16
Nongan pwandritiye ta ndramat iro nimnim iya pohomara mbulen, pe isalpwarani hu melit
1 Yesu itiyani nongan pwandritiye iya kili ndramiran hu, ipa, “Ndramat hamou namandran mamenmenan soyo-soyon iya, ara iyki ndramat hamou iro mu para kiro ponokulani hu menmenan. Pe hu ndramat hayah husa kili namandran ara, pe hurasusut nongan iya kili yiy, tehe ndramat iro mu ara, ara kinsalpwarani hu menmenan.
2 Pwen pe namandran ara iyoh yiy iya nondriyan pe isok yiy, ipa, ‘Wou apo tesah, mepo uhulong titiye tam? Wou aro mu iya pohombulen, pe atiyaniy kisa kili yo na; aro ngaplaniy tapeh? Paratesah, wou ara anlahiy para aye ndron pohombulen iye pwi.’
3 Pwen ndramat iro mu iya pohombulen ara, ara ipwai iya kili yiy mbukenan, ipa, ‘Yo mahapo andre kupo tesah ara? Namandran to nakiwiri mbulyo kiya mawen kili yo. Yo ara pwokeyo pwi para kutalon pwan, pe umasi para kuro rasosoying i.
4 Yo ara upahasani sehe lohongai para kumbusiy mahapo, pwen andre hu ndramat karawulohani yo kuya nondriya suwe hu, kiro mwonen lang mepo namandran to kiwiri yo kuya mawen mbulyo.’
5 Pwen pe iyoh hu mepo nahanah ata namandran tan iro kili hu, ara husa kili yiy. Pe isok yiy isa mu tahu ara, ipa, ‘Wou nahanah tam ita kili namandran to, ara masahayeh?’
6 Pe yiy isa mu ara, ipa, ‘Nopwaran para nahanah to, ara tehe ndraikei holip iho kohoyongan masangat.’
Pwen ndramat iro mu iya pohombulen ara, ipa, ‘Ahaleh pe ayampwan, pe awiri pepa mepo hu kanratuluwi nongan para nahanah tam ita aliy, pe aratuluwi nahanah tam kiya mayimingui opu.’
7 Pwen isok yiy mepo iho ndruwan ara, ipa, ‘Wou, nahanah tam masahayeh?’ Pe ipa, ‘Nopwaran para nahanah to, ara tehe wit mandropwa sangat.’
Pe ipwai iya kili yiy, ipa, ‘Ahaleh pe ayampwan, pe awiri pepa mepo hu kanratuluwi nongan para nahanah tam ita aliy, pe aratuluwi nahanah tam kiya mandrolngui opu.’
8 Pe iyamulan, namandran tan iya yirowe sehe melit kintayah ara, pwen isomwani ndramat mwomwan para pohombulen ara, paratesah, yiy imbusi kultuw ara tehe ndramat lohongan ileu. Akanimei, yihu ndramat para kol pwan, ara lohongahu ileu iya kultuw handra-handra, para hu kasusuye kiya kili hu hasap para mahapo. Pe huramwaitini hu mepo ngara hu koro ndruwa kultuwayi kolo King Ngindrai.
9 Yo upwai isa kili wawu, akataingani hu sombule pat pe hu melit handra-handra pwassin para kol pwan, para akapo kowase wawu hu kayau aliy. Pwen kapa hu melit pwassin ara kene hu kahapwen, andre Ngindrai kirawulohani wawu koro nondriya hu seu mepo andre kinto-kinto.
10 Kapa hiyeh maran kiwayis para kiponokulani hu melit mendreheh, ara andre maran kiwayis para kiponokulani hu melit namandran i. Pe hiyeh ngara kimbusi kultuw kinmwonen pwi kiya hu melit mendreheh, ara andre kimbusiy tehen aliy o kiya hu melit namandran i.
11 Pwen pe kapa mara wawu kinwayis para akaponokulani hu melit pwassin para kol pwan pwi, pwen hiyeh andre kipa ndre mara wawu kiwayis para akaponokulani hu memelit ndrokonan.
12 Pe kapa mara wawu kinwayis para akaponokulani menmena hamou pwi, pwen hiyeh andre kiyki melit kisata wawu para akarayah mbukenan?
13 Kinlahi ndramat hamou para poya mbulen kiro pahandra hilu namandran malmou, ara pwi. Yiy andre kihimwisnani hamou pe kinamili hamou, ndre andre welen kiso kiyata hamou pe welen kimai kiyata hamou. Wawu kanlahiy para karayah pwandrendres ta Ngindrai, pe pwandrendres para menmena kol pwan kene, ara pwi.”
