7
रोमन आदिकारीन पावराह यीशु हुदारने
(मत्ती 8:5-13)
1 जेवी यीशु माणहाह तान आखी वातु हिकाड़ दिनो, तेवी कफरनहूम हेयरा माय आवो।
2 ता एक रोमन आदिकारीन मोंगाल्लो पावोर ईतो, बेमारी माय मोरने पोर ईतो।
3 तो आदिकारी यीशुन बाराम होमलीन यहुदियान थोड़ाक डायडायाह इहकेरीन विन्ता केरनेन केरता यीशु फाय मुकल्यो, काय आवीन मार पावराह वोचाड़ ले।
4 ता यीशु फाय आवीन जुलूम विन्ता केरीन केया, “ता पोर गीण केर, काहाकाय तु गीण केरनार हे।
5 काहाकाय ताह आपणा देसान माणहा पोर मोंग हे, एने आमरी केरता तोच बोक्ती केरन्यो गेर बाणायेल हे।”
6 तेवी यीशु ता हिऱ्यो गीयो, एने आदिकारीन गेरान आहने पोचनो, ते आदिकारी तान हातीह ज्यी खुबेर केय मुकल्यो, “एय गुरू! तु मार गेर आवणेन तेकलीत मा केरी, काहाकाय मी ज्यान लायेक नाह सुतो, काय तु मार गेर आवी।
7 तान केरता मी आपणे आपाह ज्यी लायेक नाह सोमेजनो काय तार फाय आवो। पुण वचन ओलोच किय दे काय मारो पावोर हुदेर जाय।
8 काहाकाय मी बी दिहरा आदिकारीन आथान निड़ो काम केरथु, एने मार नेड़ा बी दिहरा सिपाय हेते, एने मी एकाह केथु, जा, ते तो जाथे, एने दिहराह केथु, आव ते तो आवीह, एने मार पावराह केथु, ज्य केर तो ताह किरेह।”
9 तेवी यीशु तान वातु होमलीन बोंगलाय गीयो, एने तान पासाण आवणारे माणहान उगे फिरीन केयो, “मी तुमूह केथु काय, मी इस्राएल माय बी ओलो बुरहो केरनार माणहाह नाह दिख्यो।”
10 एने आदिकारीन मुकलेल माणहे गेर पोशा आवीन ता पावराह हुदरेल देख्या।
रांडायेल बायकुन सोराह यीशु जीवतालो केरने
11 दिहरे दिह यीशु नाईन नावान एक गावा माय गीयो, तेवी तान चेला एने जुलूम माणहे ता हेऱ्या जाणे बाजरियेल एता।
12 यीशु गावान हिली माय पोचनो, ते दिखो, माणहे एक मुरेल माणहाह गावान बाहेर बुजणे ली जाणे बाजरियेल एता, तो एक रांडायेल बायकुन एकुच मोंगाल्लो बिटोख ईतो, एने गावावाला जुलूम होवटा माणहे ता हेऱ्या जाणे बाजरियेल एता।
13 रांडायेल बायकुह देखीन यीशुह गीण आवी, तेवी मालीक तीह केयो, “मा रिड़े।”
14 तेवी यीशु खाटलान आहने आवीन खाटलाह आथल्यो, एने खाटलो उखेलनारे उबरी गीया, तेवी यीशु केयो, एय जुवान! मी तुवाह केथु, “उठ।”
15 इही केताच मुरेल सोरो उठीन बोह गीयो, एने बोलने बाज गीयो, तेवी यीशु ताह तान आईख होप दिनो।
16 तेवी आखा माणहे बिन बोंगलाय गीया, एने ता बोगवानान बोड़ाय केरीन केणे बाज गीया, “आमरी विची माय एक मोटलो जाणकार आमुह वोचाड़नेन केरता आवोह, एने बोगवान आपणा माणहा पोर गीण किरेल हे।”
17 एने यीशुन वात आखा यहुदिया देसाम एने आरे मीरेन आखा देसाम पोच गियी।
योहान बपतीस्मा केरनार तान चेलाह यीशु फाय मोकेलने
(मत्ती 11:2-19)
18 एने बपतीस्मा केरनार योहान ने चेला ज्यी वातीन खुबेर ताह केय देना।
19 तेवी बपतीस्मा केरनार योहान तान दुय चेलाह हादिन यीशु फाय ज्य फुसणेन केरता मुकल्यो, काय आवणार ईतो, “काय तो तुस हे? नाहते आमु दिहरान वाट जुवज्यो?”
