11
यीशु चेलाह विन्ता केरनेन हिकाड्यो
(मत्ती 6:9-13; 7:7-11)
1 यीशु एक जागे विन्ता केरने बाजरियेल ईतो, एने विन्ता केरीन पासाण तान चेलाम रेन एक ताह केयो, “एय मालीक! योहान बपतीस्मा केरनार तान चेलाह विन्ता केरने हिकाड़ेल हे, तिहेच आमुह बी हिकाड़।”
2 यीशु ताह केयो, तुमू विन्ता केरने बुखेत इहकेरीन किवो:
“एय आमरा आबा!
तारो चोखो नावान मान सम्मान मेलाणे जुवे;
तारो राज आवी।
3 आमरो दाड़ीन दिह ने खाणो आमुह दाड़ीन आप्या केर।
4 एने आमरा पापाह माफ केर।
काहाकाय आमु बी आमरा गुनेगाराह माफ केरतेह,
एने आमुह पारेख माय मा पाड़ी।”
5 एने तान पासाण यीशु चेलाह केयो, “तुमू माय रेन कुण हे जान हाती रेय एने तो आदि राती ता फाय जाईन केय, ‘एय हाती माहु तीन रोटा आप।
6 काहाकाय वाटे जाणार हाती माहु फाय आव रिनोह, ताह खावाड़नेन केरता मार फाय कायच नाय मीले।’ ”
7 तेवी तो माय रेन जापाप आप्यो, “माहु वेला मा केरावी, एवी ते बायणो बोंद हे, एने सोरा बी मार हेऱ्या हुवणे बाजरेनाह, तान केरता उठीन तुवाह कायच नाह आप सिकेत।”
8 मी तुमूह केथु काय तो तान हाती हे तीबी उठीन नाय आपी, तीबी लाज सोड़ीन मांगेह; तान केरता ताह जोला रोटान गिरेज हे, तोला रोटा उठीन आपी।
9 एने मी तुमूह केथु, “मांगहो ते तुमूह आपी, हुदहो ते तुमूह जुड़ी, एने बायणाह ठुको ते तुमरे केरता उगड़ी जाय।”
10 काहाकाय जो बी मांगेह ताह आपी, एने जो हुदेह ताह जुड़ जाय, एने जो बायणाह ठोकेह तान केरता उगाड़ाय जाय।
11 तुमरे माय रेन ओहलो आबोख कुण हे, केदी तान सोरो मासो मांगी, ते तान बोदले गेयड़ेह आपी काय?
12 नाहते ईंडो मांगी ते विचो आपी?
13 जेवी तुमू खाराब एन बी तुमरा सोराह हाजी वोस्तु आपणेन जाणतेह, ते तुमरो हेरगावालो आबोख ता फाय मांगणाराह चोखालो जीव काहा नाय आपी!
यीशु एने बालजबुल
(मत्ती 12:22-30; मरकुस 3:20-27)
14 उवतो यीशु एक बुतड़ाह जो ता एदम्या माय रिगेल ईतो, तो मुको ईतो, एने जेवी यीशु ता बुतड़ाह काड्यो ते तो एदमी बोलने बाज गीयो, एने तो देखीन माणहे बोंगलाय गीया।
15 पुण ता माय रेन थोड़ाक केताला, “ज्यो ते बुतान मुखी बालजबुलान ताकेत केरीन बुतड़ाह बाहेर काड़ेह।”
16 थोड़ाक माणहे यीशुह पारेखणेन केरता ता फाय बोगवानान उगे रेन निसाणी मांग्या।
17 यीशु तान मोन जाणीन ताह केयो, “जा राज ने माणहा माय फुट पोड़ जाथे, ताहार तो राज खेतेम एय जाथे, एने जान गेरान माणहा माय फुट पुड़ेह, ताहार ता गेरान माणहे खेतेम एय जातेह।”
18 केदी सैतान ताच ने विरोदी एय जाय, ते तान राज किहीक टिकेन रेय? काहाकाय तुमू मार बाराम केतेह काय, मी बुतड़ान मुखीन मोदेक लेन बुतड़ा काड़थु।
19 पुण मी इही केरथु, ते तुमरो वोस कुणीन मोदेक लेन बुतड़ा काड़तेह? तान केरता ताच तुमरो नियाव केरती।
