तीतुस पौलुस ने लिखा हुआ पत्र
तीतुस पौलुस लिखेल पोत्रो
ओलखात
तीतुसान पुस्तेक पौलुसान चार पुस्तेक माय रेन एक हे, जाह मोंडलीन केरता लेखणे रेन देन एगदा माणहान बाराम किथे। दिहऱ्यु तीन पोत्र्यु 1 तीमुथीयुस, 2 तीमुथीयुस एने फिलेमोन हे। पौलुस तीतुसाह लेखणे बाजरियेल ईतो, पुण तो ज्यो बी लिखेल ईतो काय पोत्र एक मोकेलनाराह दिरेह, ज्यो तीतुस पेलुस रेन जाणतालो। पौलुस शायद मसीन जेल्मान बाद 63-65 वोरह्यान विचीम ज्या पोत्राह लिखेल ईतो। एने ज्यी पोत्री आखी मोंडलीन माणहान केरता जोरेस वाचाय जाणे जुवे, आपु ज्याह जाण सेकतेह। काहाकाय तो तान योग्यता किथे।
पौलुस तीतुसाह क्रेते हेयरान मोंडलीन देखरेत केरनेन केरता उकुम आपेल ईतो। पौलुस मोंडलीन डायलाह हिकवोण आपणेन केरता ज्यी पोत्री लिखेल ईतो। पौलुस तीमुथीयुसाह तान पोत्रा माय एक हारको चेतावणी आप्यो। तान पोत्री माय कियेल हे काय मोंडली माय अगुवाह ठेराय जाणे जुवे। मोंडलीन अगुवाह आज ज्यो जोरेवरी माणहाह होमालीन देखरेत केरने जुवे।
रूपरेखा
1. पौलुस डायलाह ठेराणेन केरता तीतुसाह चेतावणी आप्यो। 1:1-16
2. माणहाह बोगवानान जीवाय जीवणेन केरता हिक जाय केरीन चेतावणी आपेह। 2:1–3:11
3. पौलुस तान काह योजनाह सोमजाड्यो एने शाबास केयीन निवरावेह। 3:12-15
1
नमस्कार
1 पौलुसान उगे रेन जो बोगवानान पावोर एने यीशु मसीन प्रेरित हे, बोगवानान निवाड़ेल माणहाह तान बोरहा माय मोदेक केरनेन केरता एने आमरा देरमान खेरली एकलीन इही वोदाड़नेन केरता मोकलायेल हे।
2 तो जेलेमक्यो जीवणान आसा जान वायदो बोगवान कायेम किरेल हे, तो केदी बी जुठ नाह बोलने।
3 पुण ठिख टेम माय तान वचनान पारचारान द्वारे देखाड़ेल हे, जो आपणा सुटकारो आपणारा बोगवानान उकुमान गेत माहु होपाय गीयो, एने मी पारचार बी किरेल ईतो।
4 तीतुसान नावाम, जो बोरहान मेल मिलाप ने विचारा माय मारो खीरलो बिटोख हे:
बोगवान आबोख एने आपुह सुटकारो आपणार यीशु मसीन उगे रेन तुवाह गीण एने सान्ती जुड़ती रेय।
क्रेते माय तीतुसान काम
5 मी तुवाह क्रेते माय ज्यानकेरता मेलीन आयेल काय ज्यु वातु बाकी हेत्यु त्युह हुदारी, एने मार उकुमान गेत एक एक गावा माय डायडाया माणहाह निवाड़ेन मेली,
6 जाह तु निवाड़ हे तो निर्दोस एय, एने तान एकुच बायकु रेणे जुवे, एने तान सोरा बुरहो केरनारे रेणे जुवे, एने ता माय सिनालो केरनार एने कानुनाह तोड़नारे नाय जुवे।
7 काहाकाय पुडारीह बोगवानान कारबारी एणेन कारेण निर्दोस रेणे जुवे, एने नाह एकइट्यो, नाह राग केरनार, नाह दारूड्यो, नाह राड़ कुट्यो, एने नाह लुटीन कामायेल कामाईन लोबी,
8 पुण पावणाय केरनार, एने जो हाजो हे ताह मोंग केरनार, संयमी, नियाव केरनार, चोखालो एने सोमेजदार एय।
9 एने तो विश्वासयोग्य वचना पोर जो देरमान पारचारान गेत हे, मोजबुत रेय काय उत्साहित एन खेरलो हिकवोण माय पारचार केर सिके, एने जा विरोद केरतेह तान मुय बोंद केर सिके।
10 काहाकाय कानुन तोड़नारे, फालतुक वातु बोलनारे एने ठेगणारे जुलूम माणहे हेते, खास केरीन खेतना ईयेल माय रेन।
11 तान मुय बोंद केरने जुवे, एने ज्या माणहे ठेगीन कामावणेन केरता जी वातु हिकाड़ने नाय जुवे, ओहल्यु वातु हिकाड़ीन गेराणान आखा माणहाह बिगाड़ देतेह।
12 क्रेतीन माणहाम रेन एक जाणाव केरनार तान माणहान बाराम खुद कियेल हे जो तास ने हे, कियेल हे, “क्रेतीन माणहे कायेम जुठ बोलतेह, खाराब जेनवार, एने आलह्या खादाड़ हेते।”
13 ज्यी गोवाय खेरली हे, तानकेरता ताह दोपकावीन चेतावणी आप्या केर काय ता बोरहाम मोजबुत एय जाती।
14 एने यहुदिन वार्ता पोर एने ता माणहान उकुमा पोर द्यान नाय देय, जा खेरायीह नाकार केर देतेह।
15 चोखाला माणहान केरता आखी वोस्तु चोखी हे, पुण एठा एने अविश्वासी माणहान केरीन कायच बी चोखो नाह सोतो, काहाकाय तान इकेल एने मोन दुयू एठा हेते।
16 आमु बोगवानाह ओलेखतेह केरीन ता केयीन देखाड़तेह, पुण कामा माय ताह नाकारतेह, काहाकाय ता खाराब एने उकुम नाह माणनारे हेते, एने काल्ला बी हाजा कामान लायकीन नाय मीले।