20 तेवी ता यीशु फाय आवीन केया, “योहान बपतीस्मा केरनार आमुह ज्य फुसणे मुकल्योह, काय आवणार ईतो, काय तो तुस हे, नाहते आमु दिहरान वाट जुवज्यो?”
21 ती टेम माय यीशु जुलूम दुखाऱ्याह, एने पिड़ा माय रेन, एने बुतड़ाह रेन सोड़ायेल, एने जुलूम आंदलाह देखाड़ेल ईतो,
22 तेवी यीशु योहानान चेलाह जापाप आप्यो, “जावो, तुमू जो होमेलतेह एने देखतेह तो योहानाह जाईन किवो: आंदला देखतेह, लेंगड़ा चालतेह, कोढी हुदेरतेह, बेयरा होमेलतेह, मुरेल जीव उठतेह, एने गेरीब माणहाह हाजाली खुबेर होमलाड़ाय जाथे।
23 बोरकेतवालो हे तो माणुह, जो मार केरता ठोकेर नाय खाय!”
24 जेवी योहानान चेला जात रेना, तेवी यीशु योहानान बाराम माणहाह केणे बाज गीयो: “तुमू उजाड़ी माय काय देखणे जायेल एता? काय वाराम आलताला टोकराह?
25 ओवता तुमू काय देखणे जायेल एता? काय हुवाल्ला फाड़का पेरनारा माणहाह? जा हुवाल्ला फाड़का पेरतेह, ता राजवाड़ाम हुकेह रेतेह।
26 ते ओवता तुमू काय देखणे जायेल एता? काय एगदा जाणकाराह देखणे? होव, मी तुमूह केथु, काय बोगवानान जाणकाराह रेन बी मोटलाह।”
27 ज्यो तोच योहान हे, जान बाराम वचन माय इहकेरीन लेख मीलेल हे, “काय बोगवान कियेल, मी मार खोबर्याह तारे ओंगाण मोकलुह, जो तार केरता वाट हुतरी केरी।”
28 मी तुमूह खेरीच केथु, “काय बायकुम रेन जा पायदा ईयेल हेते, ता माय योहानाह रेन मोठो कुण नाह, तीबी बोगवानान राज माय जो आत्याह रेन आत्यो हे, तोस योहानाह रेन मोठो हे।”
29 योहानान वातु होमलीन फालो उकालनारे एने जुलूम माणहे योहाना फाय आवीन बपतीस्मा लेदा, ता सोब बोगवानान वातीह खेरी मान लेदा।
30 पुण फरिसी एने देरेमगुरू योहान फाय रेन बपतीस्मा नाह लेदा, एने बोगवानान मोरजीह उपरूच टाल देना।
31 एने यीशु कितेच रिनो, “मी ज्यी दुनियान माणहान गेणती कायता हेऱ्यो केरू, काय ता कुणीन गेत हेते?
32 ता माणहे आटा माय बोहीन आयेड़नारा सोरान गेत हेते, जा एका दिहरा पोर आयड़ीन गुनो लागाड़तेह, ‘आमु तुमरी केरता पावली वाजाड़ेल, एने तुमू नाह नाचना, एने आमु दुख मोणायेल, पुण तुमू नाह रेड़ना।’ ”
33 काहाकाय बपतीस्मा केरनार योहान नाह रूटो खातेन आवो, एने नाह अंगुरान रूह पितेन आवो, एने तुमू केतेह, “ता माय बुतड़ो हे।”
34 पुण मी माणहान बिटोख खाते पितेन आवो, एने तुमू माहु केतेह, दिखो ज्यो ते खादाड़ एने दारकुट्या माणहे, फालो उकालनारान एने पापीन हाती हे!
