2
लोखवान बेमारी वाला माणहाह हुदारने
(मत्ती 9:1-8; लुका 5:17-26)
1 थोड़ाह दिह्यान पासाण यीशु पुशो कफरनहूम हेयरा माय आवो, एने ज्यी खुबेर पोसरी गियी काय तो गेरा माय हे।
2 एने ओला होवटा माणहे एकठा टोलवाय गीया काय गेराम जागो नाह रिनो, एने बायणा हेऱ्यो बी जागो नाह ईतो। यीशु ताह वचन होमलाड़ ने बाजरियेल ईतो।
3 तेवी माणहे एक लोखवान दुखाऱ्याह यीशु फाय लावा, एने ताह चार एदमी उखलीन लायेल एता।
4 काहाकाय ताहरी जुलूम गेरदी एती केरीन यीशुन आहने ताह नाह पोचानो, ता गेरान साजाह जान निड़ो यीशु ईतो, ताहरूह उगाड़ देना, एने जेवी ताह वेसड़ी देना। तेवी ता खाटलाह जा पोर लोखवान दुखाऱ्यो लुट रियेल एतो, ताह उतार देना।
5 यीशु ता माणहान बुरहो देखीन लोखवान दुखाऱ्याह केयो, “एय मार बेटा, तारा पाप माफ एय गीया।”
6 तेवी मोकतास देरेमगुरू ताहरी बोह रियेल एता, ता आप आपणा मोना माय विचार केरने बाज गीया,
7 “ज्यो माणुह काहा इहकेरीन किथे? ज्यो ते बोगवानान चिहटा किरेह! बोगवानाह सोड़ीन कुण पाप माफ केर सिकेह!”
8 यीशु तुलेचबूखे तान जीवा माय जाण लिदो काय ता आप आपणा मोना माय कोहलो विचार केरने बाजरेनाह, एने ताह केयो, “तुमू काहा तुमरा मोना माय ज्यो विचार केरने बाजरेनाह?
9 काय ज्या लोखवान दुखाऱ्याह ज्य केणे होपो हे, ‘तारा पाप माफ एय गीयाह,’ काय ज्य केणे, ‘उठ, तारो खाटलो उखलीन चाल?’
10 मी ज्यो साबीत केर सेकथु काय माणहान बेटाख ज्यी देरती पोर पाप माफ केरनेन आदिकार हे।” केरीन यीशु ता लोखवान दुखाऱ्याह केयो,
11 “मी तुवाह केथु, उठ, तारो खाटलो उखेल, एने गेर जातरे!”
12 तुलेचबूखे तो माणुह उठनो, एने खाटलो उखलीन आखा माणहान देखतास बाहेर जात रिनो। ज्यो देखीन आखा बोंगलाय गीया, एने बोगवानान बोड़ाय केरतीन केया, “ओहलो ते आमु केदीच नाह देख्या!”
यीशु लेवीह हादणे
(मत्ती 9:9-13; लुका 5:27-32)
13 तेवी यीशु गेलील ने देरीयान दिड़े पुशो गीयो, एने माणहान गेरदी तान आहने आवी, एने तो ताह हिकाड़नेन सुरवात केर दिनो।
14 जाणे बुखेत यीशु हलफाईन बेटाख लेवीह, फालो उकालन्या चोवकी पोर बोह रियेल दिख्यो, एने ताह केयो, “मार पासाण आव लाग।” तेवी लेवी उठीन तान पासाण चाल दिनो।
15 जेवी यीशु लेवीन गेरा माय रूटो खाणेन केरता बोह रियेल ईतो, तेवी जुलूम फालो उकालनारे एने दिहरा पापी माणहे बी तान पासाण आव लागेल एता, ता आखा यीशु एने तान चेला हेऱ्या रूटो खाणेन केरता पाटला पोर बोह रियेल एता।
16 थोड़ाक देरेमगुरू जा फरिसी माय रेन एता, ताह पापी एने फालो उकालनार माणहा हिऱ्यो रूटो खातालो देख्या, केरीन तान चेलाह केया, “ज्यो फालो उकालनारा एने पापी माणहा हिऱ्यो काहा खाते पिते?”
17 यीशु ज्य होमलीन ताह जापाप आप्यो, “हाजाला माणहाह वोंसीन गिरेज नाह, पुण दुखाऱ्याह हे। मी देरमीह नाह, पुण पापी माणहाह हादणेन आयेल हे।”
उपासान सावाल
(मत्ती 9:14-17; लुका 5:33-39)
18 तेवी बपतीस्मा केरनार योहानान चेला एने फरिसीन चेला उपास देरताला। एने थोड़ाक माणहे आवीन यीशुह केणे बाज गीया, “योहानान चेला एने फरिसीन चेला ते उपास देरतेह, पुण तारा चेला काहा उपास नाह देरते?”
19 यीशु ताह जापाप आप्यो, “काय तुमू आसा केरतेह काय एक वाराड़ा माय पावणा बुखल्यास जातेह? केदी बी नाह! जाह वोर वोवड़ो ता हिऱ्यो हे, ता इहकेरीन नाय केरती।”
20 पुण ता दिह आवती जेवी वोवड़ो ता हिऱ्यो रेन आलेग केराय जाय, ते दिह रेन ता उपास देरती।
21 कुण बी नोवाला फाड़कान ठिगलो जुनाला फाड़का पोर नाह लागाड़ने, नाहते तो ताम रेन थोड़ोक खेचलेय, एने नोवालो जुनालाह रेन पेल एतो, ताह रेन बी होवटो फाट जाय।
22 नोवाला अंगुरान रूहाह जुनाला चामड़ान थेयला माय कुण नाह मेलने, नाहते अंगुरान रोह चामड़ान थेयलाह फाड़ देय, एने अंगुरान रोह एने चामड़ान थेयली दुयू बी खेतेम एय जाती; केरीन नोवाला अंगुर ने रूहाह नोवालाच चामड़ान थेयला माय मेलनु।
विहेवणेन दिह्यान सावाल
(मत्ती 12:1-8; लुका 6:1-5)
23 इहकेरीन एनो काय यीशु एने तान चेला विहेवणेन दिह खेता मायतास जाणे बाजरियेल एता, तेवी तान चेला वाटे चालते जाईन उंब्या तोड़ने बाज गीया।
24 केरीन फरिसी यीशुह केया, “देख, ज्या ओहलोह काम काहा केरतेह? जो विहेवणेन दिह केरने कायदान विरोद हे!”
25 तेवी यीशु ताह जापाप आप्यो, “काय तुमू केदी ज्य नाह वाशा, जेवी दाऊदाह एने तान हातीह बुख लागी एने गिरेज पोड़नी? तेवी दाऊद काय किरेल ईतो।
26 केरीन तो बोगवानान गेरा माय गीयो एने बोगवानाह बेट चेड़ायेल रूटो खादो, ज्य तुलबूखे एनो जेवी अबियाजर मुखी चाकर्यो ईतो। आपणा नियमान गेत ता रोटाह चाकऱ्या ओलास खाय सेकताला, पुण दाऊद ज्या रोटाह खादो एने तान माणहाह बी आप्यो।”
27 तेवी यीशु ताह केयो, “विहेवणेन दिह माणहान केरता बाणायेल हे, नाह काय माणुह विहेवणेन दिह्यान केरता।
28 तानकेरता मी माणहान बिटोख विहेवणेन दिह्यान बी मालीक हे।”