12
Pihin pe mwat laman namandran
1 Pe kaipisa melit handra masih namandran isarayah iho kol paingan yang: pihin hamou isuluye yiy iyapolo mwandrai, pe iyapolo walah iro pahandra pwelekan, pe kasapai sih ta king iro payan, ara piriy songui pe luwoh huro aliy.
2 Pe pihin ara mapundriyan, pe irang namandran iya iro mwonen ihingotou para nakimwalahiy.
3 Pe kaipisa hapesah i isarayah iho kol paingan yang: mwat laman namandran, pe payan ara manandrtoyoh, pe ndrosuwan ara masongui. Pe ndrita hu payan manandrtoyoh, ara hu kasapai ta king manandrtoyoh huro aliy.
4 Pe ndrakuwin ilokomuri hu piriy hasai nondriya matisai husa mawen yang pe hulon husa pwan kol pwan. Pe mwat laman namandran ara, ara iro tine mbulmara pihin mepo nakimwalahiy ara, para kindrimi norun kiro mwonen kimwalahiy.
5 Pe pihin ara imwalahiy iya ta norun hamou, pe yiy kamai. Pwen hulohi noru pihin ara iya paingan ndrohonoku pwanpwan ta king tan, iya ndrohonoku pwanpwan ta king Ngindrai. Pe mbunah kamai ara andre kirayah king, pe kimu kiyata hu ndraye ndramat masih para kol pwan, pe kipwokerehu masih kiya nes hayen.
6 Pe pihin ara, ara iwop iya kol ndrohoyin iya kol hakol mepo Ngindrai kinmwaniyani iro mwoimwoi para kiya kiro aliy. Pe andre kiro pahandra pwokere kiro kol ara nondriya hu lang sopou, lungat, pe annongui (1,260).
7 Pwen pahun irayah iro kol paingan yang. Angelou Mikayel iyasura hu angelou tan hupo pahun iya kili mwat laman namandran ara, pe mwat laman namandran iyasura hu angelou tan, ara hupo pahun imui.
8 Hapeko mwat laman namandran ara, ara pwokeyan pwi, pwen ndrohonokuhu para kol paingan yang, ara hutaliy.
9 Pwen hu angelou husoyau iya ta mwat laman namandran ara, iya pwan—mwat para ndrukoluw mepo hupohowe yiy payit pe Sinai, yiy mepo ipakarawani hu ndramat para kol pwan masih para hu kayos kaya pakut mwomwan. Pe husoyau iya tan iyapolo hu angelou tan huya pwan kol pwan.
10 Pwen uhilingi yoholai sahin namandran iyau kol paingan yang ipa,
“Mahapo ara sopwat ta Ngindrai pe pwoke pe kolo king mepo Ngindrai itamu iyata ndramiran hu hutora aliy ara kinsa,
pe pwoke nopwaran ta Kristus tan.
Paratesah, Sinai mepo kisuhuhuri nali tou hu,
yiy mepo isuhuhuri hu iro mbulmara Ngindrai lang pe ping,
ara kansoyau kinna tan kinna pwan.
11 Pe hu ndramira Yapan hu kantamwaitini Sinai,
iya pwoke para ndreye Noru Sipsip,
pe iya nongan para titiye tahu;
nerehu kinna mwoiwa hu
para hu kamat, ara pwi.
12 Pwen tehen tora ko wawu tora kol paingan yang, ara akapwes,
pe wawu mepo tora aliy!
Hapeko toimwa hu para kol pwan pe ndras,
paratesah, sinai kinsa pwan kili wawu!
Pe ndrinan kinlokuh namandran iya,
paratesah, ipahasaniy tehe lengen, ara mulai o.”
13 Pe iro mwonen mwat laman namandran ara inimei tehe kansoyau kinna tan kinna kol pwan, pwen iro marani pihin mepo kinmwalahiy kinna ata mbunah kamai.
14 Pe pihin ara, ara Ngindrai kiniyki kapene manuwai hamou namandran malpai kinna kili yiy, pwen pe andre kiwoh kiya kol mepo kinmwoimwoi pwen atan ita nondriya kol ndrohoyin. Pe andre kiro pahandra pwokere nondriya hayou royoh pe sahin, para kiro mawen kili mwat.
15 Pwen mwat laman namandran ara imwali ndran tehe non iyau pohon para kisumuluwani pihin ara pe kimat.
16 Hapeko kol pwan isopwat pihin ara, pwen pe pwan iramburing pe ite pe imwiy ndran mepo mwat laman namandran imwaliy iyau pohon.
17 Pe mwat laman namandran ara, ara indrangis ta pihin ara. Pwen iya pe pakipopahun kiya polo norun hu—mepo hupwotisingi hu nongan para pwahanou ta Ngindrai, pe hupwotisingi titiye ta Yesu.