18
Wurubuarɛ keyɛlɛɛ Babilɔn donɔɔ
1 Kei wɔle nɛ, te ma besewɔ naa Wurubuarɛ kpilale ŋolo te tisi lee adido ɔ ne kɔŋ. Na ɔ dana doŋ te ɔ gyoorobiiri ŋalakeewɔ tɛɛle kei dɔɔ pou.
2 Keŋte ɔ fae yeesa keŋkeŋ nyiaa,
“Babilɔn donɔɔ te yɛlɛɛ!
Babilɔn donɔɔ dinaa keŋ te yɛlɛɛ.
Botɔɔ ta bese ɔbɔnsam na ɔ tewulɛɛ,
na feliŋkumɛɛ na gyebuse kumɛɛ,
na gyebuse nkaraŋkaraŋ pou dekyae.
3 Nawolo nyi ɔ ta mo ɔ kafoŋ nombia
kyaŋee tɛɛle kei dɔɔ balaŋ pou.
Ɔ kafoŋ kei yɛɛ yaa ŋgba soloŋ doŋte
te ɔ moowɔ fa tɛɛle kei dɔɔ balaŋ
te be nyɔɔwɔ dɛɛse nɛ.
Tɛɛle kei dɔɔ gyooneŋ ta gyem tisi ɔ dɔɔ
ke yɛɛ nombia nkaraŋkaraŋ,
ŋgba mena keŋ baala kafoŋtena na gyem tisi
futooli alo dɔɔ nɛ.
Te tɛɛle kei dɔɔ kebudiira burum mɔ
te tɛɛ ɔ futooli keŋ dɔɔ nyiŋ ba wose.”
4 Keŋte me nyii woya ŋaale lee adido bela nyiaa,
“Me balaŋ,
ɛ koro lee Babilɔn donɔɔ dinaa kenaŋ man.
Na ɛmɛɛ mɔ be nyiŋ yɛɛ nombiakumɛɛ
ŋan doo donɔɔ kenaŋ man,
na Wurubuarɛ ke wɔŋ ɛ deŋele
ŋgba mena keŋ waa wɔŋ mena balaŋ benaŋ deŋele nɛ ya.
5 Wurubuarɛ te tɔɔse ɔ nombiakumɛɛ ŋan,
nawolo nyi ŋe ta boo nideli
keŋ nyi ɔ be tale wolee ŋa ya.
6 Nombiakumɛɛ ŋan ɔ ba mo yɛɛ balaŋ nɛ,
ɛ mo ŋe dinɔɔ akpeŋ ala tɔ e kom.
Te soloŋ keŋ ɔ be fa balaŋ be nyɔɔ nɛ,
ɛ mo keŋ ke dana doŋ akpeŋ ala
kela ɔ wui keŋ nɛ fa e waa nyɔɔ.
7 Mena keŋ ɔ be di gyoŋ
te ɔ ba lese ɔ gyoorobiiri wola nɛ,
mena mɔ te ɛ naase e diyem
na ɛ ke yela waa yeyɛɛ nideli.
Nawolo nyi ɔ gyakaa ɔ ne gyɔ ɔ konɔɔ yako nyi,
‘Me yɛɛ ala gyoo e, ma te yɛɛ lialo e ya.
Te mɔɔ gyae maa di walaŋsa mɔ korakora ya.’
8 Lee mena dɔɔ weese dokoloŋ kooŋ man
te kayeyɛɛ dinaa keŋ gyae kekɔŋ ɔ dɔɔ.
Kayeyɛɛ kenaŋ yɛna yeŋ,
na walaŋsa kedi na tanam dinaa.
Kenaŋ wɔle koraŋ na,
baa too e kekpaa.
Nawolo nyi de Gbeŋgyoo Wurubuarɛ ŋon
waa wɔŋ ɔ deŋele nɛ,
ɔ dana doŋ.”
9 Tɛɛle kei dɔɔ gyooneŋ baŋ bɔɔ gyem tisi ɔ dɔɔ yɛɛ kafoŋ nombia na e, te bɔɔ di gyoŋ kamasɛ kpu na e nɛ, akpaa be naa boalaŋ keŋ ne kpa e nɛ nyɔɔse na, baa wii na baa di ɔ walaŋsa nideli.
10 Diyem keŋ gyae kekɔŋ Babilɔn donɔɔ keŋ dɔɔ nɛ, gyae ke yɛɛ gyooneŋ baŋ gyakoloŋ. Mena dɔɔ baa seŋ lemlem wii na baa yako nyiaa,
“Babilɔn donɔɔ laako!
Babilɔn donɔɔ dinaa,
nyaŋ na gyerebi!
Nyaŋ ŋon nafɔ n dana doŋ nɛ,
na debaŋ dokoloŋ kooŋ kei yaa
be taŋ wɔlɛɛ neŋ nɛ?”
11 Tɛɛle kei dɔɔ kebudiira baŋ mɔ baa wii na baa di walaŋsa ɔ dɔɔ. Nawolo nyi ŋolo bɛɛ tekaa lɛɛ ba abɔɔ bela ya.
12 Ŋolo bɛɛ tekaa lɛɛ ba kegyaŋase na abɔɔ ŋan bɔɔ mo kɔba yayam na kɔba wolom na boya kpaakpaa nyiŋan yɛɛ ŋa nɛ ya. Ŋolo bɛɛ tekaa lɛɛ ba akaralɛɛ kpaakpaa nyiŋan, na agoo kanyaŋse na kanyaŋse yayama na abɔɔ ŋan bɔɔ mo tuu kela yɛɛ ŋa nɛ ya. Ŋolo bɛɛ tekaa lɛɛ abɔɔ ŋan bɔɔ mo daase kpookpoo ŋan ŋe dana koya doŋ yae, na abɔɔ ŋan bɔɔ mo nyeela kpookpoo na boya ŋan ŋe dana koya doŋ yɛɛ ŋa nɛ ya.
