26
यीशुह देरावणेन विचार
(मरकुस 14:1-2; लुका 22:1-2; योहान 11:45-53)
1 जेवी यीशु ज्यु सोब वातु केय दिनो, ते तान चेलाह केणे बाज गीयो।
2 “तुमू जाणतेह, काय दुय दिह्यान पासाण फसह ने तिवार हे, एने माणहान बिटोख खुरूसखाम पोर चेड़ाय जाणेन केरता देराय जाय। एने ता मुखी चाकऱ्यान गेरा माय टोलवाना।”
3 तेवी मुखी चाकऱ्या एने माणहान डायडाया केफा नावान मुखी चाकर्यान राजवाड़ान खोली माय टोलवाना।
4 एने तान तान विचार केरने बाज गीया, काय यीशुह दोका माय देरीन मार देहु।
5 पुण ता केया, “तिवारान दिह नाह, नाहते माणहा माय देंगो एय।”
यीशु पोर मोंगालो तेल चोपेड़नो
(मरकुस 14:3-9; योहान 12:1-8)
6 जेवी यीशु बेतनियाह माय शमोन कोढीन गेरा माय ईतो।
7 ते एक बायकु दोवल्या देगड़ान सिसी माय मोंगालो जटामासीन गेंदाण्यो तेल लेन यीशुन आहने आवी, एने जेवी यीशु रूटो खाणेन बुहेल ईतो, ते तान मुंडी पोर रोचवी देनी।
8 ज्य देखीन तान चेला रागा माय केणे बाज गीया, “ज्या तेलाह काहा विरखावेह।
9 ज्याह ते हाजीह किमोत केरीन वेचीन गेरब्या माय वाट देती।”
10 यीशु ज्य होमलीन ताह केयो, “बायकुह काहा तारास देतेह? ती मार मुंडी पोर तेल रोचवीन मार हेऱ्यो हाजो काम किरेल हे।
11 गेरीब ते तुमू हेऱ्यास जेलेम रेती, पुण मी तुमू हिऱ्यो नाय रेव।
12 ज्यी मार सेरीर पोर ज्य इत्र रोचवेल हे, तो माहु बुजाणेन केरता किरेल हे।
13 मी तुमूह खेरीच केथु, ‘आखी दुनियाम जाहरी बी ज्यी हाजाली खुबेर पारचार केराय जाय, ता ज्यीन ज्या कामान बाराम बी केती एने ज्यीन एर केराय जाय।’ ”
यहुदा इस्कोरिती बुरहो तोड़ने
(मरकुस 14:10-11; लुका 22:3-6)
14 तेवी यहुदा इस्कोरिती, जो बारा चेला माय रेन एक ईतो, तो मुखी चाकऱ्या फाय गीयो,
15 एने तो केयो, “केदी मी ताह तुमरी आथाम देराव देह, ताहार माहु काय आपहो?” तेवी ता यहुदाह तीस चांदीन रूपिया तोलीन आप देना।
16 एने तो तुलबूखे रेन यीशुह देरावणेन हाजालो मुको होदणे बाज गीयो।
यीशु चेला हिऱ्यो फसहान आखरी खाणो
(मरकुस 14:12-21; लुका 22:7-13,21-23; योहान 13:21-30)
17 अखमीरी रोटान तिवारान पेल्ले दिह, चेला यीशु फाय आवीन फुसतेह, “तुवाह का हाजो लागीह काय आमु तार केरता फसहान तिवार खाणेन तिवार केरहु?”
18 यीशु केयो, “हेयरा माय फोलाणा फाय जाईन ताह किज्यो, गुरू किथे, मार टेम आहने हे; मी मार चेला हिऱ्यो तार गेर फसह तिवार मानावण्यो हे।”
19 तेवी चेला यीशुन वातु मानेन फसहान तियारी केऱ्या।
20 जेवी हांज एनी तेवी यीशु बारा चेला हिऱ्यो रूटो खाणेन केरता बुठो।
21 जेवी ता खाणे बाजरियेल एता, तेवी यीशु केयो, “मी तुमूह खेरीच केथु काय तुमरा माय रेन एक जाण माहु देराव देय।”
22 ज्यी वात पोर ता जुलूम नाराज एय गीया, एने एकेक जाण यीशुह फुसतेह, “एय गुरू, काय तो मी हे?”
