6
Pakut mwomwan iyki kimat pe Kristus iyki taleh
1 Pwen andre tukapa tesah ara? Tukoro mbusi pakut mwomwan manau, pwen pahas ta Ngindrai andre kimandra, ndre?
2 Konan! Worou ara yihu mepo worou kanmat kinna pakut mwomwan; pwen pakut mwomwan andre kimbusi rou koro mwalen tapeh?
3 Ndre tukowu tehe worou masih mepo kanwiri paptais iya kili Kristus Yesu ara tuwiri paptais iya kimat tan, ndre pwi?
4 Pwen tuwiri paptais, ara tehe turoni tou pe tumat iyapolo Kristus, pwen tehe Kristus ara itine kimat iya nonowa pwoke ta Tamarou, pwen worou i, ara andre tukoro mwalen kiya taleh handra howen.
5 Paratesah, kapa worou kapai kiyasura yiy kiya kimat tan, ara andre worou kapai kiyasura yiy pe katine kimat tehe yiy i.
6 Paratesah, tupahasaniy tehe kultuw saken torou, ara kantapaingiy kinna sura Yesu iho kei tondrih, pe pwoke para pakut mwomwan, ara andre kiya mwaihei opu. Pwen pe andre worou kantayah pwandrendres para pakut mwomwan pwi—
7 paratesah, ndramat mepo kinmat ara pakut mwomwan kinto kili yiy pwi.
8 Pwen kapa tukamat kiyapolo Kristus, ara tupwotisingi lohongarou tehe andre tukoro mwalen sura yiy i.
9 Paratesah, tupahasaniy tehe Kristus kintine kimat, pwen andre kinimat paiwe pwi. Pwoke para kimat andre kintamwaitini yiy pwi.
10 Pe kimat mepo imat iya aliy, ara imat porosih o iya pakut mwomwan, hapeko taleh iro mwalen iya aliy, ara iro mwalen iyata Ngindrai.
11 Pwen wawu koro ndruwa sai ara ko yi, wawu kamat kiya pakut mwomwan, pe akapai kiya kili Kristus Yesu, pe akoro mwalen kiyapolo Ngindrai.
12 Pe tehen tora ko, wawu mbuna koro pahandra pwoke para pakut mwomwan, pe akoho ndruwa hu kultuw pwassin para nombuwe wawu.
13 Pe wawu mbuna kaiki nombuwe wawu hakai-hakai para kimbusi pakut mwomwan, tehe melit handra para mangseya mbulen para kultuw pwassin, hapeko wawu kaiki nombuwe wawu tehe yukyuk kiya kili Ngindrai, tehe yihu mepo humat pe husa tine paiwe. Pwen wawu kaiki nombuwe wawu hakai-hakai kiya kili Ngindrai tehe melit handra para mangseya mbulen para kultuw imwonen.
14 Paratesah, pakut mwomwan mbuna kirayah namandran ta wawu, paratesah, wawu konto pahandra pwoke para nongan para pwahanou pwi, hapeko pahandra pwoke para pahas ta Ngindrai.
Tukarayah hu ndramat para pwandrendres para kultuw imwonen
15 Pwen andre tukapa tesah ara? Worou kambusi pakut mwomwan, paratesah, tukonto pahandra nongan para pwahanou pwi, hapeko tutopo pahandra pahas ta Ngindrai, ndre? Ara tehen tora pwi!
16 Akanpahasaniy pwi, tehe kiro mwonen wawu kaiki wawu tehe yukyuk kiya kili ndramat hamou pe wawu kahalingi yiy tehe hu ndramat para pwandrendres tan, ara wawu rayah hu ndramat para pwandrendres ta ndramat mepo wawu hilingi yiy ara—pe konan wawu karayah pwandrendres para pakut mwomwan mepo andre kiluwani wawu kaya kimat, ndre akahalingi nongan, pwen andre kiluwani wawu akaya kultuw imwonen.
17 Pe konan wawuro tehe hu ndramat para pwandrendres para pakut mwomwan, hapeko wawu karawuloh kiya kili Ngindrai, tehe wawuiki ndriya wawu masih pe wawuho ndruwa hinonou mepo wawu kanwiriy.
18 Wawu ara kantali pwoke para pakut mwomwan, pe wawu kansarayah hu ndramat para pwandrendres para kultuw imwonen.
19 Yo urupo wong iya tesah ngara wawu kambusi lang masih, paratesah, wawu tora kose manau iya tesah urupo wong iya aliy. Pwen tehe wawu ngara kaiki nombuwe wawu hakai-hakai tehe yukyuk para kiya pwandrendres para kultuw mwomwan, pe kimbusi pakut pwassin kimandra, pwen pe mahapo, ara wawu kaiki wawu tehe yukyuk pe akoro pahandra pwandrendres para kultuw imwonen mepo andre kiluwani wawu kiya kultuw haiyan.
20 Tandrohonga wawuro tehe hu ndramat para pwandrendres para pakut mwomwan, ara wawu konto pahandra pwoke para kultuw imwonen pwi.
21 Pe tesah hiyan wawu wiriy iro mwonen lang ara iyau hu melit mepo mahapo wawu kanwiri masirai para aliy? Paratesah, kiyamulan para hu melit ara, ara kimat o!
22 Hapeko mahapo ara wawu konto pahandra pwoke para pakut mwomwan pwi, pe wawu kantayah hu ndramat para pwandrendres ta Ngindrai. Pe melit hiyan para aliy andre akawiriy, ara andre kiluwani wawu kiya kultuw haiyan, pe kiyamulan andre wawu kawiri taleh mepo andre kinto-kinto.
23 Paratesah, kene pakut mwomwan, ara kimat, hapeko yukyuk ata Ngindrai ara taleh iyau kili Kristus Yesu Yapan torou.