27
Yáganëngani Jesos Piratoquë.
(Mr 15.1; Ir 23.1-2; Jn 18.28-32)
1 Oquëtaguetamananaque, iquengaigaca iróguiri Jesos antagaisati itingomipague saseriroti aisati antiasipari jorío.
2 Yoguëshotaiguëri yáganëri cara itimi basiniati itingomi cobeingari, ira jitacha Pirato.
Icamaque Joras.
(Irag 1.18-19)
3 Cara igóque Joras, ira ágagantëri Jesos, cara iquengaigaca iróguiri Jesos, iquengasëretabitaca. Yoguipigaineri itingomipague saseriroti aisati antiasipari ira 30 iguitso quirequisonori.
4 Icantaigapëri:
—Jerica piguireguite. Teni onganinate ora nacanque, tenta ingantëmate Jesos ora quimingaro. Notsoigëgotasitacari naro.
Yotabitobëri saseriroti:
—Jemita ora picanque, iroonti pasi.
5 Aique imionganaineri quirequi cara ibangoquë Tosorintsi, ipiganaja Joras. Aique iáque, yáguë sibitsa isiticanaca iriati.
6 Ira itingomipague saseriroti yágairi iguireguite, icantaiguë:
—Te inganinate angábintseri ica quirequica omeri Tosorintsi. Iriantinta ipënabenqueri eiro arota irócagantiri.
7 Aro yosamitobaca:
—¿Pairo anganqueri?
Iquengaigaca:
—Intsome omanantaiguero quibatsi atiantimari ira camatsine ira te aneiri paniacha parigotiquë.
Aro yamanantë quibatsi ora yágapinintaigui, inti cobiti.
8 Iroro irooti yamai ojitaguëca oca quibatsica: asi iraraa.
9-10 Aro imoncaraquero isanguenare Jeremías:
Yágaigairi ira 30 iguitso quirequisonori. Irianti quirequi ipënataca cara yágagantëri Quirisito. Irianti arosata cara yametaiga jorío jirai. Yamanantaiguë quibatsi caninaro asi cobiti. Ira Atingomi agáqueri iromanantëro.
Aro isanguenaquero Jeremías jirai.
Icomantëgotëri Jesos Pirato.
(Mr 15.2-15; Ir 23.3-25; Jn 18.33–19.16)
11 Aro yaratingopë Jesos catingasatiquë basiniati itingomi cobeingari jitacha Pirato. Yosamitobëri iriro:
—¿Obiroco itingomi joríojegui?
Icanqueri Jesos:
—Jee, Naro.
12 Aique cara icomantëgotëri itingomipague saseriroti aisati antiasipari, imairetanë Jesos, te irotopitiri.
13 Icanqueri Pirato:
—¿Teco pinguemiro oca icantocotaiguëmica? ¿Pairo te potapibiritiri?
14 Carari te irotopitëmatiri. Iquenganeintacari Pirato, te irogóte pairo inganque.
15 Aro antagaisati osarini omoncaraca jiesita cara iquengaigaca joríojegui jiraisonori cara yabisobenqueri ironomire Tosorintsi cara Ejípitoquë. Cara jiesitaquë yameta Pirato iromisotocajiri paniro ira iromingane, ira icoigaiguë jorío.
16 Ainta tojai iromingane. Paniro jitacha Barabás. Irianti ógueri.
17 Cara yapatotaigaca jorío, yosamitaigabaqueri Pirato:
—¿Pairi picogaigui nomisotocajimi? ¿Picogaiguico nomisotocajimiri ira Barabás, iraco Jesos nomisotocajimi, aisati ijitaigui Quirisito?
18 Igótocoqueri Pirato cara iguisagantasitacari Jesos joríojegui tenta iraninte inguemisantiri imatsiguenga. Ijitabeca Pirato inganqueme jorío: “Nocogaigui pomisotocajinari Jesos”.
19 Isobigasegui Pirato iragáantomentoquë cara yameta iquemaguetiri matsiguenga, ocomantabitapari iina:
—Quero pógagantiri Jesos. Icaninati Iriro. Naraningui naquisaniqueri, tojai naqueincoqueri.
20 Carari itingomipague saseriroti aisati antiasipari jorío iquiancagajiri joríojegui iromanocoqueri Pirato iromisotocajiri ira Barabás aisati irócagantiri Ira Jesos.
21 Aisati yosamitairi Pirato:
—¿Pairi picogaigui nomisotocajimi?
Yotabitaiguëri:
—Pomisotocajinari ira Barabás.