23 यीशु जापाप आप्यो, “जो मारी तेली माय आथ टाकेल हे, तोस माहु देराव देय।
24 माणहान बिटोख ते जीहे तान बारामाय लेखायेल हे, पुण ता माणहा पोर हाय जान आथा केरीन मी माणहान बिटोख मार दुसमोनाह होपाय जाय। केदी ता माणहान जेल्मोच नाय एतो, ते तानकेरता हाजो रेतो।”
25 तेवी यीशुह देरावणार यहुदा केयो, “एय रब्बी, काय तो मी हे?” यीशु ताह केयो, “तु केय दिनो।”
मालीकान खाणो
(मरकुस 14:22-26; लुका 22:14-20; 1 कुरिंथीयो 11:23-25)
26 जुलबुखे ता खाताला ते यीशु रूटो लिदो, एने दन्यवाद किऱ्यो एने रूटो मुड्यो, एने चेलाह वाटणेन केयो, “लिवो, खावो; ज्यो मारो सेरीर हे।”
27 पुशो यीशु वाटको विसीन, दन्यवाद किऱ्यो, एने चेलाह आपीन केयो, “तुमू आखा ज्याम रेन पिवो,
28 काहाकाय ज्यी वायदान लुय हे, जी आखान पापान माफीन केरता वोयाड़ाय जाथे।
29 मी तुमूह खेरीच केथु, ‘अंगुरान ज्यो रोह तो दिह आवी ताह वोर नाय पिव, जाह वोर तुमू हिऱ्यो मारा आबाख ने राज माय नोवालो नाय पिव।’ ”
30 पोशा ता गीत गावीन बोगवानान बोड़ाय केऱ्या, ओवता ता बाहेर जेतुन नावान बोयड़ा पोर गीया।
पतरसान नाकारान जाणाव
(मरकुस 14:27-31; लुका 22:31-34; योहान 13:36-38)
31 तेवी यीशु चेलाह केयो, “तुमू आखा आज रातीच मार बाराम ठोकरा खाहो, काहाकाय लिखेल हे: ‘मी गोवालाह मारूह, एने मेंड्रान टुलो फाटा फुट एय जाती।’
32 पुण मी जीव उठुह एने उवतो तुमूह रेन पेल गेलील माय जाह।”
33 पतरस यीशुह केयो, “केदी आखा तार बाराम ठोकरा खाय ते खाय, पुण मी केदी बी ठोकरा नाय खाव।”
34 यीशु ताह जापाप आप्यो, “मी तुवाह खेरीच केथु, काय आज रातीच कुकड़ो वाहणेन पेल, तु तीन वारीन माहु नाकार दिहे।”
35 पतरस यीशुह जापाप आप्यो, “केदी माहु तार हिऱ्यो मोरने बी पोड़ी, तीबी मी तुवाह नाकारू नाय” एने तिहेस केरीन आखा चेला बी केया।
गतसमनी माय विन्ता
(मरकुस 14:32-42; लुका 22:39-46)
36 तेवी यीशु तान चेला हिऱ्यो गतसमनी नावान बोगीचा माय आवो, एने तान चेलाह केणे बाज गीयो, “न्याच बोह रिज्यो, ताहुक मी ता जाईन विन्ता केरथु।”
37 यीशु पतरसाह एने जब्दीन, दुय बेटाख आरही लेन गीयो, एने दुखी एने नाराज एणे बाज गीयो।
38 तेवी यीशु ताह केयो, “मारो जीव जुलूम नाराज हे, न्या वोर काय मारो जीव निकेलने किरेह तुमू न्याच थुबो एने मार हेऱ्या जाकता रिवो।”
39 ओवतो यीशु उंजु जारीक ओंगाण जाईन, मुयान बोरहेस जाय पुड़नो, एने ज्यी विन्ता किऱ्यो, “एय मारा आबा, केदी एय सेकी ते, ज्यु दुखान वाटको मार हिऱ्यो रेन सिटो एय जाय, तीबी जीहे मी होदथु, तिहे नाह, पुण जीहे तु हुदेह तिहेस एय।”
40 पुशो यीशु चेलान आहने आवीन ताह हुवताला दिख्यो, एने पतरसाह केयो, “काय तुमू मार हेऱ्या एकताल बी जागताला नाह रेय सेकते?
