3
Nzryapwxkr Jon Kxawrkxtr
Matiu 3:1-12; Mak 1:1-8; Jon 1:19-28
1 Mzli kc Taebirizs tqngini-ngrde king kxetu r Rom, kzdung kz gavzna x king nzmnclzbzng bade. Kzdq nidr Pcntizs Paelzt nide gavzna ngr Judiz. Kzdq mou Herot Antipas nide king kx aclvele Gzlili. X mzle Herot, Filip, nide king kx aclvele Provins kcng Itiria x Trakonaetis. X kzdq mou Laesanias nide king kc tqaclvele Abilin Provins.
2 Mzli lcde Anas nidr mz Kaefzs nidr Nardr Pris.
Mz yiz kranzpnu-esz'-nrade-nzlvqn (15) kx King Taebirizs aclve-ngrde nrlc, natq Gct vzm mz Jon, mrlx Sxkaraezs, mrkc lzke.
3 Mz nzlxngiti-krbz Jon natq Gct, sc tqvz-ngalepe-ngrde nrlar LueJodzn mz nzryapwx-krbzle mz leplz. Rpibzle kx, “Kx tqrpiamu kx Gct naipqpxbzle alwx ngrmu, natekqtramu nqmq nr drtwrmu x nawrkxtramu.”
4 Krlc atutrle natq Profet Asaea mz nzrpi-krde kx, “Natq kzdq ncblo kx natqde etu mz nzryapwx-krbzle mz leplz lzke. Natq lcde rpibzle kx, ‘Oliqtiamu nabzmu mz nzvz-krm Kxetu Gct. Atubqtibzmu lrpzki kx nangi nyzde na-apule nzoliqtikr leplz lrpzki kx navzkim king.
5 Nabzlwa nayrngilvztio, newz x me yrulrtingr namnzpz'. Me ngaluti ngr lrpzki na-atubqti, x me vzo mz lrpzki nayrngilvztio.
6 Murde leplz amrlx namclr Mevalu kc tqatwzlr-ngrm Gct!’ ”
7 Zbo ngr leplz nzyrkrpxmqng mz Jon mz nzawrkxtr-krdeng nidr. Mz drtwrde kx trmrlzu, sc tqrpipebzle mz kzdung nidr kx, “Nimu kxdrka'-ngrng! Tqpokiamu! ?Neke rpibz bamu nzwrkxtrngr na-ayrbqpxle nimu mz nzayrplapxkr Gct kc navzm?
8 Nzwrkxtrtx-ngrpwz esz'-krde trna-arlapxleu nimu, a' na-aleamu da kx na-aelwapx-ngrde kx tekqtrpeamu nqmq nr drtwrmu kxtrka. X bzkq rpiamu mz drtwrmu kx, ‘Rlapxpekr murde Ebraam ngi melrmqgr. X nigr angidr leplz kx mcpx Gct.’ Murde napi-pnzbo bamu kx nzmu trnavz-nqblqwamuu lrpzki r Gct mz nzarlapx-krde leplz, krlzle nzbatr-krbzle doa neng Ebraam nzvzpx-krmleng mz rlpz lcng, mz nzatutr-krde da kx esalz-ngrbzle bade.
9 Gct apule ncblo kx twzle akes scde x oliqtile nzrlakitiongr nounc x rtctxlz-ngrde mz nyr, murde trnzpapx-ngrdru nradr kxmrlz. Sa tqoliqtile mzli ka nzangc-krde leplz mz nyr ngr nzayrplapxngr, nidr kcng nqmq krdr trtubqu x nzpxtxpx-ngrdr nztekqtr-krdrle.”
10 Zbz leplz kcng nzveabzng mz Jon, nzrpibzlr kx, “?Nike nawaipekr?”
11 Rpibzle kx, “Kxrngisc nzkq kxli nakabzle kzdq mz kx trpnzngr scde nzkq. X kxrnginan dakxnzng narka-ngrde.”
12 Kzdung mrlx kcng tzatakqting takes nzvz-kzpqng mz nzawrkxtrngr nidr. Zbz sc tzrpipebzlr kx, “Kxakrlz! ?E nike nawaikr?”
13 Rpibz Jon kx, “Takes kx otibzmu mz leplz, bzkq myaszlzle narncbr kc tqyrlq gzpman ngr Rom naxpe ncblo kxesz'.”
14 Kzdung ncblo ngr vea nzvea-kzpzng, nzrpibzle kx, “?X nigr x? ?Nike nawaikr?” Rpibzle kx, “Bzkq amwxlramu leplz mz nzrka-krbzlr bamu trau. X bzkq pokiatitramung. A' naesapxngr drtwrmu trau kx nzxpe-ngrmu.”
15 Leplz amrlx tzobqtipxlr nzvz-krm Kxnzmcpx, x kx nzmcpelr kc Jon drtwrdr kc tzaotrpebzlr kx, “Mwx Kxnzmcpx nide kape.”
16 Krlztitrpebz Jon nzaotikr drtwrdr kc, sc tqrpipebzle badr kx, “Awrkxtrx nimu mz lue. A' kzdq la ncblo navzm mz nibrnge, kc tqmyaszlzle ninge. X trtakitrpwc'u nzwztr-ngrbz bade, kxmule-esz' nzryokaepxngr nqvi lr sadol ngr nanycde. Na-awrkxtrle nimu mz Mqngrkxtr x nyr ngr nzalqngingr.