13 Ŋolo bɛɛ tekaa lɛɛ ba abɔɔ buruburu ŋan ŋe dana ofoŋ te bɛɛ mo saa weenɛɛ, na adudo na oliifi na pɛperɛ na soloŋ na nuŋ na biliŋ na nunkyuese na namense na dɛɛkyɔŋse na ŋe kɔtase, na gbeŋa na baŋ bɔɔ kyaŋ wɔ yoo man nɛ ya.
14 Kebudiira baŋ baa yako nyiaa, “Abɔɔ kpaakpaa ŋan pou n be yase n sia gyae nɛ, ŋe popou ta lee n nyiŋmaa man. Mena keŋ n be nyiŋ n wose, na yele keŋ n be lɛɛ nɛ pou ta yoo kekpaakekpaa.”
15 Nombia ŋan gyae ke kɔŋ Babilɔn donɔɔ keŋ dɔɔ nɛ, gyae ke yɛɛ kebudiira baŋ bɔɔ di kebu donɔɔ kenaŋ man nyiŋ ba wose nɛ gyakoloŋ. Mena dɔɔ baa seŋ lemlem wii, na baa di walaŋsa.
16 Baa wii yako nyiaa,
“O Babilɔn donɔɔ dinaa laako!
O Babilɔn donɔɔ dinaa,
nyaŋ na gyerebi.
Nafɔ n ne kaa akaralɛɛ na abɔɔ yayama
na agoose bo.
Nafɔ kɔba yayam abɔɔ,
na boya kpaakpaa nyiŋan abɔɔ,
na kegyaŋase kpaakpaa nyiŋan
ŋan ne ŋalakee nɛ abɔɔ te n na doo.
17 Mɔna debaŋ dokoloŋ kei man na,
nya abɔɔ ŋan pou te ŋaalaa.”
Kegyiise baŋ bɛɛ kɛɛ agbele dinaana dɔɔ, na baŋ pou bɛɛ kyaa ŋe man, na baŋ pou bɛɛ yɛɛ tom ŋe man, na kebudiira baŋ pou bɛɛ tɛɛ ɛpo dɔɔ di kebu nɛ, baa seŋ lemlem na bɛɛ kɛɛ donɔɔ kenaŋ.
18 Baa seŋ botɔɔ na baa kɛɛ donɔɔ keŋ kekpabii. Be naa ke kɛɛ kpaa keŋ nɛ baa yako nyiaa, “Donɔɔ woŋti kyaa kaalaŋ, keŋ kelii mena donɔɔ dinaa kei.”
19 Baa kyaa ŋgba liala nɛ na baa wii waraŋase man nyiaa,
“O Babilɔn donɔɔ dinaa laako!
O Babilɔn donɔɔ dinaa,
nyaŋ na gyerebi!
Nyaŋ dɔɔ te kebudiira baŋ pou
bɔɔ mo agbele dinaana ta ɛpo dɔɔ di kebu nɛ,
nyiŋa ba wose.
Mɔna debaŋ dokoloŋ kooŋ man na,
nya abɔɔ ŋan n be nyim nɛ pou te ŋaalaa.
20 Ɛmɛɛ baŋ pou ɛ kyaa adido,
na Wurubuarɛ balaŋ na Kristo kpilala,
na Wurubuarɛ akpeŋkpeŋgyɔɔra pou
ɛ yela ke yɛɛ ŋon gyoŋ.
Nawolo nyi Wurubuarɛ te wɔŋ donɔɔ keŋ deŋele
lee diyem keŋ ɔ be naase ŋon nɛ dɔɔ.”
21 Botɔɔ te Wurubuarɛ kpilale Dekpatakpere ŋolo moo boe dinaa dinaa daale, te ɔ fuŋa ke ka do ɛpo man te ɔ yakowɔ nyiaa,
“Nnɛ te baa mo doŋ wɔlɛɛ Babilɔn donɔɔ dinaa keŋ,
te ŋolo na ŋolo be gyae waa tekaa naa ke bela ya.
22 Ŋolo mɔ be gyae waa tekaa nyii adolɛɛ gyɔɔra na nɔɔneŋ kpeera yaa keferee na kaberɛ wolala nkaŋ donɔɔ dinaa kei man bela ya.
Ŋolo be gyae waa tekaa naa tom kamasɛ yɛɛre botɔɔ bela ya.
Mena mɔ te bɔɔ gyae baa tekaa nyii nyi
ŋolo ne naŋ kolo boe dɔɔ bela ya.
23 Te ŋolo na ŋolo be gyae waa tekaa naa
kanea daale keŋmaŋee botɔɔ bela ya.
Ŋolo mɔ be gyae waa nyii alowɔlere nombia
donɔɔ kenaŋ man bela ya.
Nawolo nyi donɔɔ kenaŋ man kebudiira yɛna
balaŋ baŋ be dana yele tɛɛle kei dɔɔ.
Mɔna ke man ŋmeeseŋtena,
te yeli tɛɛle kenaŋ dɔɔ balaŋ pou ta yoo.
24 Babilɔn donɔɔ dinaa kei man
te ba koo Wurubuarɛ akpeŋkpeŋgyɔɔra,
na ɔ balaŋ na balaŋ baŋ pou bɔɔ koo tɛɛle kei dɔɔ nɛ.
Lee mena dɔɔ te Wurubuarɛ ne wɔŋ donɔɔ kenaŋ deŋele nɛ.”