22 Aique yosamitaiguëri Pirato:
—¿Pairo nanganqueri Ira Jesos, aisati ijita Quirisito?
Icantaiguëri joríojegui:
—¡Popëicotiri!
23 Yotabitaiguëri Pirato:
—¿Pairoroco icantagueque te ongomeite ora nopëicobiriqueri?
Icaimaiganaque jorío:
¡Popëicotiri!
24 Aro igótanë Pirato itsipiriasica yosamitabitacari tojainta iguisaneinqueri Jesos joríojegui. Aro igáqueri ironomire:
—Pomapëna nija.
Yamapëneri, iquibococa irogótacaguiri jorío te iraninte irócagantiri Jesos. Icanque:
—Teni naninte naro nógagantiri. Pinintaiguica obirojegui, iroonti pasi. Teni naro agáantirine.
25 Yotabitaiguëri matsiguenga:
—Nocogasantaiguë ingamaque. Caninataque inguisenata naroegui Tosorintsi aisati caninataque inguiseri notomijegui.
26 Aique yomisotocajiri Barabás. Aisati igáqueri soraro iripasataigueri Jesos, aisa iribëquëgotëri.
Isërontaigacari Jesos soraropague.
(Mr 15.16-20; Jn 19.1-3)
27 Aique yágaiganaqueri cara ibangoquë cobeingari, icaimaiguëri tojai basini soraro.
28 Aique yágabitsaqueri imanchaqui, ipëri basini inaga, quiraaquisaamagori.
29 Imatseiqueri iroonti totsei. Aisati ipëri chocopi, icanqueri:
—Pomogotiro oca ocarapi chocopi.
Aique ishongaigapari soraro yobaticagueritotomemegapari, isërontaigacari, icantaiguëri:
—¡Obiro Natingomi! ¿Aisonorico Obiro itingomi joríojegui?
30 Aisati ijobataiguëri, yágabitsaqueri chocopi ipasataiguëri iguitoquë.
31 Aroqueque icabíntsátaiguëri, aisati yágabitsaqueri quiraaquisaamagori manchaguintsi, icaagobëri iraisati imanchaqui, yágaiganaqueri cara iribëquëgotaiguëri.
Ipëicotaiguëri Jesos cara corosiquë.
(Mr 15.20-32; Ir 23.26-43; Jn 19.17-27)
32 Aro yágaiganaqueri Jesos. Itonguibocari sërari Sirenesati, ijita Simón. Aro imeratobacari soraro, igáqueri:
—Páganëneri igorosite.
Aro yáganëneri.
33 Yaretaigaca Górogotaquë ora ocanti osigaro iguito igamaga.
34 Aro ipëtabecari Jesos oja obaa ogonoataga isincana; iniantacaro Jesos, te iraninte iróguimaro.
35 Cara aroque ipëicotaiguëri soraro corosiquë, aique imaguimpibintëqueri imanchaquipague Jesos ipabacaguecaro yotsatiancaro. Aro omoncaraca Sanguenari ora cantatsi:
Imaguimpibintaiguëro nomanchaqui ora irogóontëma pairiraca áganërone.
36 Aique isobiaque osobiquë corosi inetsaiguëri.
37 Aisati yoguëro jonoica corosiquë, isanguenare Pirato. Isanguenaquero pairoraca ipëicobiriqueri. Ocanti: “Iriro Ica Jesos Itingomi joríojegui”.
38 Aisati ipëicotaiguëri pite cosirinti itsibatacari Jesos. Ainta paniro ibacosonoriquë Jesos, basini imatepacoquë.
39 Ainta yabisanaqueri abatsiquë, iniopëri Jesos, icabíntsáigapëri, ipoteguitotaigapa,
40 icantaiguëri:
—Pogomeriguetiro ibango Tosorintsi, aisati ongaraque maba cataguiteri, pobetsicairo. Atsi yamai pigabisaicotajima Obiati. Obiroca Itomi Tosorintsi piguëtanae corosiquë.
41 Aisati isërontaigacari itingomipague saserirotijegui, aisati iraegui ogomeantiro isanguenare Moisés, aisati bariseoegui aisati antiasipari, icantobaganaca:
42 —Yogabisaicotaiguëri imatsiguenga carari te iragabisaicotima Iriati. Iriroca Itingomi joríojegui, iraguëtanae corosiquë. Nanetsaiguëri, aro nanguemisantaiguëri.
43 Itingomintabecari Tosorintsi Iriro. Icanque: “Naro Itomi Tosorintsi”. Nanetsaiguëri aroca iragabisaicoqueri Itomi yamai.