41 जाकता रिवो एने विन्ता किरते रिवो, काय तुमू पारेख माय नाय पुड़हो, जीव ते तियार हे, पुण सेरीर कोमजोर हे।”
42 पुशो यीशु दिहरी वार जाईन ज्यी विन्ता किऱ्यो, “एय मारा आबा, मी ज्यो पिव बी नाय ते टेल नाय सेकी, ताहार तारी मोरजी पुरी एय।”
43 तेवी यीशु आवीन ताह पोशा हुवताला दिख्यो, काहाकाय तान डोला निंदी माय गाराय रियेल एता।
44 ताह सोड़ीन यीशु पुशो जात रिनो, तास सोबदा माय पुशो तिसरी वार विन्ता किऱ्यो।
45 तेवी यीशु चेलान आहने आवीन ताह केयो, “एवी हुवतीस रिवो, एने आराम किरो; दिखो, टेम आव लागेल हे, एने माणहान बिटोख पापीन आथा माय देराय जाथे।
46 उठो! चालो एने दिखो, माहु देरावणार आहनेच आव पुचील हे।”
यीशु दोका माय देराय जाणे
(मरकुस 14:43-50; लुका 22:47-53; योहान 18:3-12)
47 यीशु ज्य केणे बाजरियेल ईतोन यहुदा जो बारा चेलाम रेन एक ईतो तो आवो, ता हेऱ्या मुखी चाकऱ्या एने माणहे, एने डायलान उगे रेन मोटली गेरदी, तेलवाऱ्यु एने डेंगा लेन आवा।
48 यीशुह देरावणार ताह ज्य केय दियेल ईतो, “जा एदम्याह मी गुल्या देह तुच हे; ताह देर लिज्यो।”
49 एने चालोच यहुदा यीशुन आहने आवीन केयो, “एय रब्बी, नमस्कार,” एने ताह जुलूम गुल्या दिनो।
50 यीशु ताह केयो, “एय दोस्ती जा कामान केरता तु आयेल हे, तो जेल्दी किर।” तेवी ता आहने आवीन यीशु पोर आथ टाक्या एने ताह देर लेदा।
51 यीशुन हाती माय रेन एक जाण आथ ओंगाण केरीन तान तालवार खेचीन मुखी चाकर्यान पावराह दिन तान कान काट दिनो।
52 तेवी यीशु ताह केयो, “तारी तालवार म्यान माय मेल, काहाकाय जा तालवार चालाड़तेह ता सोब तालवारी केरीन माराय जाती।
53 काय तु नाह जाणेत, मी मारा आबाख फाय विन्ता केर सेकथु, एने तु हेरोगदुता माय रेन बारा सिपायाह रेन जास्ती मार फाय एवीच मोकली देय?”
54 पुण पुस्तेक त्यु वातु पुरी एणे जोरेवरी हे, किहीक पुऱ्यू एती?
