रोमीयो पौलुस ने लिखा हुआ पत्र
रोमीयो पौलुस लिखेल पोत्रो
ओलखात
रोमीयोन पुस्तेक आंदास प्रेरित पौलुस 54-58 वोरह्यान विची माय यीशु मसीन जेल्मान पासाण लिखेल ईतो। पौलुस एवी वोर रोम माय नाह पुचेल ईतो, तान केरता तो ज्य पोत्र रोमवाला विश्वासीह खुबेर पोचाड़नेन केरता मुकलेल ईतो, यहुदि एने बिगेर यहुदि दुयून केरता कुरिंथीयो हेयराम रेन लिखेल ईतो, जा तो ती टेम माय रेतालो। पौलुस लिखेल काहाकाय आखा देस यीशु मसी 16:26 पोर बुरहो एने पालेन केर सिके।
रोमीयोन पुस्तेक आखी जागे आखी टेमीन विश्वासीन केरता खास पुस्तेक हे, काहाकाय साप सुतरो एने हास केरीन सोमजाड़ेल हे काय आपु यीशु मसीन सुटकारान बाराम केय सिकेह। पौलुस यीशु मसीन हाजाली खोबरीह जुनाला नेमा हिऱ्यो जुड़ेल हे। कोलाक जाणकारान मान्नो हे काय पुस्तेक माय गीत 1:16 हे जो किथे, “हाजाली खुबेर होमलाड़ ने काय लाज नाय मिले,” काहाकाय ज्यो आखान सुटकारान केरता बोगवानान ताकेत हे तो मानेह: पेल यहुदिन केरता पासाण बिगेर यहुदिन केरता। रोमीयोन पेल्लो बाग 1–12 दुसरो बाग 13–15 माय विश्वासी जीवणान केरता जुलूम कियेल हे।
रूपरेखा
1. पौलुस खास केरीन तान ओलखात आपीन तान पोत्रान सुरवात केरीन किथे काय तो ज्य पोत्र कुणीह लिखेह। 1:1-15
2. तान पासाण तो यीशु मसीन बाराम देखाड़ीन माणहान जातीन देशा एने सुटकारान बाराम लिखेह। 1:16–11:36
3. तान पासाण पौलुस विश्वासी जिवणो केरता हिक आपेल हे। 12:1–15:13
4. तो रोम वाली मोंडलीन माणहाह साबासकी आपीन रोमीयोन पोत्र निवरावेह। 16
1
नमस्कार
1 पौलुसान उगे रेन जो मालीक यीशु मसीन पावोर हे, जाह बोगवान प्रेरित बोणनेन केरता हादाय जायेल हे, काहाकाय बोगवानान ती हाजाली खोबरीन पारचारान केरता आंगे केरायेल हे।
2 जान तो पेलुस रेन तान जाणकारान द्वारे चोखाली पुस्तेक माय लिखेल हे।
3 तान बिटोख आपणो मालीक यीशु मसीन बाराम वायदो किरेल ईतो, तो सेरीरान बावे से ते दाऊदान वोस माय रेन पायदा ईयेल;
4 एने चोखा पोणान जीवान बाव माय मुरेल माय रेन जीव उठणेन कारेण ताकेत हिऱ्यो बोगवानान बिटोख ठेरायेल हे।
5 तास ने द्वारा आपुह प्रेरिताई एने गीण जुड़नी काय आखा बिगेर यहुदि तान नावा पोर बुरहो केरीन तान उकुमान पालेन केरी।
6 जा माय तुमू बी बेचकायेल हेते, जाह बोगवान मालीक यीशु मसीन एणेन केरता हादाड़ाय जायेल हेते।
7 ता सोबान केरता मी लेखथु, जा रोम माय जा बोगवानान मोंगाल्ला हेते, एने बोगवान ताह तान माणहे एणेन केरता हादाड़ाय जायेल हेते।
आमरो आबोख बोगवान एने मालीक यीशु मसीन उगे रेन तुमूह गीण एने हुक जुड़ते रेय।
दन्यवाद ने विन्ता
8 पेल मी तुमरा आखान केरता यीशु मसीन द्वारा आपणा बोगवानान दन्यवाद केरथु, काहाकाय तुमरा बोरहान बोम आखी दुनिया माय एणे बाजरेनीह।
9 बोगवान जान सेवा मी मारा जीवा केरीन तान बेटाख ने हाजाली खोबरीन बाराम केरथु। तोस मारो पुरावो हे काय मी तुमूह किहीक जाहार ताहार एर किरते रिथे,
10 एने दाड़ीन मारी विन्ता माय जेलेम विन्ता केरथु काय बोगवानान मोरजी से तुमरे फाय आवणेन मारी यात्रा सफल एय।
11 काहाकाय मी तुमूह मिलनेन जुलूम आसा मेलथु, काय मी तुमूह एगदो आत्मिक बोरकेत आपु ताकेरीन तुमू मोजबुत बोणीन रिहो;
12 मतलब ज्य काय जेवी मी तुमरी विचीम रेह, ताहार आपु ता बोरहान द्वारा जो मार माय एने तुमरे माय हे, एका दिहराह प्रोत्साहन किरो।
