13
मोंदिरान ओदेरनेन बाराम जाणाव
(मत्ती 24:1,2; लुका 21:5,6)
1 जेवी यीशु मोंदिर माय रेन निकेलतालो, तेवी तान चेला माय रेन एक ताह केयो, “एय गुरू! देख, कोहला जुलूम मोटला दिगोड़ एने मोटला आवाल्या हेते!”
2 यीशु ताह जापाप आप्यो, “तुमूह ज्या मोटला आवाल्या लागतेह? खेरी ते ज्य हे काय न्या आवाल्यान एक बी दिगोड़ तान जागे नाय रेय; आखा दिगोड़ ओदरी जाती।”
तेकलीत एने दुख
(मत्ती 24:3-14; लुका 21:7-19)
3 जेवी यीशु जेतुन बोयड़ा पोर रेन मोंदिराह देखणे बाजरियेल ईतो, तेवी पतरस, याकुब, योहान, एने अन्द्रियास ज्या कुवालाच जाईन ताह फुशा।
4 “आमुह के काय ज्यु वातु केवीह एती, एने जेवी ज्यु आखी वातु पुऱ्यू एणेन आवरेय ती टेम माय काल्ली निसाणी रेय।”
5 तेवी यीशु चेलाह केणे बाज गीयो, “तुमूह कुण बी बोड़कावे नाय केरीन जोगवीन रिवो।
6 जुलूम जाणे मार नाव लेन आवीन केती, ‘मी मसी हे!’ एने जुलूम जाणाह बोड़कावती।
7 जेवी तुमू लेड़ाय एने लेड़ाय ने बाराम होमेलहो, ते मा बिहो। काहाकाय ज्य एणेन जोरेवरी हे, पुण ज्यान मतलब ज्य नाह सोतो काय सेवल्यो टेम आव लागेल हे।
8 देसा हेऱ्या देस लेड़ाती; एने राज ने विरोद राज उठती। जा ता बुकम्प एती, एने काल पोड़ी। जेवी ज्य एय तेवी पिड़ान सुरवात एय जाय।”
9 पुण तुमू जोगवीन रिज्यो। काहाकाय माणहे तुमूह देरीन कोरटा माय ली जाईन होप देती। माणहे तुमूह पोंचा माय देती; तुमूह मार हाजाली खोबरीन केरता राजान एने आदिकारीन ओंगाण उबा केरती काय तान केरता पुरावो रेय।
10 पुण सेवल्यो टेम आवणेन पेल, हाजाली खुबेर आखा देसा माय पारचार केराय जाय।
11 जेवी चोकसी केरनेन केरता तुमूह माणहे देरीन कोरटा माय होपती। तेवी पेलुच चिन्ता मा किरहो काय आमु काय केहु; पुण जो काय तुलबूखे तुमूह केवाय जाय तोच किज्यो। काहाकाय बोलनारे तुमू नाह सोता, पुण चोखालो जीव हे।
12 बाहख बायाख मार देय, एने आबोख बेटाख हिऱ्यो बी इहीचकेरीन केरी। सोरा आईख आबाख ने विरोद एय जाती एने ताह माराव देती।
13 एने तुमू मार पोर बुरहो किरेल हेते, केरीन आखा माणहे तुमू हेऱ्या दुसमोनाय केरती। पुण जो आखरी वोर दिर देरीन मार पोर बुरहो केरी, ताच ने सुटकारो एय।
मोटली पिड़ा
(मत्ती 24:15-28; लुका 21:20-24)
14 पुण जेवी तुमू ता उजाड़नार खाराब चिजीह जा हाजो नाह ता उबरियेल दिखहो, “वाचणार सोमजी लेय,” ते जा यहुदिया माय एती ता बोयड़ा पोर नाह जाय;
15 जो गेरा पोर एय तो नेचो उतेरनेन केरता टेम नाय गोमाड़ी;
16 एने जो खेताम एय, तो तान फाड़का लेणेन केरता पासाण नाय जाय।
17 ता दिह्या माय जी पेटावाली एने आतल्या सोराह बुजो खावाड़तेय, त्युन केरता हाय, हाय!