20 पुण केदी मी बोगवानान ताकेत केरीन बुतड़ा काड़थु, ते सोमजी जाज्यो काय बोगवानान राज तुमरे आहने आव लागेल हे।
21 जेवी एक तेगड़ो माणुह आथ्यार बांदिन तान गेरान राखवाली किरेह, तान मालदेन वोचीन रीथे।
22 पुण ताह रेन वोदार तेगड़ो माणुह तान आथ्यार सांडाड़ लिथे, एने तान मालदेन लुटीन वाट दिथे।
23 जो मार हेऱ्यो नाह सोतो तो मार विरोद माय हे, एने जो मार हेऱ्यो टुलो नाह किरेत, तो फाकरी दिथे।
बुतड़ो फिरीन आवणे
(मत्ती 12:43-45)
24 जेवी एक माणहा माय रेन खाराब जीव निकलीन उजाड़ जागा माय विहेवणेन केरता होद्ती फिरेह, एने तीह काहरी बी जागो नाह जुड़ेत, ते ती किथे, “जा गेराम रेन मी निकलीन आयेल हे, ताच गेराम पोशी जात रेह।
25 तो बुतड़ो पुशो आवीन ता जागाह साप सुतरो एने हिंगारेल दिखेह।”
26 एने ती पोशी जाईन ताह रेन उंजु खाराब दिहरा बुतड़ाह लीयावेह, एने ता माय रिगीन रेतेह, एने ता माणहान जीवणो, पेल्लाह रेन जादाच खाराब एय जाथे।
बोरकेतवालो कुण हे
27 यीशु ज्यी वात केरने बाजरियेल ईतो, तेवी गेरदी माय रेन एक बायकु इहकेरीन आयड़ीन केयी, “तुवाह पायदा केरनार बोरकेतवाली हे।”
28 यीशु ती बायकुह केयो, “होव! पुण जा बोगवानान वातीह होमेलतेह एने मानतेह ता जुलूम बोरकेतवाला हेते।”
बोगवानान उगे रेन निसाणीन मांग
(मत्ती 12:38-42)
29 यीशुन आहने जुलूम माणहे टोलवाणे बाजरियेल एता, तेवी यीशु केयो, “ज्या सोमयान माणहे जुलूम खाराब हेते, जा निसाणी होदतेह पुण योनान निसाणीह सोड़ीन दिहरी निसाणी नाह आपायेल सोती।”
30 बोगवानान वात होमलाड़नार योना निनवेन माणहान केरता निसाणी ठिरेल हेते, तिहेस केरीन माणहान बिटोख ज्यी टेम ने माणहान केरता एक निसाणी हे।
31 नियाव ने दिह दक्शिण देसान राणी, ज्या कालान माणहा पोर गुनो लागाड़ी, काहाकाय सुलेमान राजान एकलीन वातु होमेलनेन केरता देरतीन दिहरे खुणे रेन आयेल एती, एने हुमलो! सुलेमानाह रेन बी मुठो न्या हे।
32 योनान वात होमलीन निनवेन माणहे तान पापे सोड़ीन मोन बोदेल लेदा, नियाव ने दिह निनवेन माणहे उबरीन ज्या कालान माणहा पोर गुनो लागाड़ती, एने हुमलो! योनाह रेन बी मुठो न्या हे।
सेरीरान दिवो
(मत्ती 5:15; 6:22-23)
33 कुणीच बी दिवो पेटाड़ीन बुयाराम नाह मीलेत एने नाह ते पायला बुंदे; पुण गेराम आवणाराह उजालो आपणेन केरता कोठी पोर मिलेह।
34 तारा सेरीरान दिवो तारो डुलो हे, एने तारो डुलो हाजो एय ते तारो आखो सेरीर बी उजालोच रेय, पुण तारो डुलो खाराब रेय ते तारो आखो सेरीर आंदारलोच हे।
35 तान केरता उशारीम रिवो काय जो उजालो तुमरे माय हे, ताम आंदारो नाय एणे जुवे।
