20
Sinai iro nondriya kou hayou sopou
1 Pwen unime angelou hamou iyau kol paingan yang isa pwan, pe imbultuwe ki iro niman para Ngat Namandran Mbulun Pwi, pe imbultuwe wasiu hayen namandran hamou iro niman.
2 Pe angelou ara imbultuwe tahatini mwat laman namandran ara—mwat para koluw mepo yiy payit pe Sinai. Pe angelou iwasi tiriyi yiy para kiro tora hayou masopou.
3 Pe angelou ara ipiyani yiy iya Ngat Mbulun Pwi, pe iwari papai tan tisingiy, para mbuna kipakarawani hu kol namandran masih kipoo hayou masopou kihipwen. Kiyamulan para aliy, andre katali yiy kisa ngawan, hapeko andre kinto ndrangan niwen pwi.
4 Pwen unime hu ndrohonoku pwanpwan ta king huro kol paingan yang, pe hu mepo huro mipwan aliy, ara Ngindrai kiniyki pwoke nopwaran iya kili hu para hu katamwanye. Pe unime hu mwoiwa hu mepo husondriti koyuhu, paratesah, iya titiye ta hu iya ta Yesu, pe paratesah i, iya nongna Ngindrai. Pe hu kantotohun kinna kili kan puyap ndre kerewek tan pwi, pe hu kanwiri kiniman kiro hu nimahu ndre hu kombuye hu pwi. Pe hu ara, ara husa mwalen pe huro king iyapolo Kristus hayou masopou.
5 (Pe hu ndramat masih mepo hu kanmat, ara hu kansatine kimat pwi, ipoo hayou masopou ara ihipwen.) Pe iye ara lang imu mepo Ngindrai ihingini hu ndramat hutine kimat.
6 Lomwes pe haiyan iya kili hu mepo husa tine kimat ihomu. Pe pwoke para kimat lusap, ara andre hu kanna nondriyan pwi, hapeko yihu andre koro hu pris ta Ngindrai pe ta Kristus, pe andre hu koro king pe koro mu kiyapolo yiy hayou masopou.
Sinai iwiri koran
7 Pwen kiro mwonen hayou masopou kihipwen, ara andre katali Sinai kiro nondriya kou tan kisa ngawan,
8 pe andre kiya pe kipakarawani hu kol namandran masih para hu mbusungo kol pwan mahaasai—kol Kok pe Makok—para hu kambultere hu kiya harong para hu kapopahun. Pe ndromwoya hu ara irayah tehe kalayeng para poholeng.
9 Pe hunon huyau mbusungo kol pwan masih, pe hu rakayani ndrohonoku ngohongoh ta hu ndramira Ngindrai, kol namandran mepo Ngindrai inamiliy. Hapeko mwan iyau kol paingan yang isa pwan pe itimwi hu.
10 Pe payit mepo ipakarawani hu, ara Ngindrai ipiyaniy yiy iya nondriya ngat mepo mwan sakai iro yat aliy, hape aleheh mepo kan puyap pe poropet pwasoyou mepo kinpiyani hilu mamu hiltora aliy. Pe yihu andre kakuni nopwaran lang pe ping pe ngandran ara andre kinto pe kinto.
Hu ndramat humat andre karo tine nongan para tamwanye
11 Pwen unime Ngindrai irompwan ndrohonoku pwanpwan ta king sih namandran pe pallen. Pe kol pwan pe yang ara hiltan iya mawen mbulmaran, pe noku hilu para koro aliy, ara pwi.
12 Pe unime hu ndramat kanmat, yihu ndramat mangalahu pe ngalahu pwi, ara huro tine mbulmara ndrohonoku pwanpwan ta king, pe hu puk ara huro te. Pe puk sih i, ara puk para taleh, pe iro te. Pe hu ndramat humat, ara huro tine nongan iya tesah humbusiy mepo kantatuluwiy iro nondriya hu puk ara.
13 Pwen ndras itali hu mepo humat huro aliy, ara huro tine nongan, pe kimat pe Ndrohonoku Kimat ara kintali hu mepo humat para hu koro tine nongan, pe ndramat hamou-hamou kinwiri koran pwen iya tesah kinmbusiy.
14 Pwen kimat pe Ndrohonoku Kimat, ara ipiyani hilu hilya nondriya yep mwan ita aliy. Pe yep mwan ita aliy ara, ara kimat lusap.
15 Pwen kapa hamou kankahi ngalan kantatuluwiy kinto nondriya puk para taleh pwi, ara hu angelou ta Ngindrai kanpiyani hu kanna nondriya yep mwan ita aliy.