3
Nongan iya sios para Sartis
1 “Hu nongan iya kili angelou para sios para kol ngawan Sartis ara ratuluwiy toro:
Nongan iye iyau kili yiy mepo Mwoiwa Ngindrai manandrtimou pe hu piriy manandrtoyoh ita kili yiy.
Upahasani hu kultuwayim, para hu ngara kapa ata mwalen, hapeko pwi, anmat pwen.
2 Akoro hinehes! Pe akapwokeyani tesah mepo ita ndron pe pakeh nakimat. Paratesah, kunkahi hu kultuwayim imwonen iya mbulmara Ngindrai to, ara pwi.
3 Alohongani tesah anwiriy pe anhilingiy; atokuyaniy, pe arapaiwani ndriyam. Hapeko kapa anto hinehes pwi, ara andre kusa tehe ndramat para pahana, pe andre anpahasani sehe lang nakusa kili wou, ara pwi.
4 Hapeko hu ndramat hayah hutora Sartis, ara koiwehu ara kas, aliy pwi. Pwen andre hu karikai kisa sura yo, pe andre kasuluye hu kiya koyau pallen, paratesah, hu haiyani tokuyahu.
5 Yiy mepo kiramwaitini pahun tehe hu, ara andre kasuluye yiy kiya koyau pallen. Yo andre kuntapiyani ngalan kinna mawen puk para taleh, ara pwi. Hapeko andre kuhari ngalan kiro mbulmara Tomo pe hu angelou tan.
6 Pwen yiy mepo mandraingan, ara kihilingi tesah Mwoiwan Haiyan iripo pwai iya kili hu sios.”
Nongan iya sios para Pilatelpiya
7 “Hu nongan iya kili angelou para sios para kol ngawan Pilatelpiya ara ratuluwiy toro:
Nongan iye iyau kili yiy mepo haiyan pe ndrokonan, ara imbultuwe ki ta Tepit. Pwen kapa kitipe papai, ara kinlahi hamou kiwariy pwi, pe tesah kiwariy, ara hamou kinlahiy para kitipei pwi yi.
8 Upahasani hu kultuwayim. Animei, kuniyki papai kinite ita mbulmaram mepo kinlahi hamou kiwariy pwi. Upahasaniy tehe pwoke tam, ara hape ko, hapeko wou apwotisingi nongno, pe anpa akowu iya ngolo pwi.
9 Pe andre kumbusi hu mepo para yumwa mbultere ta Sinai mepo hupa ndre hu para Yutah, hapeko pwi, hu pwasoyou—ara andre kumbusi hu kasa pe hu katukuruhu kasa pwan ndrikam, pe lohongahu kileu tehe ndriyo imbuluhi wou.
10 Pwen wou apwotisingi nongan para pwahanou to, pe apwokeyani wou imwonen aya nondriya nopwaran. Pwen andre kupwokeyani wou kiro mwonen lenge nopwaran mepo andre kisa pe kiya kene kol pwan masih, mepo para kinohonou hu ndramat topo kol pwan.
11 Yo pakeh andre kusa. Apwotisingi tesah imira kili wou, pwen andre hamou kinwiri kenem pwi.
12 Yiy mepo kiramwaitini pahun, ara andre kumbusi yiy kirayah tehe pahut sih kiro yumwa totohun namandran ata Ngindrai to. Pe andre yiy kintaliy pwi. Pe andre kuratuluwi ngala Ngindrai to pe ngala kol namandran ta Ngindrai to kiro kili yiy, ngala kol Yerusalem howen mepo andre kiyau kol paingan yang kili Ngindrai to pe kisa pwan. Pe andre kuratuluwi ngolo howen kiro kili yiy i.
13 Yiy mepo mandraingan, ara kihilingi tesah Mwoiwan Haiyan iripo pwai iya kili hu sios.”
Nongan iya kili sios para Layotisiya
14 “Hu nongan iya kili angelou para sios para kol ngawan Layotisiya, ara ratuluwiy toro:
Nongan iye iyau kili yiy mepo Ndrokonan, pe lohongan ndrisiyon pe ipwokeyani nongan ndrokonan, yiy mepo imu iya melit masih Ngindrai imangsaniy.
15 Yo upahasani hu kultuwayim, tehe wou ngandrahan ndre wawen pwi. Unamiliy para wou arayah sih tahilu ara.
16 Paratesah, wou ahomwak o—wou ngandrahan ndre wawen pwi— tehen tora ko, nakulomwarani wou asa ngawan poho.
17 Pe apa, ‘Yo mamenmeno soyon, pe menmeno ara soyon iya, pwen kunamili handra melit pwi.’ Hapeko anyirowei tehe ata mwomwan masih, pe aiki koisariy, androisiy, maram iyoh, pe mwayem pwi.
18 Pe upwahanou wou para asou pat kolt kili yo, mepo kantimwiy kinna mwan pe kinna howen. Pwen andre menmenam kiya soyon, pe asou koyau pallen para aro suluye wou kiya aliy. Pwen andre akulani masiram pe mwayem pwi ara. Pe atumwi ndraikei kiya maram, pwen andre aro nimnim.
19 Pe hu mepo ndriyo imbuluhi hu, ara umwaniyanihu pe upomate hu. Pwen apwoke pe arapaiwani ndriyam.
20 Ahalingiy! Yo uta tine papai pe uta ralikiriy. Kapa ndramat hamou kihilingi mbulukoyu pe kitipe papai, pwen andre kusa nondriyan pe kunamnam kiyasura yiy, pe yiy andre kinamnam kisasura yo.
21 Pwen yiy mepo kiramwaitini pahun, ara andre kupa hiyan kiyatan para kimpwan sura yo kiro ndrohonoku pwanpwan to, pwen tehe kunramwaitini pahun pe urupompwan iyapolo Tomo urupo ndrohonoku pwanpwan para king tan.
22 Yiy mepo mandraingan, ara kihilingi tesah Mwoiwan Haiyan iripo pwai iya kili hu sios.”