55 तुलबूखे यीशु गेरदीह केयो, “काय तुमू तेलवार एने डेंगा लेन माहु डाकु सोमजीन देरणेन केरता आवाह, मी दाड़ीन मोंदिर माय बोहीन हिकाड़तालो, एने तुमू माहु नाह देऱ्या।
56 पुण ज्य आखो ज्यानकेरता ईयेल हे काय जाणकारान वचन पुरो एय।”
तेवी सोब चेला यीशुह सोड़ीन नाह गीया।
मोटला पोंचान ओंगाण यीशु
(मरकुस 14:53-65; लुका 22:54-55,63-71; योहान 18:13-14,19-24)
57 तेवी यीशुह देरनारे ताह केफा नावान मुखी चाकऱ्या फाय लेन गीया, जा देरेमगुरू एने डायला टुलो ईयेल एता।
58 पतरस सीट सिटोच तान पासाण पासाण मुखी चाकर्यान खोली माय वोर गीयो, एने माय जाईन सेवल्यो टेम देखणेन केरता काम केरनारा हिऱ्यो बोह गीयो।
59 मुखी चाकऱ्या एने आखो, मोटलो पोंचो यीशुह मार देणेन केरता तान विरोद माय जुठो पुरावो होदताला।
60 पुण जुलूम जुठा पुरावो देणारे ओंगाण आवा, तीबी नाह जुड़नो, सेवले बुखेत दुय जाणे आवा।
61 एने केया, “ज्यो कियेल ईतो मी बोगवानान मोंदिराह तोड़ीन, ताह तीन दिह्या माय बाणाव सेकथु।”
62 तेवी मुखी चाकर्यो उबरेन यीशुह केयो, “तु काईच जापाप नाह आपेत काय? ज्या माणहे तारे विरोद माय काय पुरावो देतेह?”
63 पुण यीशु ठावकोच रिनो, तेवी मुखी चाकर्यो ताह केयो, “मी तुवाह जीवताला बोगवानान सुगोण आपथु, काय केदी तु बोगवानान बिटोख मसी हे, ते आमुह किय दे।”
64 यीशु ताह केयो, “तुच केय दिनो; मी तुमूह ज्यो बी केथु काय, एवी रेन तुमू निस्तो माणहान बेटाख आखी ताकेतवालान जीवड़े उगे बुहेल एने जुगान वादला पोर आवतालो दिखहो।”
65 तेवी ज्य होमलीन मुखी चाकऱ्या तान फाड़का फाड्या एने केया, “ज्यो बोगवानान चिहटा किरेल हे, एवी आमुह पुरावान काय गिरेज नाह, दिखो, तुमू एवीच ज्यी चिहटा होमल्याह।”
66 तुमू काय सोचतेह? ता जापाप आप्या, “ज्यो मोरनेन लायेक हे।”
67 तेवी ता यीशुन मुया पोर थुप्या एने ताह दुमा केरीन देना, दिहरा थापोड़ दिन केया,
68 एने केया, “एय मसी, आमुह जाणाव केरीन के तुवाह कुण देनो?”
पतरस द्वारे यीशुह नाकारने
(मरकुस 14:66-72; लुका 22:56-62; योहान 18:15-18,25-27)
69 पतरस बाहेर खोली माय बोह रियेल ईतो तेवी एक पावेरनी ता फाय आवी एने केयी, “तु बी यीशु गेलील वाला हिऱ्यो ईतो।”
70 तो सोबान सामने इही किन नाकार दिनो, “मी नाह जाणेत तु काय केणे बाजरेनीह।”
71 जेवी तो बाहेर बायणा पोर जात रिनो, ते दिहरी पावेरनी पतरसाह देखीन, जा ताहरी उबरियेल ताह केयी, “ज्यो बी ते यीशु नासरी हिऱ्यो ईतो।”
72 तो सुगोण खाईन पुशो नाकार दिनो, “मी ओया माणहाह नाह उलखेत।”
73 थोड़ीक वार माय माणहे जा ता उबरियेल एता पतरसा फाय आवीन केया, “खेरीच तु बी ताम रेन एक हे, काहाकाय तारो बोल तारी मालमात उगाड़ दिथे।”
74 तेवी पतरस नाकाऱ्यो एने सुगोण खाणे बाज गीयो, “मी ओया माणहाह नाह जाणेत।” एने तुलेचबूखे कुकड़ो वाह दिनो।
75 तेवी पतरसाह यीशुन कियेल वात एर आवी, “कुकड़ा वाहणेन पेल तु तीन वार माहु नाकार दिहे।” तेवी तो बाहेर जाईन उहकी उहकीन रेड़ने बाज गीयो।