44 Aisa icanqueri ira cosirinti ipëicotacaca icantocotaguetasicari, isërontaigacari aisati.
Icamaque Jesos.
(Mr 15.33-37; Ir 23.44-46; Jn 19.28-30)
45 Cara catinga paba otsitinitanë antagaisati quibatsi irooti cara ochapinitanë.
46 Aro icaibatanë Jesos:
—Eri, Eri, ¿Irama sabacatani?
Ocanti: “Pabati, Notosorintsite, ¿Pairo pijocobitanëna?”
47 Ainta matsiguenga cara iquemaiguëri icantaiguë:
—Pinguemiri. Icaimërini Erías comantantatsiri.
48 Aro isiganaca poro, yáguë ichomicantaro, yoaquero obaaquë cochori. Yoguëneri chocopiquë itimagonaguitanaca ipëri Jesos iróguimaro.
49 Ainta basini icanque:
—Irinita. Quero popiri. Atsi anetserita aroca iribocasitapëri Erías iragabisaicopëri.
50 Aro icaimasantanai Jesos, irooti icamantaca.
Inibatëgotëri ira niaiguëri Jesos cara icamaque.
(Mr 15.38-41; Ir 23.47-49)
51 Cara icamaque Jesos, aito cara otisaraanaca aganguisati ora yotigantaro ibango Tosorintsi. Iroonti oquibepiriga tera yoguëro arota quero iqui pairiraca. Oparintanaca jonoquë, otisaraanaca irooti osobi. Aitosati posebatanaca quibatsi, moque moque moque, piquëtareaguetanë oquibe mopë.
52 Yasirecotanaca camatsiri, icaniatanai tojai quemisantatsiri.
53 Aique cara icaniatanai Jesos icabiritanaca iáiguë camabetachari cara Jerosarénquë. Iniaigapairi matsiguenga tojai.
54 Aro ira capitán aisati isorarote inetsaigaseguiri Jesos, cara iquemaigabaquero posebatanaca quibatsi, iniaiguëro cara otsitinitanë, iniaiguëri igamaga cara icabiritanaca, iquenganeintasantaca icantaiguë:
—Aisonori, Iriro Itomi Tosorintsi.
55 Ainta jaqueronta tsinanepague onetsaiguëri Jesos aisati. Opaniaca Garireaquë. Coshoni poguiataiguëri Jesos opapinintaiguëri tojai omitocotaiguëri.
56 Ainta María Magararasato aitosati basini María iniro José aisati Santiago, aisati iniro piteni itomi Sebereo, aisati basini tsinane. Oniaiguëri Jesos cara icamaque.
Yomianquengani Jesos omoroquë.
(Mr 15.42-47; Ir 23.50-56; Jn 19.38-42)
57 Cara ochapinitanë ipocasiqueri Pirato poro Arimateasati jitacha José. Iriro irogomere Jesos aisati, iquemisanqueri.
58 Yamanopëri Pirato:
—Camaque Jesos. Nocoguini pinintacaguina náganëri nomianqueri omoroquë.
Aro igáqueri isorarote:
—Pinintacaguiri ica iráganëri igamaga Jesos.
59 Aique iáque, yáganëri igamaga iponatancari tocoya irorai.
60 Yoguëri omoroquë cara iroraique yomoroque José. Ititiguëro mopë omoroquë, yasitocoontacari. Aro iátaji.
61 Ainta pisobiaque María Magararasato aisati basini María, oniaiguëri cara yomianqueri.
Iáque soraro yomisantaigabitacaro omoro cara ini Jesos.
62 Pabisanaque cataguiteri ora jitacha Pásicoa cara ipëicoiguëri Jesos. Oquëtaguetamanë iátasitaiguëri Pirato ira itingomipague saseriroti aisati bariseopague.
63 Icantaigapëri:
—Nogobeingarite, naquengaigairo cara icanque cani ira matobiantatsiri: “Nangamaque, aique ongaraque maba cataguiteri, nanganiatanae”.
64 Yamai nocogaiguë pigátinari soraropague iromisantiro omoro cara yoguëri igamaga. Iranetsasantiro maba cataguiteri arota quero iátasitiri irogomere yágairi igamaga inganque: “Icabiritanaa icaniatanai”. Jirai tojai yamatobianti; yamai aroca iráganëri irogomere, iromatobitasantaiguëri matsiguenga.
65 Aro Pirato igáqueri isorarote:
—Atsi pijáigue, pomisantasanoiguero omoro.
66 Aro iáiguë yasitocotasantëri, itsinetëgotëri yomisantasantëro omoro soraro.