाह रेन हाजी हे, काहाकाय तो जा वायदान विचगालो हे। जो जुनाला वायदाह रेन हाजो हे, काहाकाय ज्य हाजी वोस्तुन देराव पोर बुणेल हे।
7 काहाकाय केदी पेल्ला वायदा माय काय गेलती नाह रेणे, ते दिहरा वायदान केरता काय गिरेज नाह सोती।
8 पुण बोगवानाह ता माणहा माय दोस सापेड़नो एने तो केयो:
“मालीक किथे, दिखो, तो दिह आवीह,
जेवी मी इस्राएल ने माणहा हिऱ्यो, एने यहुदान माणहा हिऱ्यो एक नोवालो वायदो बांदुह।
9 ज्यो वायदो तोहलो नाय रेय जोहलो मी तान डायला हिऱ्यो तुलबूखे किरेल ईतो।
जेवी मी तान आथ देरीन मीस्र देसा माय रेन निकाल लायेल।
काहाकाय ता मार वायदा पोर बोरहावाला नाह रेना, जाह मी ता हिऱ्यो बांदिल ईतो,
केरीन मी ता उगे नाह इऱ्यो।
10 उंजु मालीक किथे, काय जो वायदो मी ता दिह्यान पासाण इस्राएल ने माणहा हिऱ्यो बांदुह,
तो ज्यो हे काय मी मार कायदाह तान मोना माय टाकुह,
एने ताह तान मोना पोर लेखुह,
एने मी तान बोगवान ठेराह
एने ता मारा माणहे ठेराती।
11 ओवता एकेक जाण आपणा दोस्ती
एने आहेंल्याह ज्य हिक नाय आपी,
काय तुमू मालीकाह उलखो।
काहाकाय तेवी ते आत्या रेन मोठो वोर सोब माहु जाण लेती।
12 काहाकाय मी तान गुनान माफीन केरता किववालो रेह,
एने पुशो केदी तान पापाह एर नाय केरू।”
13 ज्या वायदाह नोवालो किन तो पेल्ला वायदाह जुनालो केर दिनो, जो जुनालो एने जिर जाथे, तो पोशो जेल्दीच मिटाय जाय।