13 मी आखा माणहान केर्जावालो हे, युनानीह बिगेर युनानीन एने हिकेलान एने अनपोड़ान।
14 मी आखा माणहान उदाऱ्यो हे, युनानीन एने बिगेर युनानीन, एने चेतुरान एने फोगान।
15 केरीन मी तुमूह बी जा रोम माय रेतेह, हाजाली खुबेर होमलावणेन जेलेम तियार हे।
हाजाली खोबरीन ताकेत
16 काहाकाय मी हाजाली खोबरीह रेन नाह लाजवात; ज्यानकेरता काय तो एकेक बुरहो केरनारान केरता, पेल ते यहुदि उवतो बिगेर यहुदिन केरता सुटकारान केरता बोगवानान ताकेत हे।
17 काहाकाय हाजाली खुबेर ज्य देखाड़ेह काय बोगवान माणहाह तान प्रती हाजो किहीक बाणावीह ज्य सुरवात रेन सेवेट वोर बोरहान द्वारास हे। जिहकेरीन पुस्तेक माय लिखेल हे: “जो माणुह बोगवाना हेऱ्यो देरमी हे एने लायेक हे तो बोरहान द्वारा जीवतालो रेय।”
माणहान जातीन पाप
18 बोगवानान राग ते ता माणहान सोब ता माणहान पाप एने खाराब एने विण देरमीपोणा पोर हेरगाम रेन देखाह, काहाकाय जा खेरायीह अन्याय केरीन दाबीन मेलतेह।
19 ज्यानकेरता काय बोगवानान बाराम ने बुद्दी तान मोना माय देखाथे, काहाकाय बोगवान ता पोर देखाड़ेल हे।
20 जेवी रेन बोगवान दुनियान बाणावोट किऱ्यो तेवीह रेन तान बिगेर दिखेल गुण, जेलेमक्यी ताकेत, एने तान देवित्व, सोबाव ज्या दुयू पुरी रिती से साप देखातेह ता त्यु वोस्तुह जो बोगवान बाणायेल हे ताह ओलखी सेकतेह तानकेरता ता माणहा फाय काय बाहानो नाह।
21 ता बोगवानाह जाणतेह पुण जो तान मान हे तो ताह नाह आपते, एने नाह दन्यवाद केरतेह। पुण तान जागे तान विचार पुरी रिती से एने तान ठाल्लो दिमाक आदारा माय बोराय जायेल हे।
22 ता सोताह बुद्दीवाला किन फोगा बोण गीया,
23 एने खेतेम नाह एणार बोगवानान बोड़ायीह खेतेम एणार माणुह, एने चीड़ा, एने चार पायवाला जेनवारे, एने लोलनारे जेन्तुन मुरतीन गेत बोदेल दिनो।
24 तानकेरता बोगवान ताह तान मोनान मोरजीन गेत खाराब पोणान केरता सोड़ दिनो काय ता आपसाम तान सेरीरान अपमान केरी।
25 काहाकाय ता बोगवानान खेरायीह बोदलीन जुठ बाणाव देना, एने बाणायेल चिजीन बोक्ती एने चाकरी केऱ्या, जाह बोगवान बाणायेल हे; नाह काय ता बाणावणारान जो कायेम बोरकेतवालो हे! आमेन।
26 तानकेरता बोगवान ताह निच कामनान आथाम होप दिनो; न्या वोर काय तान बायकु बी हाजाला वेवाराह ता हेऱ्यो जो सोबावान विरोद हे, बोदेल देन्यु।
27 तिहेच केरीन एदमी बी बायकु हिऱ्यो हाजालो वेवार सोड़ीन आपसाम कामातुर एन एतखाणे बाज गीया, एने एदमी दिहरा एदम्या हेऱ्या खाराब काम केरीन तान गेलेत कामान फोल होद्या।
28 काहाकाय जेवी ता बोगवानाह ओलेखणे नाह होद्या, ते बोगवान बी ताह तान खाराब मोना पोर सोड़ दिनो, जो ताह नाह केरनो एतो।
29 तानकेरता ता आखी बातीन गुनो, एने खाराब काम, लोब, कुयराय, खुन, राड़, एने कोपेट एने अन्याय केरीन पुरा बोराय गीया एने चुगली,
30 एने एका दिहरान बुराय केरनारे, बोगवानान चिहटा केरनारे, मोठलाय एने गोमेंड केरनारे, बुराय केरनेन केरता जुलूम वाटु होदणारे, एने आईख आबाख ने उकुम नाह मान्नारे,
31 विण बुद्दीवाला, बुरहो तोड़नारे, विण मोंगावाला एने विणदेया वाला एय गीया।
32 ता जाणतेह काय बोगवानान नेम काय किथे, जा माणहे ओहली वाटी पोर चालतेह ता मोतीन लायेक हेते, तीबी ता माणहे नाह फोक्तो ता कामाह केरतेह। पुण ओहला काम केरनारे माणहाह रेन खुस बी एतेह।