फिलेपियो पौलुस ने लिखा हुआ पत्र
फिलेपियो पौलुस लिखेल पोत्रो
ओलखात
पौलुस फिलीपी वाला विश्वासीह यीशु मसीन जेल्मान कोमीत कोमी 61 सालान पासाण पोत्र लिखेल ईतो। तो जेली मा 1:13 ईतो तेवी लिखेल ईतो निहते रोम माय फिलेपियो हेयरा वाली मोंडलीह लिखेल ईतो। आपु फिलेपियोन बारा माय जुनाला नेमा माय थोड़ोक हिक सेकतेह। फिलेपियो एक राजदानीन हियोर ईतो पेल्ली मोंडली एती, जा माय मकादुनिया माय बुणेल एती। पौलुस एने सिलास एकठास मोंडलीन सुरवात किरेल एता, एने न्या वोर काय एक रातीन केरता जेली माय कोंडायेल ईतो, जेवी ता ताहरो एता। प्रेरितान काम 16
ज्या पोत्राह लिखणे जुलूम वातु एत्यु। पौलुस ती टेमीन वापेर मोंडलीह तान उगे रेन साबासीन केरता दन्यवाद आपणे, जेवी ता होमलेल काय तो जेली माय हे। 4:10-19 तो जेली माय तान देशा कोहलीक एती तो बी दिखेल हे एने मोंडलीह तीमुथीयुस एने एपाफ्रोदितुसान बारा माय कियेल हे। 2:19-30 काय ता तान स्वागत केरी एने तान अगवाईन सम्मान केरी।
रूपरेखा
1. फिलिप मोंडलीह नमस्कार केरीन पोत्रान सुरवात किरेल हे। 1:1-2
2. ओंगाण तो तान देशान बारा माय थोड़ीक जाणकारी देखाड़ेह एने थोड़ीक चिन्ता ताह तो देखाड़ेह। 1:3–2:30
3. ओवतो तो विश्वासी जीवणो जीवणेन हिकाड़ेह। 3:1–4:9
4. पौलुस फिलेपियोन मोंडलीह तान बोकसीस केरता दन्यवाद एने तान आबिवादन मोकलीन निवरावेह। 4:10-23
1
1 मसी यीशुन पावोर मी पौलुस एने तीमुथीयुसान उगे रेन, सोब बोगवानान माणहान नावे जा मसी यीशु माय फिलेपी हेयरा माय एकी केरीन रेतेह, मोंडलीन आदिकारी एने सेवक हेऱ्या।
2 आमरो बोगवान आबोख एने मालीक यीशु मसीन उगे रेन तुमूह गीण एने सान्ती जुड़ते रेय।
पौलुसान विन्ता एने दन्यवाद
3 मी जुलबुखे तुमूह एर केरने, तुलबूखे आपणा बोगवानान दन्यवाद केरने;
4 एने जेवी केदी तुमरे केरता विन्ता केरने, ते जेलेम खुसी माय विन्ता केरने।
5 काहाकाय तुमू पिल्ले दिह रेन आज वोर हाजाली खुबेर पोसरावणेन मार गोवांद्या रियेल हेते।
6 माहु जी वातीन पुरो बुरहो हे काय बोगवान तुमरी विच माय हाजो काम सुरवात किरेल तोच ताह यीशु मसीन द्वारे ताह आवणेन दिह वोर पुरो केरी।
7 तुमरी केरता मारो जो विचार हाजोच हे, काहाकाय तुमू मारा मोना माय आव बुहेल हेते, ज्यानकेरीन काय एने मार बोंदीम एने हाजाली खोबरीन केरता जापाप, एने प्रमाण आपणेन तुमू सोब मार हेऱ्या गीण माय बागीदार हेते।
8 ज्या माय बोगवान मारो गोवा हे काय मी मसी यीशुन गेत मोंग केरीन तुमरी आखान आसा केरथु।
9 मी ज्यी विन्ता केरथु काय तुमरो मोंग खेरली इकेल केरीन एने आखी बातीन मोना हेऱ्यो उंजु बी होवटोह वोदते जाय,
10 न्या वोर काय तुमू हाजाम रेन हाजी वातुह मोंगाल्ली जाणो, एने मसीन दिह वोर निर्दोस बोणीन रिवो, एने दोस मा मांगाड़ो;
11 एने ता देरमान फोला केरीन जा मसी यीशुन द्वारे हेते, बोरपुर एते जावो जाकेरीन बोगवानान बोड़ाय एने स्तुती एते रेय।
मालीकुस जीवाय हे
