7
Yesu iya koyum Lang Para Kasoulani lang para hu Yopai
1 Iyamulan hape, Yesu iya rakaiyani kol namandran hape Kaliliy, pe mbuwalin para kiya yau kol namandran hape Yutiyah, paratesah, hu pohon ta hu Yutah para ariya, ara huro longe yiy para hu katingundrun.
2 Hapeko Lang Para Kasoulani lang mepo hu Yutah kalohongani lang huro nondriya hu yopai nakisa pakeh.
3 Pwen nali Yesu hu hupwai iya kili yiy hupa, “Wou atali iye pe aya kol namandran hape Yutiyah, pwen andre ndramiram hu kanime hu ndraikiya pwoke ambusiy.
4 Kapa hamou inamiliy para kimbusi melit kiro mbulmara hu ndramat, ara kinho mbusi melit kokohon pwi. Kapa nambusiy tehen tora, pwen apwaingani wou aya mbulmara hu ndramat.”
5 Paratesah, nalin hu imwonen, ara hu kanpwotisingi lohongahu kinna kili yiy pwi yi.
6 Pwen Yesu ipwai iya kili hu ipa, “Lenge, para kupwaingani yo, ara mapu, hapeko wawu ara lang masih ita hiyan o isa kili wawu.
7 Hu ndramat para kol pwan, ara andre hu kanmwisnani wawu pwi, hapeko andre hu kamwisnani yo, paratesah, titiye mepo utiyaniy, ara ipwaingani kultuwayi hu pwassin.
8 Pwen wawu kaya Yon. Yo ko lenge para kuya Yon ara mapu, paratesah, lenge imwonen, ara kinsa rayah mapu.”
9 Yesu ipa tora iya kili hu, pe yiy iye ndron kol Kaliliyy.
10 Pwen nalin hu mendreheh kanyau kanna Yon, pe yiy iho ndruwahu yi, hapeko kinna ngawan pwi, iya iho kohon o.
11 Pe huro nondriya yon ara, ara hu Yutah huro ten yiy pe huro sok hupa, “Ndramat ara aleheh?”
12 Pe hu ndramat soyon iya, ara huro panguluwani Yesu mwalingahu, hayah tahu huropa, “Yiy ara ndramat hiyan.” Pe hayah tahu yi hupa, “Pwi, yiy ngara kipwasike hu ndramat.”
13 Hapeko kinlahiy para hamou tahu kipwaharai kiya ngawan, ara pwi, paratesah, hunoh ta hu pohon tahu Yutah.
Yesu ihinuwani hu ndramat iro Yon
14 Pe huro nondriya Yon imwonen, pwen Yesu iya kowa yumwa totohun namandran pe iro hinuwani hu ndramat.
15 Pwen hu pohon tahu Yutah, ara lohongahu indrap pe hupa, “Ndramat ariyo iwiri lohongai para hinonou tapeh, mepo kinna nondriya handra hinonou pwi?”
16 Pwen Yesu isomwi hu ipa, “Hinonou to, ara ato mbukeno pwi, hapeko iyau kili yiy mepo ipwandrisa yo usa.
17 Kapa hamou kinamiliy para kimbusi namiliwa Ngindrai, pwen andre kipahasaniy tehe hinonou to iyau kili Ngindrai, ndre urupo pwai iyau lohongo mbukeno.
18 Pwen yiy mepo kiwong kiyau pwoke nopwaran tan mbukenan, ara isikiye yiy mbukenan, hapeko yiy mepo iwiri pwoke nopwaran iyau kili yiy mepo ipwandrisa yiy isa, ara ngara kiwong ndrokonan, pe hape pwasoyou kinto kili yiy pwi.
19 Mose kiniyki nongan para pwahanou kinsa kili wawu, ndre? Hapeko hamou tawawu kinpwotisingi lohongan kinna nongan para pwahanou, ara pwi. Pwen paratapeh wawu tora nohonou para wawu pakatingundru?”
20 Pwen hu ndramat soyon ara husomwi Yesu hupa, “Wou ara sinai ita ndritam, hiyeh iripo nohonou para pakitingundrum?”
21 Pwen Yesu ipwai iya kili hu ipa, “Umbusi ndraikiya pwoke handra pe wawu lohonge ndrit.
22 Mose ipwahanou wawu para wawu kasondriti sangi wawu, pe pwahanou para sosondrih, ara kinyau kili Mose pwi, hapeko iyau kili hu tumbu wawu hu. Pe iro mwonen lang Sapat, ngara wawu kasosondrih sangi mbunah hamou.
23 Pwen kapa mbunah hamou kasondriti sangin kiro mwonen lang Sapat, hapeko pwahanou ata Mose, ara akandrihisaniy pwi, pwen paratapeh pe ndrina wawu ilokuh sato para usopwoyani ndramat hamou iya hiyan, iro mwonen lang Sapat?”
24 Wawu mbuna kanimnim kiya melit para ngawan pe akaranonoye, hapeko akaranonoye kimwonen o.
Yesu yiy Kristus, ndre?
25 Pwen yihu ndramat hayah para Yerusalem, ara husok hupa, “Iye ara ndramat mepo hu pakanohonou para hu pakatingundrun ara, ndre?
26 Akanimei, yiy iripo wong iya mbulmarahu ndramat, pe hamou kinwong sahin nongan kinna kili yiy pwi. Pe hu ndramat huhohin, ara hu kanpahasaniy tehe yiy, ara Messayah, ndre pwi?
27 Hapeko worou tupahasani ndramat aro para aleheh, pe kapa Kristus kisa, pwen andre hamou kinpahasani yiy iyau aleheh, ara pwi.”