17 Mz nzvz-krmle sa napipxle kx leplz nztubqng o trtingr. X nakapxmle leplz kxnzmrlzng mz leplz kxnztrkang, x sc tqamnc-angidrpeleng Heven. A' leplz kxnztrkang sa na-angcpeleng mz nyr kx ngc alo.”
18 Mz natq kxkqlu mou, rngidrlvz-ngrbzle da mz leplz lcng, mz nzryapwxpx-krbzle badr kxmu Gct nzarlapx-krde leplz.
Jon Kxawrkxtr Nzadwatr Mz Presin
19 X Jon lclvz-kzpzle King Herot Antipas mz da kxkqlu kxtrka kx aletile. X tqrpipebzle kx natekqtrle nqmq nr drtwrde. Murde krnalz mzlede, drtqde Herodizs, tqyrlztibzle. A' mzlede lc sc tqlube.
20 Zbz king Herot ale-moule kc da kx trkatxpxbz mz nzngyatikr drtwrde Jon, murde tqlclvzbz Jon nqmq krde kcng tqtrka. Atwzlr-ngrbzle kcng ncblo ngr vea, sc tzadwatrpelr Jon mz presin.
Nzwrkxtrkr Jiszs
Matiu 3:13-17; Mak 1:9-11
21 X kzdq zbq mzli kc Jon trvztrka-ngrde mz presin, mz nibr leplz amrlx nzwrkxtr-krdr, Jiszs kc tqwrkxtrpe kz. X mzli kc tqkrka'-ngrpwzle, Heven nzlvxpx,
22 x Mqngrkxtr vzom bade mz nrkrdrtq kx apule nran. X kzdq natq rpiomle Heven, rpile kx, “Nim Mrlxnge Kxnzmrlzti. X abrtzlvz-zlwzx nim.”
Melrmqng Jiszs
Matiu 1:1-17
23 Mwx yiz ngr Jiszs nzpnu-tqpe (30) mzli kc tqabzo-ngrde nzwz-krde. Nzpnzkr drtwr leplz le ngi mrlx Josip. Josip ngi mrlx Heli.
24 Heli ngi mrlx Matat.
Matat ngi mrlx Livae.
Livae ngi mrlx Malakai.
Malakai ngi mrlx Janai.
Janai ngi mrlx Josip.
25 Josip ngi mrlx Matataeas.
Matataeas ngi mrlx Emos.
Emos ngi mrlx Naham.
Naham ngi mrlx Esli.
Esli ngi mrlx Nagae.
26 Nagae ngi mrlx Maat.
Maat ngi mrlx Matataeas.
Matataeas ngi mrlx Semen.
Semen ngi mrlx Josxk.
Josxk ngi mrlx Joda.
27 Joda ngi mrlx Joanzn.
Joanzn ngi mrlx Resz.
Resz ngi mrlx Serubabel.
Serubabel ngi mrlx Seltiel.
Seltiel ngi mrlx Nerae.
28 Nerae ngi mrlx Mxlki.
Mxlki ngi mrlx Adae.
Adae ngi mrlx Kosam.
Kosam ngi mrlx Elmadam.
Elmadam ngi mrlx Er.
29 Er ngi mrlx Josua.
Josua ngi mrlx Eliesa.
Eliesa ngi mrlx Jorim.
Jorim ngi mrlx Matat.
Matat ngi mrlx Livae.
30 Livae ngi mrlx Simion.
Simion ngi mrlx Judz.
Judz ngi mrlx Josip.
Josip ngi mrlx Jonam.
Jonam ngi mrlx Eliakim.
31 Eliakim ngi mrlx Melea.
Melea ngi mrlx Mena.
Mena ngi mrlx Matata.
Matata ngi mrlx Neitzn.
Neitzn ngi mrlx King Devet.
32 King Devet ngi mrlx Jesi.
Jesi ngi mrlx Obed.
Obed ngi mrlx Boas.
Boas ngi mrlx Salmon.
Salmon ngi mrlx Nason.
33 Nason ngi mrlx Aminadab.
Aminadab ngi mrlx Admin.
Admin ngi mrlx Arnae.
Arnae ngi mrlx Hesron.
Hesron ngi mrlx Peres.
Peres ngi mrlx Judz.
34 Judz ngi mrlx Jekop.
Jekop ngi mrlx Aesak.
Aesak ngi mrlx Ebraam.
Ebraam ngi mrlx Tera.
Tera ngi mrlx Neor.
35 Neor ngi mrlx Seruk.
Seruk ngi mrlx Reu.
Reu ngi mrlx Pelek.
Pelek ngi mrlx Ebr.
Ebr ngi mrlx Sela.
36 Sela ngi mrlx Kainzn.
Kainzn ngi mrlx Arpaksat.
Arpaksat ngi mrlx Sem.
Sem ngi mrlx Noa.
Noa ngi mrlx Lamxk.
37 Lamxk ngi mrlx Mxtusxla.
Mxtusxla ngi mrlx Inck.
Inck ngi mrlx Jarxt.
Jarxt ngi mrlx Maalalil.
Maalalil ngi mrlx Kenzn.
38 Kenzn ngi mrlx Enos.
Enos ngi mrlx Set.
Set ngi mrlx Adzm.
Adzm wzngr Gct.