Yesu iwong iya nongan para pwahanou pe iya nongan para kolo King Ngindrai
14 Pe yihu Parisiy mepo hu ngara kanamili singayai, ara huhilingi hu nongan masih aro kene, pe hu patumbuye Yesu.
15 Pwen Yesu ipwai iya kili hu, ipa, “Wawu ndramat ariya ko mepo wawu pakasomwani wawu koro mbulmara hu ndramat, hapeko Ngindrai ara tanan ndriya wawu pwen. Tesah mepo haiyan iya mbulmara hu ndramat, ara melit mwomwan masih iya mbulmara Ngindrai.
Hu Susura Hinonou ta Yesu
16 Nongan para pwahanou pe nongan tahu Poropet ara huro pohowei, ipoo isa matne lenge Yohanes. Hapeko iro mwonen lenge Yohanes isa, nongan hiyan para kolo King Ngindrai, ara huro pohowei iya kol masih. Pe hu ndramat masih hurasisinge hu para hu kaya nondriyan.
17 Kol pwan pe yang, ara iya waison para kimun o mwaihei, hapeko kinlahiy para nongan para pwahanou sahin ata Ngindrai kitan, ara pwi.
18 Pe kapa ndramat hamou kitali nambuyun, pe kiyesou kiya kili pihin hamou paiwe, ara ipo pilah. Pe kapa ndramat kiyesou kiya kili pihin mepo kintali nambuyun, ara ipo pilah.
Titiye ata ndramat menmenan soyon pe Lasarus
19 Ndramat hamou iyen, mamenmenan soyon, pe ngara kisuluye yiy kiya hu ndrohan anandritan pe koyau lahayan iya, pe lang masih ngara kimpwan ndrita hu melit mwayih pe lahayan handra-handra.
20 Pe ndramat hamou ngalan Lasarus ngara kiyempwan pohomara karam namandran ta ndramat menmenan soyon ara, pe ngara kiro rakamam. Mandrakuyun masih ara neken iniy topwei.
21 Pe Lasarus ndriyan ngara kingah para kiyan hu konkonu anandrinai mepo ngara kilon kiro keyau ata ndramat mepo menmenan soyon ara. Hapeko hu mwiy, ngara hu koro ndramani hu neken tan.
22 Pwen irahihini lenge Lasarus, ndramat para rakamam ara, imat. Pe hu angelou husap yiy iya pe imi ndrahasa Apraham. Pe ndramat menmenan soyon iya ara, ara imat i, pe huroni yiy.
23 Pe iya pe iro kolo hu ndramat kanmat pe iro nondriya ngandran namandran. Pwen maran itandras iya paingan pe inime Apraham iro mwanan iya, iyasura Lasarus iro ndrahasan.
24 Pwen pe iyoh iya kili Apraham, ipa, ‘Tomo Apraham, koyum kisikirani yo, pe apwandrisa Lasarus pe kiyki ndrakopweniman kiya ndran, pe kisa kalame pe kimbusiy kiwou. Paratesah, mwan urupo aliy iye, ara iripo iyki ngandran namandran iya, isa kili yo.’
25 Hapeko Apraham ipwai iya kili yiy, ipa, ‘Noru, alohongani mipwan tam kinna, ma aro ndron mwalen, ara awiri hu melit tam hiyan opu; hapeko Lasarus, ara iwiri hu melit tan mwomwan opu. Hapeko mahapo, yiy ara iripo mwoimwoi iye, pe wou ata nondriya ngandran namandran.
26 Pe melit handra yi, ara toro: mwalinga yowu pe wawu, ara Ngindrai kiniyki ngat sih mbulun pwi ita pwen. Pwen pe kinlahiy para ndramat hamou kiro iye pe kihis ndrokomatne ngat iye kiya haroh kili wawu, ara pwi; pe kinlahiy para hamou kisingondritiy kiro ara pe kisa kili yowu, ara pwi yi.’
27 Pwen ndramat menmenan soyon ara isomwiy, ipa, ‘Tomo Apraham, urakamam satam, apwandrisa Lasarus kiya suwe tomo,
28 paratesah, yo ma nali hu mayimou. Pwen hiyan para kiya pe kipwandrandrahani hu. Matisan yihu yi kasa kol aripo, mepo ngandran namandran iya iripo aliy.’
29 Pwen pe Apraham ipwai paiwe iya kili yiy, ipa, ‘Nongan ata Mose iyasura hu Poropet, ara ita sura nalim hu. Hu koroiki ndrainga hu kaliy.’
30 Hapeko ipa, ‘Pwi! Tomo Apraham; kapa ndramat hamou kitine kimat pe kiya kili hu, pwen andre hu karapwaiwani ndriyahu.’
31 Hapeko Apraham ipwai iya kili yiy, ipa, ‘Kapa yihu kanhilingi nongna Mose pe hu Poropet pwi, pwen andre hu kanlahiy para hu kapwotisingi lohongahu pwi, konan kapa ndramat hamou kimat pe kisa tine.’ ”