3
खेरलो न्यायीपण
1 तानकेरीन एय मारा मोंगाल्ला बाय बोणहा, मालीक माय खुस रिवो। तीस वातु तुमूह जाहार ताहार लेखणेन माहु काय तेकलीत नाह एत, एने ज्या माय तुमरी बोलाय हे,
2 चिताह रेन होमालीन रिवो, ता खाराब काम केरनाराह रेन होमालीन रिवो, ता काट कुट केरनाराह रेन होमालीन रिवो।
3 काहाकाय खेतनावाला आपुस हेते, जा बोगवानान जीवान अगुवाई माय बोक्ती केरतेह, एने मसी यीशु पोर मोठवाय केरतेह, एने सेरीरा पोर बुरहो नाह केरती।
4 पुण मी ते सेरीरा पोर बी बुरहो मेल सेकथु। केदी कुणीह सेरीरा पोर बुरहो मेलनेन विचार एय, ते मी ताह रेन बी वोदार बुरहो मेल सेकथु।
5 आठवे दिह मारो खेतना ईयेल, इस्राएलान वोस एने बिन्यामीनान गेराणान हे; इब्रानीन इब्रानी हे; कायदान बाराम केय ताहार फरिसी हे।
6 तिवारान बाराम केदी केय ताहार मोंडलीह वेला केरावणार; एने कायदान देरमीपोणान बाराम केदी केय ताहार निर्दोस ईतो।
7 पुण जी जी वातु मार फायदान एती, तिहेच मी मसीन वोजेसे दुको सोमजी लियेल हे।
8 मी आपणा मालीक मसी यीशुन ओलखातीन उत्तमतान वोजेसे सोब वातुह दुको सोमेजथु। ज्यान वोजेसे मी सोब वोस्तुन हानी विसेल, एने ताह कोचरो सोमेजथु, काहाकाय मी मसीह सापड़ावु।
9 एने ता माय देखाय जाव; नाह काय ता देरमीपोणा हिऱ्यो, जी नेमाम हे, पुण ता देरमीपोणा हिऱ्यो जो मसी पोर बुरहो केरनेन वोजेसे हे, एने बोगवानान उगे रेन बुरहो केरने से जुड़ेह;
10 काहाकाय मी ताह एने तान पोशो जीव उठणेन ताकेतीह, एने तान दुखान सेंगेतीह जाणु, एने तान मोतीन बाराबोरीह सापड़ावु,
11 काहाकाय मी किहीक बी केरीन मुरेल माय रेन जीव उठणेन पोद वोर पुचो।
निसाणीन उगे दोवेड़नो
12 ज्यो मतलब नाह काय मी सापड़ाव लियेल हे, नाहते खेरलो बोण जायेल हे; पुण ती वोस्तुह देरनेन केरता दोवड़ीन जाथु, ज्यानकेरता मसी यीशु माहु दिरेल ईतो।
13 एय बाय बोणहा, मारो विचार ज्यो नाह सोतो काय मी देर लियेल हे; पुण ज्यो ओलोस एक काम केरथु काय जी वातु पासाण रेय जायेल हेत्यु तीह विहरीन, ओंगाणली वातुन उगे चालतेन,
14 निसाणीन उगे दोवड़ीन जाथु, काय तो ईनाम सापड़ावु ज्यानकेरता बोगवान माहु मसी यीशु माय उपेर हादेल हे।
15 आपु माय रेन जोलाक खेरा हेते, ज्योस विचार केरी, केदी एगदी वात माय तुमरो आंगेच विचार एय ताहार बोगवान ताह बी तुमू पोर देखाड़ देय।
16 तानकेरीन जा वोर आपु पुचील हेते, ताच ने गेत चाले।
17 एय बाय बोणहा, तुमू आखा मिलीन मार गेत चाल चालो, एने ताह उलखो जा ज्यी रिती पोर जीवतेह, जान उदारण तुमू आमरे माय देखतेह;
18 काहाकाय होवटास हेते, जा इहकेरीन जीवतेह, जान वात मी तुमूह जाहार ताहार किरेल हे, एने एवी बी रेड़ी रेड़ीन केथु काय ता सोतान बोलनो चालना केरीन मसीन खुरूसखाम ने विरोदी हेते।
19 तान सेवेट खेतेम हे, तान देव पेट हे, ता आपणी लाजीन वातु पोर मोठवाय केरतेह, एने देरतीन वोस्तु पोर मोन लागाड़ीन रेतेह।
20 पुण आपणो सोतान देस हेरगा माय हे; एने आपु एक सुटकारो आपणार मालीक यीशु मसीन ता रेन आवणेन वाट जोवतेह।
21 तु तान ताकेतीन ता पोरबावान गेत जाकेरीन तो आखी वोस्तुह तान आदिकार माय केरनार, आपणा मुरेल सेरीरान वेह बोदलीन, तान बोड़ायीन सेरीरान गेत बोणाव देय।