18 एने बोगवाना फाय विन्ता किरो काय ज्य हियालान दिह्याम नाय रेय।
19 काहाकाय ता दिह ओहला पिड़ान रेती काय दुनियान सुरवात रेन जो बोगवान बाणायेल हे, एवी वोर नाह ते ईयेल एतो एने नाय उंजु केदी एय।
20 केदी बोगवान ता दिह्याह नाय गेटेवतो, ते काल्लोस जेनवार नाय वोचतो; काहाकाय निवाड़ेल माणहान केरता, तो पिड़ान दिह्याह गेटाड़ेल हे।
21 ती टेम माय कुण बी तुमूह केय, दिखो, मसी न्या हे, एने दिखो, ता हे, ते बुरहो मा किरहो;
22 काहाकाय जुठा मसी एने जुठा जाणकार उठीन उबरी जाती, एने निसाणी एने सोमेज ने बाहेर चोमेत्कारान काम देखाड़ती काय केदी एय सेकी ते निवाड़ेल हेते ताह बी बोड़काव देती।
23 पुण तुमू जोगवीन रिवो; दिखो, मी तुमूह आखी वातु पेलुच रेन केय दियेल हे।
माणहान बिटोख यीशु तान पोशो देरती पोर आवणो
(मत्ती 24:29-31; लुका 21:25-28)
24 ता दिह्या माय ती पिड़ान पासाण दिह आदारलो एय जाय, एने चांद उजालो नाय आपी;
25 एने जुगाम रेन तारा पोड़ने बाज जाती; एने जुगान ताकेत आलाड़ाय जाय।
26 तेवी माणहे माणहान बेटाख मोटली ताकेत एने बोड़ाय हिऱ्यो वादला माय आवतालो देखती।
27 ती टेम तो तान हेरोगदुताह मोकली, एने देरतीन एक कोपरे रेन ते दिहरे कोपरे वोर, कावदेन रेन बोगवानान निवाड़ेल माणहाह एकठा केरी।
अंजीरान जाड़ान किस्सो
(मत्ती 24:32-35; लुका 21:29-33)
28 अंजीरान जाड़ाह देखीन ज्यी वात हिको। जेवी तान डाल हुवाली एय जाथे, एने पाला फुटणे बाज जातेह; ते तुमू जाण जातेह काय उनालो आहनेच हे।
29 तिहेच केरीन जेवी तुमू ज्यु वातुह एताल्यु दिखहो, ते जाण जाज्यो काय टेम आहनेच हे।
30 मी तुमूह खेरीच केथु जाह वोर ज्यु आख्यु वातु पुरी नाय एय जाती, ज्यी पिढी खेतेम नाय एय।
31 जुग एने देरती टेल जाय, पुण मार वचन केदी नाय टेली।
जोगवीन रिवो
(मत्ती 24:36-44)
32 ता दिह्यान एने ती गेड़ीन बाराम कुण नाह जाणेत, नाह हेरगान हेरोगदुत एने नाह बोगवानान बिटोख; पुण आबोख बोगवान ओलोच जाणेह।
33 दिखो, जागताला एने जोगवीन रिवो, काहाकाय तुमू नाह जाणते काय तो टेम केवीह आवी।
34 ज्य ता माणहान गेत हे जो दिहरा देसाम जाणे बुखेत, तान पावराह गेरान आदिकार आप्यो एने आखाह तान काम केय देन होपीन जागल्याह जागतालो रेणेन उकुम आप्यो।
35 तानकेरता जाकता रिवो, काहाकाय तुमू नाह जाणते काय गेरान मालीक कुलबुखे आवी, हांज पोर नाहते आदि राती, नाहते कुकड़ा वाहणेन टेम, नाहते दिह उगणेन पेल।
36 इहकेरीन नाय एणे जुवे काय तो उचकाहुच आवीन तुमूह हुवताला आत केरी।
37 एने जो मी तुमूह केथु तोच आखाह केथु: जागते रिवो।