36 तान केरता तारो आखो सेरीर उजालो हे, ते तान काल्लो बी ईसा माय आंदारो नाय रेय ते आखो ते आखो उजालोच रेय, जिहकेरीन ती टेम माय रीथे जेवी दिवो तान चोमेक माय रेन तुवाह उजालो आपेह।
यीशु फरिसी एने देरेमगुरूह हिकाड़ने
(मत्ती 23:1-36; मरकुस 12:38-40)
37 जेवी यीशुन वातु केरीन निवेरने बाद, तेवी एक फरिसी आवीन ताह विन्ता केरीन केयो, “मार फाय रूटो खाणे चाल, तेवी यीशु ता फाय जाईन रूटो खाणे बुठो।”
38 यहुदिन रितीन गेत यीशु बिगेर आथ दुयेल रूटो खाणे बोह रियेल ईतो, फरिसी ज्य देखीन बोंगलाय गीया।
39 यीशु ताह केयो, एय फरिसी तुमू तेली एने कोलह्याह उपेर उपेर रेन उजालतेह, पुण तुमरे माय आंदारो एने खाराबी बोराय रियेल हे।
40 एय विणएकल्या बाहेरल्यो ईसो बाणावणार मायवालो ईसो बी बाणायेल हे।
41 पुण जो तुमू फाय हे तो गेरब्याह वाट दिवो, ते हुमलो आखो काय तुमरी केरता चोखो एय जाय।
42 एय फरिसी! तुमू पोर हाय पुदीना एने आदो एने आखी बातीन बाजीन दाहवो ईसो आपतेह, पुण नियाव एने बोगवानान मोंगाह सोड़ देतेह, केरती ते रेतेह एने ताह बी नाय सोड़ता।
43 एय फरिसी तुमू पोर हाय! तुमू मोंग केरतेह बोक्ती केरन्या गेरा माय खाज खाज जागाम बोहणे एने आटा माय तुमूह माणहे सालाम केरी, ओहलोह होदतेह।
44 एय देरेमगुरू एने फरिसी! तुमू पोर हाय, काहाकाय तुमू बुजायेल माहणान गेत हेते, ता पोर चालणारा माणहाह मालुम नाह पुड़ेत।
45 तेवी देरेमगुरू यीशुह केयो, “एय गुरू! इहकेरीन केयीन तु आमरी चिहटा किरेह।”
46 यीशु ताह केयो, “एय देरेमगुरू तुमू पोर बी हाय! तुमू माणहा पोर उखलाय नाय ओलो बार मेल देतेह, पुण तान वोजाह आंगल्या केरीन बी नाह सापेलते।”
47 हाय तुमू पोर! काहाकाय बोगवानान जाणकाराह तुमरा बाप दादा मार दियेल एता, तान माहणे बाणावतेह।
48 एने तुमरा बाप दादान काम तुमरा आथाम हे, इही तुमू पुरावो देतेह, काहाकाय तुमरा बाप दादा ताह मार दियेल एता एने तुमू तान माहणे बाणावतेह।
49 तानकेरता बोगवानान इकेल बी कियेल हे, मी बोगवानान जाणकाराह एने निवाड़ेल प्रेरिताह तुमू फाय मोकेलथु, एने ता थोड़ाक मार देती एने थोड़ाक वेला केरावती।
50 काहाकाय केल बोणनेन दिह रेन आज वोर जोला बी बोगवानान जाणकारान लुय वोयेल हे, ता आखान लेखो ज्या टेम ने माणहा फाय लेवाय जाय।
51 हाबील ने खुन रेन जकरीयान खुन वोर जो वेदीन विची माय माराय जायेल, तान बाराम मी तुमूह खेरीच केथु, न्या सोबान लेखो ज्या सोमयान माणहा फाय लेवाय जाय।
52 एय देरेमगुरू तुमू पोर हाय! तुमू एकलीन कुची ते लेय लेदाह, पुण तुमू खुद नाह रिगना एने दिहराह बी रिगणे नाह देना।
53 जेवी यीशु ता रेन निकेलनो, ते देरेमगुरू एने फरिसी तान पासाण पोड़ गीया, एने जुलूम वातीन बाराम फुसणे बाज गीया।
54 काहाकाय ता यीशुन मुयाम रेन निकेलनार वातीह देरीन फासाड़नेन ताक माय एता।