14
मेंड्रो एने तान माणहे
1 तेवी मी मेंड्राह सियोन बोयड़ा पोर उबरियेल दिख्यो; एने ता हेऱ्यो एक लाख चोवरेचाड़ीस एजार माणहे एता, ता माणहान निंडाला पोर मेंड्रान एने तान आबाख ने नाव लिखेल एतो।
2 एने हेरगा माय रेन एक मोटलो आवाज होमलानो जो पाण्यान मोकतास खोदरा, एने चिल्लाटा देन आयेड़नारान गेत एतो। एने जो आवाज मी होमलेल तो ओहलो एतो काय रेणथो वाजाड़नार रेणथो वाजाड़ ने बाजरेनोह।
3 ता राजगादिन ओंगाण, एने चार जिवताला जेनवेरान, एने डावाला माणहान ओंगाण एक नोवालो गीत गावणे बाजरियेल एता। देरती पोर रेन वेचाता लेन सोड़ेव लियेल एता, ता एक लाख चोवरेचाड़ीस एजार माणहाह सोड़ीन, कुण बी ता गीताह हिक नाह सेकतालो।
4 ता ओहला माणहे हेते जा केदी बी एगदी बायकु हेऱ्या सिनालो नाह किरेल एता, पुण ता कुवारला हेते; एने जा का बी मेंड्रो जाथे तान पासाण चाल देतेह। आखा माणहान जाती माय रेन ताह वेचातो लेन सोड़ेव लियेल एतो, ता बोगवानान एने मेंड्रान केरता पाक ने पेल्ला फोल हेते।
5 तान केदी बी जुठ बुलील नाह एता; पुण ता निर्दोस हेते।
तीन हेरोगदुत
6 पुशो मी एक उंजु हेरोगदुताह जुगाम उड़तालो दिख्यो, ता फाय होमलाड़नेन केरता जेलेमक्योन हाजाली खुबेर एती, ज्यी खुबेर देरती पोर रेणारा आखा देस, गेराणो, एने आखी बाषा बोलणारान केरता एती।
7 तो हेरोगदुत आयड़ीन केयो, “बोगवानान मान पान किरो, एने तान मोठवायीन केरता तान स्तुती किरो! काहाकाय आखा माणहान नियाव केरनेन टेम आव लागेल हे। एने तास ने आरादना किरो, जो हेरोग, देरती, देरीयाह, एने पाण्यान खोदराह बाणायेल हे!”
8 तेवी ज्यान पासाण एक उंजु हेरोगदुत ज्यो कितेन आवो, “पोड़ गीयो! तो मोटलो बाबिलोन पोड़ गीयो! जो तान खाराब कामान दारो आखा देसाह पिवाड़ील एतो!”
9 न्या दुयून पासाण एक उंजु तीसरो हेरोगदुत मोटली आवाज माय ज्यो कितेन आवो, केदी एगदो ज्या जेनवेरान एने तान मुरतीन आरादना केरी, एने ता आप आपणा निंडालो पोर तान साप लागाड़ती,
10 एने ता बोगवानान रागान दारो पिय, ओहली केड़ेक दारो जो बोगवानान वाटका माय बुणेल हे! ता माणहाह चोखाला हेरोगदुतान एने मेंड्रान ओंगाण हेलेगतालो आक्ठो, गंदक माय पिड़ा वेठणे पोड़ी।
11 तान पिड़ान दुवाड़ो कायेम कायेम उटती रेय। जा माणहे ता जेनवेरान एने तान मुरतीन आरादना केरती एने तान नावान साप लागाड़ती, ता माणहाह रात दिह हुक नाय जुड़ी।
12 केरीन बोगवानान माणहाह दिर मेलनेन जोरवरी हे, जा बोगवानान उकुमाह मानतेह एने यीशु पोर बुरहो मेलतेह।
13 पुशो मी हेरगाम रेन ज्यो आवाज होमल्यो, “ज्यो लिख: बोरकेतवाला ता हेते, जा मालीक पोर बुरहो केरनेन पासाण मोरती!”
चोखालो जीव किथे, “होव, काहाकाय तान मेहनेत से ताह आराम जुड़ी, एने तान काम ने ईसाब ता हेऱ्यो मेलाय जाय।”
देरतीन कामाय काटणो
14 ज्यान पासाण मी एक दोवल्यो वादलो दिख्यो, एने वादला पोर माणहान सोरान गेत कुण तीबी बोह रेनोह, तान मुंडी पोर होनान मुकूट एने आथा माय दाराल्ल्यो दातलो ईतो।
15 पुशो एक उंजु हेरोगदुत मोंदिर माय रेन निकलीन वादला पोर बोह रियेल ता माणहाह मोठेस आयड़ीन केयो, “तु दातला केरीन पाक काट ली, काहाकाय पाक काटणेन टेम आव लागेल हे; एने देरतीन पाक पुरी रिती से तियार एय जायेल हे!”
16 तेवी जो वादला पोर बोह रियेल ईतो, तो तान दातला केरीन देरतीन पाक काट लिदो, एने देरतीन काटणी केराय गियी।
17 तेवी एक उंजु हेरोगदुत हेरगावाला मोंदिर माय रेन बाहेर निकेलनो, तान आथा माय बी एक दाराल्ल्यो दातलो ईतो।
18 एक उंजु हेरोगदुत वेदी माय रेन बाहेर आवो, जाह आक्ठा पोर आदिकार ईतो, तो ता हेरोगदुताह जा फाय दाराल्ल्यो दातलो ईतो। मोठेस आयड़ीन केयो, “काहाकाय देरतीन अंगुर हास केरीन पाक जायेल हेते, केरीन अंगुर ने गुमसाह दातला केरीन काट ली!”
19 तेवी हेरोगदुत तान दातलाह देरती पोर फिरावीन देरतीन अंगुर काट लिदो, एने ताह बोगवानान बयंकर रागान रोह ने कुंडा माय जुगार दिनो।
20 हेयरान बाहेर रूहान कुंडा माय अंगुराह रोहंदेल दिनो, एने रूहान कुंडा माय रेन ओलो होवटो लुय निकेलनो काय गोड़ान लगाम वोर पोच गीयो, एने तीन होव किलो मिटर वोर वोय गीयो।