11
बपतीस्मा केरनार योहानान उगे रेन खोबेर
(लुका 7:18-35)
1 जेवी यीशु तान बारा चेलाह उकुम आप दिनो, ते यीशु तान हेयरा माय हिकाड़ने एने पारचार केरनेन केरता ता रेन जात रेनो।
2 बपतीस्मा केरनार योहान जेली माय रेन मसीन कामान खोबेर होमलेल, केरीन तान चेलाह ज्य फुसणे मुकल्यो।
3 “काय आवणार तुस हे, नाहते आमु एगदा दिहरान वाट जुवज्यो?”
4 यीशु ताह जापाप आप्यो, “जो काय तुमू होमेलतेह एने देखतेह, तो आखो जाईन योहानाह केय दिवो:
5 आंदला देखतेह, एने लेंगड़ा चालते फिरतेह, कोढी हुदेरतेह एने बेयरा होमेलतेह, एने मुरेल जीवताला एते जातेह, एने गेरब्याह हाजाली खोबेर होमालावाय जाथे।
6 बोरकेतवालो हे तो माणुह, जो मार केरता ठोकेर नाय खाय!”
7 जेवी ता तारेन चाल देना, ते यीशु जाणे बुखेत योहानान बाराम माणहाह केयो, “तुमू उजाड़ी माय काय देखणे जायेल एता? काय वाराम आलताला टोकराह?
8 ओवता तुमू काय देखणे जायेल एता? काय हुवाल्ला फाड़का पेरनारा माणहाह? जा हुवाल्ला फाड़का पेरतेह, ता राजवाड़ाम रेतेह!
9 ते ओवता तुमू काय देखणे जायेल एता? काय एगदा जाणकाराह देखणे? होव, मी तुमूह केथु जाणकाराह रेन बी मोटलाह।
10 ज्यो तोस हे जान बाराम लिखेल हे: ‘देख मी मार खोबर्याह तार ओंगाण मोकेलथु,’ जो तार ओंगाण तारी वाट तियार केरी।
11 मी तुमूह खेरीच केथु काय जा बायकुम रेन पायदा ईयेल हेते, ताम रेन बपतीस्मा केरनारा योहानाह रेन कुणूस मोठो नाह ईनो; पुण जो हेरगान राज माय आत्याह रेन आत्यो हे तोस ताह रेन मोठो हे।
12 योहान बपतीस्मा केरनारान टेम रेन एवी वोर हेरगान राज माय जोरलेन रिगणो एतेन आयेल हे, एने ताकेतवाला ताह सांडाड़ लेतेह।
13 काहाकाय आखा जाणकार एने मुसान कायदान पुस्तेक ज्या योहाना वोर जाणाव किरते रेना।
14 केदी ज्यी वातुह मान्ने होद्तेह, ते ज्योस योहान एलिया हे, जो आवण्यो ईतो।
15 जान कान एती, ता होमली लेय।”
16 मी ज्यी टेम ने माणहान गेणती कायता हेऱ्यो केरू? “ता माणहे आटा माय बोहणारा सोरान गेत हेते, जा एका दिहराह आयड़ीन केतेह,
17 ‘आमु तुमरी केरता पावली वाजाड़ेल, पुण तुमू नाह नाचना! आमु रेड़ना एने रेड़नेन गीत गायेल, पुण तुमू दुखी नाह एना, ताज ने गेत ज्यी पिढीन माणहे हेते!’
18 काहाकाय बपतीस्मा केरनार योहान नाह खाते पिते आवो, एने तुमू केतेह, ‘ता माय बुतड़ो हे।’
19 एने मी माणहान बिटोख खाते पितेन आवो, एने ता केतेह, दिखो, ‘खादाड़ एने दारूड्या माणहान, एने फालो उकालन्या पापी माणहान हाती हे!’ पुण ईकेल तान कामाह रेन खेरलो ठेराय जायेल हे।”
विण बोरहा पोर हाय
(लुका 10:13-15)
20 उवतो यीशु ता हेयरान माणहाह दोसी ठेरायो, काहाकाय ता माय यीशु जुलूम चोमेत्कारान काम किरेल ईतो, तीबी ता हेयरावाला माणहे तान मोन पापाम रेन नाह बोदलेल एता।
21 यीशु केयो, “हाय, खुराजीन! हाय, बेतसेदा! जो ताकेतीन काम तार माय ईयेल एता, केदी ता सुर एने सेदा माय केराय जाता, ते तावाला माणहे गोंटा फांगरीन एने रोखड़ा पोर बोहीन केवीह ने पापाम रेन मोन बोदेल लेता।
22 तानकेरता मी तुमूह केथु काय नियाव ने दिह तुमरी देशाह रेन सुर एने सेदान माणहान देशा जादा वेठाय ओहली रेय।
23 एने एय कफरनहूम, काय तु हेरोग वोर उचो केराय जाहे? तु ते आंदारकेली वोर नेचो जाहे! जा चोमेत्कारान काम तार माय किरेल एता, केदी सदोम माय केराय जाता, ते तो आज वोर बोणीन रेतो!
24 पुण मी तुवाह केथु काय नियाव ने दिह तारी देशाह रेन सदोम ने देशा जादा वेठाय ओहली रेय!”
वोजाम दाबायेल माणहाह आराम
(लुका 10:21-22)
25 तुलबूखे यीशु केयो, “एय आबा, हेरोग एने देरतीन मालीक! मी तारो दन्यवाद केरथु काय तु ज्यी वातुह इकेल एने सोमेज वालाह रेन लीकाड़ मिल्योह, पुण सोराह देखाड़ेल हे।
26 होव, एय आबा, काहाकाय तुवाह ज्योस हाजो लागो।
27 “मारो आबोख माहु आखोच होप दियेल हे, एने कुणीच नाह जाणेत काय बिटोख कुण हे, आबोख उलोस जाणेह, एने आबोख कुण हे ज्य बी कुण नाह जाणेत, पुण बिटोख उलोस जाह देखाड़ेल हे, तोच जाणेह।”
28 “एय आखा काम केरनारे, एने वोजा माय दाबायेल माहणे तुमू आखा मार फाय आवो, मी तुमूह आराम आपुह।
29 मारो जुवालो तुमरे उपेर विस लिवो, एने माहु फाय रेन हिको, काहाकाय मी किववालो एने मोना माय गेरीब हे; एने तुमू तुमरा मोना माय आराम किरहो।
30 काहाकाय मारो जुवालो होपो, एने मारो वोजो ओलवो हे।”