12 एय बाय बोणहा, मारी ज्यी आसा हे काय तुमू ज्यो जाण लिवो काय मी ज्यो विठेल हे, ताहसे हाजाली खुबेर ने बोड़ती ईयेल हे।
13 न्या वोर काय राजवाड़ान आखा देखरेत केरनार टोलाह, एने न्यावाला आखा माणहाम ज्यो देखाय जायेल हे, काय मी मसीन केरता जेलीम बोंदी हे;
14 एने मालीक माय जा बाहख एने बोणीख हेते, ता माय रेन थोड़ाक मार बोंदी एणेन वोजेसे, ईमोत केरीन बांदिन बोगवानान वचन निदड़क होमलावणेन उंजु बी साहस केरतेह।
15 थोड़ाक ते कुयराय एने राड़ीन वोजेसे मसीन पारचार केरतेह एने थोड़ाक हाजी आसा केरीन।
16 जा माणहे मोंगान वोजेसे ओहलो केरतेह, काहाकाय ज्यो जाणतेह काय मारो नियाव बोगवानान हाजाली खोबरीन राखवालीन केरनेन केरता माहु आपेल हे।
17 एने जुलूम होवटा ते खेराय माय नाह पुण स्वार्थीपोणा माय मसीन पारचार केरतेह काहाकाय ता सोचतेह काय ज्याकेरीन ता जेली माय मार केरता दुख विसती।
18 ज्या माय काय फारेक नाह पुड़ेत! एने मी ज्यासे खुस हे, मोहत्वान ते ज्यो हे काय ता तेरीका केरीन नाहते ता तेरीका केरीन ता नाहते ता खाराब उद्देशा पोर नाहते हाजाला पारचार ते मसीन ईथे, एने मी ज्या माय जेलेम खुसुस रेह।
19 काहाकाय माहु मालुम हे काय तुमरी विन्तान द्वारे, एने यीशु मसीन जीवान दानान द्वारे, ज्यान फोल मारो सुटकारो एय।
20 मी ते ज्यीच हार्दिक लालसा एने आसा मेलथु काय मी काल्लीस वात माय लाजवाव नाय, पुण जीहे मार मोजबुत साहस ने कारेण मसीन बोड़ाय मार सेरीरान द्वारे कायेम इती रियेल हे, तिहेच एवी बी एय, मी जीवतालो रेव नाहते मोर जाव।
21 काहाकाय जीवाय ज्यी काय हे? मार केरता जीवाय मसी हे। एने मोत मार केरता फायदो हे।
22 पुण केदी सेरीराम जीवतालो रेणेच मार कामान केरता फायदान हे, ते मी नाह जाणेत काय कुणीह निवाड़ने जुवे।
23 दुयान विची माय माहु निवाड़नेन तेकलीत ईथे मी जीवायीह ठोकरावीन मसी फाय जाणे आसा केरथु काहाकाय ज्यी वात मार केरता जुलूम हाजी हे।
24 पुण मारो सेरीराम रेणु तुमरी केरता जुलूम जोरेवरी हे।
25 ज्यानकेरीन काय माहु ज्यान बुरहो हे माहु मालुम हे काय मी जीवतालो रेह, एने तुमू आखा हिऱ्यो रेह। जाकेरीन तुमू बोरहा माय मोजबुत ईती जावो एने ता माय खुस रिवो;
26 एने जी मोठवाय तुमू मार बाराम केरतेह, ती मी पोशो तुमू फाय आवुह ते मसी यीशु माय होवटीह वोद जाय।
27 फोक्तो ओलोस किरो काय तुमरो बोलनो चालनो मसीन हाजाली खोबरीन लायेक रेय काय मी आवीन देखु, नाहते नाय बी आवो, तुमरा बाराम ज्योच हुमलो काय तुमू एकुच जीव माय थोब रेनाह, एने एक मोन एन हाजाली खोबरीन बोरहान केरता मेहनेत केरती रेतेह,
28 एने काल्लीस वातु माय विरोद केरनाराह बिय नाह, ज्यो तानकेरता खेतेमान साप निसाणी हे पुण तुमरी केरता सुटकारान एने ज्यो बोगवानान उगे रेन हे।
29 काहाकाय मसीन वोजेसे तुमू पोर जी गीण ईयेल काय ता पोर बुरहो ओलास किरो इही नाह पुण तानकेरता दुख बी विठो;
30 एने तुमूह ओहलीच मेहनेत केरनु हे, जिहकेरीन तुमू माहु केरतालो दिखेल हेते, एने एवी वोर होमेलतेह काय मी ओहलोच केरथु।