28 Pwen Yesu iro hinuwani hu ndramat manau pe iwayeh namandran iro kowa yumwa totohun namandran ipa, “Ehe! Wawu pahasani yo, pe wawu pahasaniy yo para aleheh. Pe kunsa iye kinna lohongo mbukeno, ara pwi, hapeko yiy mepo ipwandrisa yo, ara yiy ndrokonan, pe wawu kowu tan.
29 Hapeko yo, ara upahasani yiy, paratesah, yo uyau kili yiy, pe yiy ipwandrisa yo.”
30 Huhilingi nongan aro, pe hu nohonou para kambultuwe tahatini yiy, hapeko lengen ara mapu kinsa, pwen ndramat hamou kinmbultuwe tahatini yiy pwi.
31 Hapeko hu ndramat soyon iya huro mwalingahu ndramat soyo-soyon ara, ara huiki lohongahu ndrisiyon iya kili yiy. Pe hupa, “Kapa Messayah kisa, andre kimbusi hu ndraikiya kaipisa pwoke soyon kiramwaitini ndramat aro ngara kimbusiy, ndre pwi?”
32 Pe hu Parisiy, ara huhulong hu ndramat soyo-soyon ara huro panguluwani hu nongan aro iya kili yiy. Pwen hu pris huhohin ta hu pris masih, pe hu Parisiy, hu pwandrisa hu ndramat para memerani yumwa totohun namandran para hukaya mbultuwe tahatini yiy.
33 Pwen Yesu ipa, “Lenge para kuro sura wawu, ara mulai o, andre kuro sura wawu, pwen andre kumui kuya kili yiy mepo ipwandrisa yo.
34 Pe andre akaten yo, hapeko andre akankahi yo pwi, pe hape aleheh nakuro aliy, ara akanlahiy para akasa aliy pwi yi.”
35 Pwen hu pohon para Yutah huro wong iya kili hamou-hamou tahu huro pa, “Ndramat aro nakiya aleheh mepo tukanlahiy para tukankahi yiy pwi? Pe yiy andre kiya kili ndramirarou hu mepo hu masumbuwe hu tora kene kili hu ndramira Krik, ndre? Pwen andre kihinuwani hu ndramira Krik.
36 Pwen hupa, mbulndroiyi nongnan mepo ipwai ara, ara ipa tesah ndrokonan, mepo ipa, ‘Andre akaten yo, hapeko andre akankahi yo pwi, pe hape aleheh nakuro aliy, ara akanlahiy para akasa aliy pwi.’ ”
37 Pwen iro mwonen lang mepo Yon nakiyahapwen kiya aliy, Yesu itine pe iwong namandran iya ipa, “Kapa ndramat hamou koyun kisapak, pwen kisa kili yo, pe andre kuhang yiy hapesah para kiyin.
38 Pwen kapa ndramat hamou kipwotisingi lohongan kisa kili yo, pe tehe Nongan Haiyan kinpwai, tehe andre ndran para taleh kirah kiyau kili yiy.”
39 Pe ndroiyi nongnan, ara ipwai iyata Mwoiwan Haiyan, tehe hu mepo hupwotisingi lohongahu iya kili yiy, andre kamulan hukawiri Mwoiwan Haiyan. Pe iro matnen ara isa, ara Mwoiwan Haiyan kinsa mapu, paratesah, Ngindrai kinhari ngala Yesu mapu.
40 Pe iro mwonen huhulingi hu nongnan aro, pwen hayah tahu hupa, “Ndramat iye, ara yiy Poropet.”
41 Pe hayah tahu hupa, “Yiy ara Messayah.” Pe hayah husok hupa, “Messayah andre kiyau Kaliliyy tapeh?
42 Pe Nongan Haiyan kinpwai pwen tehe Messayah andre kiyau ndraye Tepit, pe kiyau Petlehem, kol ngawan mepo Tepit ngara kiro aliy, ndre pwi?”
43 Pe tunan Yesu kopu, pwen hu ndramat ara, ara hu masilpat.
44 Pe hayah tahu hu pakambultuwe tahatini yiy, hapeko hamou tahu kinmbultuwe yiy pwi.
Hu Pohon tahu Yutah hu kanpwotisingi lohongahu pwi
45 Pwen hu makundrayen para memerani yumwa totohun namandran, ara humui huya kili hu pris huhohin ta hu pris masih, pe hu Parisiy. Pwen hu pris pe hu Parisiy ara husok hu, hupa, “Paratapeh pe wawu mbultuwe tahatini yiy kinsa pwi?”
46 Hu ndramat para memerani yumwa totohun namandran hupa, “Hamou kinho wong tehe ndramat iye iripo wong, ara pwi.”
47 Pwen hu Parisiy hupa, “Wawu torapa yiy ipakarawani wawu yi?”
48 Pe hamou ta hu ndramat ihohin, ndre hamou ta hu Parisiy, ara yihu pwotisingi lohongahu iya kili yiy, ndre pwi?
49 Hu ndramat mepo hu kanpahas kinna nongan para pwahanou pwi, ara Ngindrai kiniten anna hu.
50 Pe Nikotemus ara mamu iya nime Yesu, pe yiy hamou tahu yi, yiy isok ipa,
51 “Nongan para pwahanou torou ipa hiyan para tukaiki hamou kiya nongan, ndre tukahilingi yiy kiwong namu na, pwen andre tukapahas kiya sehe melit imbusiy, ndre pwi?”
52 Pwen husomwiy hupa, “Wou para Kaliliyy i, ndre? Anime nongan hiyan, tehe poropet hamou, ara andre kinyau Kaliliyy pwi.”
53 Pwen hu ndramat masih hamou-hamou humui huya suwe hu.