3
Yohanes Ndramat Para Paptais imwaniyani saya Yesu
1 Pe iho nondriya hu lang ara, Yohanes Ndramat Para Paptais isarayah, pe iro pohowe nongan iya kili hu ndramat iro nondriya kol ndrohoyin para kol namandran hape Yutiya.
2 Pe yiy iro pwai ipa, “Akarapaiwani ndriya wawu, paratesah, kolo king mepo andre Ngindrai kiro mu kiya aliy para kol paingan yang ara kinsa pakeh.”
3 Pe Yohanes iye ara yiy mepo poropet Yisayah kinwong pwen kinna tan toro:
“Ngasa mbulukoyu hamou ita yoh iyau kol ndrohoyin ita pa,
‘Karamwaniyani saya Yapan,
pe kasani meresayan kiro mwonen.’ ”
4 Pe koyau ta Yohanes, ara husoruwei iyau yomu kamel, pe kondrei irakayani kundrayin, ara humangsaniy iyau kapilo mbulmwakau. Pe anandrinan ara hu kaspou pe kunan para yangiy.
5 Pe hu ndramat huya kili yiy ara huyau Yerusalem pe Yutiya masih, pe hu kol masih mendreheh para pakeh ndran Yortan.
6 Pe huya pohopoh iya hu pakut mwomwan tahu iya ngawan, pwen isumuluwani hu iya Ndran Yortan.
7 Hapeko iro mwonen inime hu ndramira Parisiy pe hu Satyusiy soyon husa hape aleheh mepo iro sumuluwani hu ndramat iro aliy, pwen ipwai iya kili hu, ipa, “Wawu ndraye hu mwat mapairahu! Hiyeh kinpomwanye kinsa kili wawu, pe andre akawop kaya mawen ndrinalokuh ta Yapan mepo itapo isa?
8 Pe akantapaiwani ndriya wawu ndrokonan, pwen kultuwaye wawu kipwaingani kaipisa wawu tehen aliy i.
9 Pe wawu mbuna akahaterena wawu pe akapa, ‘Apraham ara tumbu yowu.’ Yo upwai isa kili wawu tehe, iyau kili hu pat aripo, Ngindrai ilahiy para kimbusi hu karayah hu tumbu Apraham.
10 Pe semen kapereu, ara kinna pwen ita ndroiyi kei, pe hu kei masih mepo hu konhoppwai hiyan pwi, ara andre katihihu kaya pwan pe kapiyani hu kaya nondriya mwan.
11 Pe yo ara urupo sumuluwani wawu iya ndran, pe ipwainganiy tehe wawu kantapaiwani ndriya wawu. Hapeko ndramat yiy mepo nakisa kamulan, ara pwoke tan pwokeyan pe iho hin kili yo. Pe hatna pwelekan, ara kunlahiy para kutaliy pwi. Yiy andre kisumuluwani wawu kiya Mwoiwan Haiyan pe kiya mwan.
12 Pe yiy iya ndrohona ponokuleya wit, pe imbultuwe suweleya pwan tan ita niman, para kisuwali pwisi wit kiya mawen, pe andre kimbultani sangi wit tan kiya nondriya kaisowan. Hapeko pwisi wit, ara andre kitimwiy kiya mwan mepo kinoho mat pwi masih.”
Yohanes isumuluwani Yesu
13 Pwen Yesu iyau Kaliliy pe iya Ndran Yortan para Yohanes kisumuluwani yiy.
14 Hapeko Yohanes, ara pakipa pwi kiyatan, pe ipa, “Hiyan para wou asumuluwani yo, paratapeh pe wou apasa kili yo?”
15 Hapeko Yesu isomwi yiy, ipa; “Kirayah mahapo toro; Paratesah, imwonen masih para hu kultuw imwonen masih, ara andre karayah manan.” Pwen Yohanes iho ndruwa nongna Yesu.
16 Pe kinsumuluwani Yesu kinna ndran, pwen isa paingan, pe hape pwi ko, kol paingan yang, ara ite, pe inime Mwoiwa Ngindrai isa pwan mwensen tehe nombuwe pai hamou, pe iya ndrita Yesu.
17 Pe ngasa mbulukoyu hamou iyau kol paingan yang isa, ipa, “Aro, ara Noru mepo ndriyo imbuluhi yiy. Ndriyo ipwes iyatan namandran iya.”