35 पुण जा माणहे बोगवानान एकलीह मानतेह, ताच बोगवानान एकलीह खेरलो केतेह।
यीशु पापी बायकुह माफ केरने
36 ओवतो एक फरिसी यीशुह विन्ता किऱ्यो, काय मार गेर आवीन रूटो खाय, तेवी यीशु ता हिऱ्यो जाईन रूटो खाणे बुठो।
37 ता गावाम एक पापी बायकु एती, ती ज्यो होमलीन काय यीशु फरिसीन गेर रूटो खाणे बोह रिनोह, तेवी ती पिपेलनी सिसी माय जटामासीन गेंदाण्यो तेल लेन आवी।
38 ती यीशुन पाया हेऱ्यी उबरीन ओली रेड़नी काय आहवाम तान पाय बिज गीया, एने तीन लेट्या केरीन तान पायाह नुसी, एने ओवती यीशुन पायाह गुल्या देन गेंदाण्यो तेल चोपड़ी देनी।
39 ज्य देखीन, यीशुह रूटो खावाड़नार फरिसी तान मोनाम ओहलो विचार केरने बाज गीया, “काय केदी यीशु खेरीच जाणकार रितो, ते जाण जातो काय ताह सापेलनार ती कुण एने कोहलीक बायकु हे? काहाकाय ज्यी ते पापी हे।”
40 ज्यो होमलीन यीशु ताह केयो, “एय शमोन, मी तुवाह एक वात केथु,” शमोन केयो, “एय गुरू, के।”
41 “दुय एदमी एक माणहा फाय रेन चांदीन रूपिया केरजो मांगेल एता, एक पाच होव, एने एक पाचाह रूपिया।
42 ता दुयू बी उदार मांगेल रूपिया बोरनेन केरता ता फाय काईच नाह एतो, तेवी उदार आपणार ता दुयूह बी माफ केर दिनो। ता माय रेन एवी कुण ताह जादा मोंग केरी?”
43 तेवी शमोन केयो, “मार सोमेज माय ते जान होवटोच माफ एनोह, तोच होवटो मोंग केरी।”
तेवी यीशु शमोनाह केयो, “होव, तु ठिख जापाप आपेल हे।”
44 ओवतो यीशु ती बायकुन उगे फिरीन शमोनाह केयो, काय तु जी बायकुह दिखेह? मी तारे गेर आवो, पुण तु माहु पाय दोवणेन केरता पाणी नाह आप्यो, पुण जी आहवा केरीन मार पाय बिजवेल हे, एने तीन लेट्या केरीन नुसेल हे।
45 तु माहु गुल्या नाह दिनो, पुण न्या आवालो तुलबूखे रेन जी मार पायाह गुल्या देणे नाह सोड़ेल सोती।
46 तु मार मुंडाम तेल नाह चोपड्यो, पुण ज्यी मार पायाम गेंदाण्यो तेल चोपड़ेल हे।
47 तान केरता मी तुवाह केथु, “काय ज्यीन पाप जा जुलूम एता, ता आखा माफ एय गीया, काहाकाय ज्यी मार पोर जुलूम मोंग किरेल हे, पुण जान थोड़ाक माफ एनाह, तो थोड़ोच मोंग किरेह।”
48 एने ओवतो यीशु तीह केयो, “तारा पाप माफ एनाह।”
49 ता हेऱ्या जा खाणेन केरता बोह रियेल माणहे एता, ता तान तान मोनाम विचार केरने बाज गीया, “काय पापान माफी आपणार, ज्यो कुण हे?”
50 पुण यीशु ती बायकुह केयो, “तारो बुरहो, तुवाह वोचाड़ लियेल हे, तानकेरीन खुस एन गेर जातरे।”